मोरङ– प्रदेश सरकारलाई आफ्नो पार्टीको समर्थन नरहेको नेकपा एकीकृत समाजवादी प्रदेश १ संसदीय दलले प्रदेशसभा सचिवालयलाई जानकारी गराएको छ । सोमबार प्रदेशसभा सचिवालयमा पत्र बुझाउँदै मुख्यमन्त्री भीम आचार्य नेतृत्वको सरकारलाई एकीकृत समाजवादीले आफ्नो दलको समर्थन नरहेको जानकारी गराएको हो ।
एकीकृत समाजवादी प्रदेश १ संसदीय दलको शनिबार बसेको बैठकले मुख्यमन्त्री आचार्यलाई समर्थन नगर्ने निर्णय गरे पछि एकीकृत समाजवादीकी प्रदेशसभा सदस्य सावित्रा रेग्मीले सरकारलाई समर्थन नरहेको जानकारी पत्र प्रदेशसभा सचिवालयलाई बुझाएकी हुन् ।
एमाले विभाजनको एक दिनपछि गत भदौ १० गते एमाले सचिव भीम आचार्य मुख्यमन्त्री नियुक्त भएका थिए । राजनीतिक रुपमा अल्पमतमा परेका बेला मुख्यमन्त्री नियुक्त भएका आचार्य सोमबारबाट वैधानिक रुपमा अल्पमतमा परेका छन् । समाजवादीका १० जना प्रदेश सदस्यले सरकारबाट समर्थन नरहेको जनाएसँगै मुख्यमन्त्री भीम आचार्यलाई ३० दिनभित्र बहुमत पुर्याउनुपर्ने चुनौती बनेको छ ।
एकीकृत समाजवादीले संसदीय दलको नेतामा राजेन्द्र राईलाई चयन गरेको पत्र पनि सोमबार नै प्रदेशसभा सचिवालयलाई बुझाएको छ । अस्वस्थ रहेका राजेन्द्र राईसहित ७ जना काठमाडौं र अन्य दुई जना विराटनगरबाहिर रहेको हँुदा प्रदेश सभामा समर्थन नरहेको पत्र बुझाउन नेत्री रेग्मी मात्र उपस्थित थिइन् ।
प्रदेश १ मा नेकपा एमालेका ५१ सांसद थिए । पार्टी विभाजन हुँदा राजेन्द्र राई, राजन राई, उपेन्द्र घिमिरे, सावित्रा रेग्मी, खिनु लङ्वा लिम्बू, गणेश काङ्माङ, कृष्णकुमारी राई, पदमकुमारी गुरुङ, सुनिता चौधरी र सरिता थापाले नेकपा एकीकृत समाजवादी पार्टी रोजेका हुन् । १० सांसदले नयाँ दल रोजेपछि एमालेसँग ४१ जना सांसद छन् । ९२ सदस्यीय प्रदेशसभामा बहुमतका लागि ४७ सांसद आवश्यक पर्छ । प्रदेशसभामा एमालेका ४१, कांग्रेसका २१, माओवादी केन्द्रका १५, एकीकृत समाजवादीका १०, जसपाका ३, राप्रपा र संघीय लोकतान्त्रिक राष्ट्रिय मञ्चका १/१ जना सांसद छन् ।
