सिमकोट– नेकपा एकीकृत समाजवादीका नेताले केपी ओलीको दम्भ, अहमताकै विद्रोहस्वरूप नयाँ पार्टी जन्म भएको बताएका छन् । नेकपा एमालेबाट विभाजित भएर नयाँ पार्टी बनेको सो पार्टीको धारणा सार्वजनिक गर्न आयोजना गरिएको पत्रकार भेटघाट कार्यक्रममा नेताले सो धारणा सार्वजनिक गरेका हुन् ।
नेकपा एकीकृत समाजवादीका नेता शिवराज शर्माले ओलीको अहमताको विद्रोहस्वरूप देशले भर्खरै मात्र नयाँ पार्टी पाएको बताएका छन् । उनले दुई तिहाइनजिक रहेको वामपन्थी सरकारलाई ओलीले धराशायी बनाएको आरोप लगाए । उनले कम्युनिस्ट आचारणभन्दा बाहिर रहेर काम गरेकै कारण एमालेको हालत अहिलेको अवस्थामा पुगेको भन्दै उनले यसको दोषीको भागीदार पनि एमाले अध्यक्ष ओली भएको बताए । उनले दम्भ, अहंकार र व्यक्तिवादी ओलीको सोचकै कारण अब उनको आगामी यात्रा पतनतर्फ उन्मुख रहेको बताए ।
उक्त पार्टीको नेता लोकबहादुर हमालले देशभक्त र इमानदार कार्यकर्ता एकीकृत समाजवादीमा रहेको दाबी गर्ने ओलीको भ्रष्टाचारीलाई संरक्षण गर्ने प्रवृत्तिको प्रतिफल अहिलेको अवस्था आएको बताए ।
पार्टीलाई एकढिक्कामा बनाउनकै लागि हुम्लामा सो पार्टीका गतिविधि अन्य जिल्लाको तुलनामा पछि सञ्चालन गरेको जानकारी दिँदै उनले अब संगठन विस्तारमा लाग्ने बताए ।
नेता हस्तबहादुर शाहीले व्यक्तिवादी सोच र पार्टीको नीतिविरुद्ध मनपरी रूपमा अगाडि बढ्ने ओली प्रवृत्तिकै कारण एमाले विभाजित भएको आरोप लगाए । जिल्लामा उनले एकीकृत समाजवादी पार्टी स्थापना भएर गतिविधि अगाडि बढ्न सुरु भएको बताउँदै सबै वर्गका जनसमुदायलाई सहयोग गर्न अपिलसमेत गरेका छन् ।
कार्यक्रममा तत्कालीन एमाले सचिव एकीकृत समाजवादी रोजेका नेता तीर्थराज रोकाया अब पार्टी नयाँ शिरा र ढंगबाट अगाडि बढ्ने बताए । पार्टी मात्र नभई देशलाई नै बर्बादीतर्फ धकेल्न उद्यत ओलीले अब त्यसको परिणाम भोग्ने बताए । पत्रकार भेटघाट कार्यक्रममा उक्त पार्टीसँग ३६ प्रतिशत जिल्ला कमिटी रहेको दाबी पनि गरिएको थियो ।
