काठमाडौं(प्रस)– प्रमुख सत्तारुढ घटक नेपाली कांग्रेसको १४औँ महाधिवेशन सुरु भइसकेको छ । यद्यपि केही जिल्लामा अझै क्रियाशील सदस्यता विवाद समधान हुन नसक्दा महाधिवेशन कार्यतालिका अनुसार गाउँ तथा नगरपालिकाको वडा अधिवेशन हुन सकेको छैन । कांग्रेसले बुधबार ७ जिल्लाको क्रियाशील सदस्यता सूची सार्वजनिक गरेको छ । बुधबार काठमाडौं, मोरङ, काभ्रे, सिन्धुपाल्चोक, कपिलवस्तु, बर्दिया र बाजुराको क्रियाशील सदस्यता सूची सार्वजनिक गरिएको कांग्रेसको केन्द्रीय निर्वाचन समितिले जनाएको छ । योसँगै ६४ जिल्लाको क्रियाशील सदस्यताको टुंगो लागेको छ । अझैं १३ जिल्लाको क्रियाशी सदस्यता विवाद टुंगिएको छैन ।
कांग्रेसले यसअघि ५७ जिल्लाको क्रियाशील सदस्यता विवरण सार्वजनिक गरिसकेको छ । बाँकी २० जिल्लामध्ये ७ जिल्लाको क्रियाशील सदस्यता विवाद समाधान गरिएको छ । यसअघि कांग्रेसका मुख्य सचिव कृष्णप्रसाद पौडेलले १० जिल्लाको विवाद समाधान भएको बताए पनि बुधबार साँझसम्म ७ जिल्लाको मात्र विवरण सार्वजनिक गरिएको छ । सबै जिल्लाको विवाद समाधान गरी छिट्टै पार्टीको केन्द्रीय निर्वाचन समितिलाई विवरण बुझाइने उनले बताए । क्रियाशील सदस्यता विवरण प्राप्त भएपछि मात्र समितिले बाँकी जिल्लामा वडा अधिवेशन प्रारम्भ गर्ने जनाएको छ ।
यसअघि क्रियाशील सदस्यता विवरण सार्वजनिक गरिएका ५७ जिल्लामा नै वडा अधिवेशन सम्पन्न भइसकेका छन् । यद्यपि केही जिल्लाको अधिवेशनमा विवाद भएको छ । वरिष्ठ नेता रामचन्द्र पौडेल समूहले डडेलधुराको वडा अधिवेशनमा संस्थापन पक्षले धाँधली गरेको आरोप लगाएको छ । पौडेल समूहले उक्त जिल्लामा पुनः वडा अधिवेशन गर्न माग गरेको छ । संस्थापन पक्षले वडा अधिवेशनमा राज्यशक्तिको दुरूपयोग गरेको भन्दै संस्थापन पक्षसँग असन्तुष्टि व्यक्त गरिरहेको छ ।
करिब नौ लाखको संख्यामा रहेका कांग्रेस क्रियाशील सदस्य पार्टीको गाउँ/नगर वडा अधिवेशनका मतदाता हुन् । क्रियाशील सदस्यले आफ्नो वडाको वडा समिति र क्षेत्रीय प्रतिनिधिको चयन गर्छन् । कांग्रेसको पछिल्लो अधिवेशन कार्यतालिकाअनुसार अधिवेशन प्रारम्भ हुन बाँकी २० जिल्लामा गाउँ/नगर वडा अधिवेशन आगामी ५ असोजमा तोकिएको छ । त्यस्तै गाउँ÷नगरपालिका अधिवेशन ९ असोज, प्रदेशसभा क्षेत्रीय अधिवेशन १२ असोज र प्रतिनिधिसभा क्षेत्रीय अधिवेशन/एक मात्र प्रतिनिधिसभा निर्वाचन क्षेत्र भएको जिल्ला अधिवेशन १८ असोजमा निर्धारण गरिएको छ । एकभन्दा बढी प्रतिनिधिसभा निर्वाचन क्षेत्र भएको जिल्ला अधिवेशन १८ असोजमै तोकिएको छ ।
