वीरगन्ज– नेकपा (माओवादी केन्द्र)को भ्रातृ संगठन अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी) पर्साको छैटौँ जिल्ला सम्मेलन वीरगन्जमा सुरु भएको छ । कार्यक्रमको उद्घाटन गरेपछि प्रमुख अतिथि तथा राष्ट्रिय अध्यक्ष रन्जीत तामाङले नेपालको शिक्षा सुधार नहुनुमा सरकारसँगै विभिन्न विद्यार्थी संगठनहरू दोषी रहेको बताए ।
सामुदायिक विद्यालयहरूलाई बर्सेनि धाराशाही बनाउने शिक्षा माफियालाई तह नलगाएसम्म शिक्षाको स्तर नउकासिने उनले दावी समेत गरे । उनले सरकारले शिक्षा, स्वास्थ्य तथा बेरोजगारको समस्या हल नगरेसम्म नेपाल वर्षेनी पछि पर्दै जाने ठोकुवा गरे । केन्द्रीय अध्यक्ष तामाङले अनेरास्ववियु (क्रान्तिकारी)सँग आवद्ध विद्यार्थीहरूलाई पार्टीका नेताहरूसँग समन्वय गरी संगठन निर्माणसँगै देशको पहिलो पार्टी बनाउनु अहिलेको आवश्यकता रहेको बताए ।
पर्सामा देखिएको विद्यार्थी संगठनको विवादलाई मिलाएर एक भएर अगाडि बढ्ने पर्साका अगुवा नेताहरूलाई सुझाएका थिए । कार्यक्रममा उनले संगठनभित्र देखिएको विवाद आफैँ सल्टाउन नसकिए अन्य सरह आफूपनि कमजोर हुने बताए । कार्यक्रममा वीरगन्ज महानगरका अध्यक्ष रहबर अन्सारीले विद्यार्थीहरूले नेताहरूको झोला बोक्ने काम तत्काल छोडी आफैँमा नेतृत्वको भूमिका निर्वाह गर्नमा आत्मविश्वास बढाउँदै अघि बढ्नु पर्ने बताए ।
उनले विद्यार्थीहरू तथा युवाहरू आफैँमा एक शक्ति भएकाले यसलाई परिचालन तथा व्यवस्थापन गर्नु अहिलेको अवश्यकता भएको बताए । जिल्ला संयोजक कविराज पटेलको सभापतित्वमा सुरु भएको कार्यक्रममा केन्द्रीय सदस्य जितेन्द्र देव, जिल्ला इन्चार्ज विजय महतो थारु, रामदरश कुशवाहा, जुबेर आलम लगायतले बोलेका थिए ।
त्यसैगरी, माओवादी केन्द्रसँगै आवद्ध विद्यार्थी नेता तथा जिल्लाका अन्य नेताहरूले हिजो एक विज्ञप्ति जारी गर्दै यो विद्यार्थीहरूको भेला अवैध भएको बताए । जिल्ला तथा गाउँपालिका स्तरका नेताहरूसँग समन्वय नगरी आयोजना गरेको भेलालाई मान्यता नदिने उनीहरूले विज्ञप्तिमा उल्लेख गरेका थिए । सो विज्ञप्तिमा केन्द्रीय सल्लाहकार जालीम मिया, प्रदेश २ का सदस्य छोटेलाल यादव, बाबुराम कौशिक, शेख चान्द तारा, रामबाबु बैठा, प्रभु यादव, सन्तोष घिमिरे लगायतले हस्ताक्षर गरेका थिए ।
