मोरङ –प्रदेश सभा सदस्यमध्ये १० जनाले एकीकृत समाजवादी पार्टीलाई चयन गरेपछि मुख्यमन्त्री भीम आचार्यलाई बहुमत पुर्याउन धौ धौ देखिएको छ । प्रदेश १ सरकारको नेतृत्व जोगाइराख्न एमालेलाई ३० दिनभित्र विश्वासको मत लिनुपर्नेछ तर ५१ जना एमाले प्रदेश सभा सदस्यमध्ये १० जनाले एकीकृत समाजवादी पार्टीलाई चयन गरेपछि मुख्यमन्त्री आचार्यलाई बहुमत पुर्याउन धौ धौ पर्ने देखिएको छ ।
प्रदेश सभा सचिव गोपाल पराजुलीका अनुसार निर्वाचन आयोगले १० जना प्रदेश सभा सदस्यको नाम २५ भदौ शुक्रबार सनाखत गरेको पत्र विराटनगरस्थित प्रदेश सभामा पठाएको छ । आयोगबाट शुक्रबार दल र प्रदेश सभा सदस्य सनाखतको पत्र जानकारीमा आइसकेको उनले बताए । प्रदेश सभा सचिव पराजुलीले वर्तमान सरकारलाई विश्वासको मत लिन शुक्रबारबाट ३० दिनसम्मको समय दिइएको छ । सचिव पराजुलीका अनुसार आयोगले १० जनाको नाम समाजवादीमा सनाखत गरेसँगै अब एमालेमा ४१ जना प्रदेश सभा सदस्य रहनेछन् ।
वर्तमान सरकारले बहुमत पुर्याउनका लागि ३० दिनभित्र ४७ जना सदस्य आफ्नो पक्षमा पार्नुपर्ने हुन्छ । तर, सो संख्या पुर्याउने सम्भावना न्यून रहेको प्रमुख प्रतिपक्षी दल कांग्रेस संसदीय दलका प्रमुख सचेतक केदार कार्कीले बताए । विपक्षी गठबन्धनको प्रमुख दलको हैसियतमा अबको सरकारको नेतृत्व कांग्रेसले लिनुपर्ने उनको भनाइ छ ।
एमालेका पूर्वसामाजिक विकासमन्त्री जीवन घिमिरेले राजनीतिमा सम्भावनाको स्थान भएको हुँदा सरकारमा बहुमत पुर्याउन कांग्रेससँग पनि सहकार्य हुन सक्ने बताए । उनले बहुमत पुर्याउन दलबीच परामर्श भइरहेको जानकारी दिँदै सम्भावनाको ढोका खुला रहेको हुँदा सहमतिका लागि प्रयत्न जारी रहेको बताए । सहमतिका लागि नेतृत्व बाँड्न सकिन्छ भन्ने सन्दर्भमा उनले सो विषय द्विपक्षीय आपसी समझदारीमा निहित रहने बताए । यद्यपि, एमाले विश्वासको मतका लागि अघि बढ्ने र नतिजा जे भए पनि स्विकार्ने मनस्थितिमा छ ।
प्रदेश सरकारको नेतृत्वबारे गठबन्धन दलबीच कुनै छलफल भइनसकेको नेपाल समाजवादी पार्टीको संसदीय दलको नेता जयराम यादव बताए । उनले गठबन्धन दलका नेता विराटनगरबाहिर भएको हुँदा यस विषयमा गहन छलफल हुन नसकेको बताए । गठबन्धन दलमध्येबाट सर्वसम्मत चयन भएर एक दलले सरकारको नेतृत्व गर्नुपर्ने उनको भनाइ छ । उनले प्रमुख प्रतिपक्षी दल कांग्रेससँगै अन्य दलमा सहमति जुटे आपत्ति नहुने बताए । प्रदेश १ मा माओवादी केन्द्र भने आफ्नै नेतृत्वमा सरकार गठन गर्ने रणनीतिमा छ । गठबन्धनलाई मजबुत बनाउनेतर्फ केन्द्रित हुँदै प्रदेश १ मा आफ्नै नेतृत्व बनाउनेतर्फ नेताहरू रणनीति बनाउँदै अघि बढेका छन् । केन्द्रीय गठबन्धनमा समेत नेताले सुदूरपश्चिममा समाजवादी, वाग्मतीमा कांग्रेस र प्रदेश १ मा माओवादी नेतृत्व बनाउन सकिनेबारे सुझाव दिँदै आएका छन् ।
अर्कोतर्फ, मुख्यमन्त्री आचार्यले ३० दिनभित्र बहुमत जोड्न नसके सरकारबाट निस्कनुपर्ने हुन्छ । ४१ जना प्रदेश सभासदस्य रहेको एमालेका लागि थप ६ जना सांसद संख्या पु¥याउनु चुनौतीपूर्ण देखिएको छ । एमालेको ४१, एकीकृत समाजवादीको १० सँगै प्रदेश सभामा प्रमुख प्रतिपक्षी दल कांग्रेसको २१, माओवादी केन्द्र १५, जनता समाजवादी ३, संयुक्त लोकतान्त्रिक राष्ट्रिय मञ्च र राप्रपाको समान १ जना प्रदेश सभा सदस्य छन् ।
