पोखरा– नेपाल कम्युनिस्ट पार्टी (एमाले)का स्थायी कमिटी सदस्य सुरेन्द्र पाण्डेले पार्टी फुटाउनु कसैका लागि पनि हितको विषय नहुने बताएका छन् । प्रेस चौतारी नेपाल कास्की शाखाद्वारा बुधबार आयोजित पत्रकार सम्मेलनमा उनले हरेक पार्टीमा वैचारिक मतभेद हुने हुनाले मतभेद हुँदैमा पार्टी नै फुटाउनु चाहिँ गलत भएको बताए । उनले भने, ‘संघर्षको इतिहास बोकेको पार्टी मजबुद बनाएर लैजानुको साटो फुटको बाटो रोज्नु कसैका लागि पनि हित हुँदैन ।’
उनले पार्टीमा हुने वैचारिक मतभेद आपसी छलफल एवं अन्तक्र्रियाबाट समाधान गर्न सकिने बताए । पार्टीभित्रै अन्तरसंघर्ष गर्नुपर्ने अवस्थामा सिधै पार्टी फुटाउनु एकदम सही नभएको उनको भनाई थियो । उनले भने, ‘यस्तो प्रवृद्धिले समग्र कम्युनिस्ट आन्दोलनलाई कमजोर पार्ने काम गर्यो ।’ उनले पार्टी एकताका सम्बन्धमा माधव नेपाल समूहले नै अघि सारेका छ बुँदालाई नै समेट्दै १० बुँदे खाका तयार गरिएको पनि बताए । उनले सो बुँदामा माओवादी केन्द्रबाट एमालेमा आएका नेता कार्यकर्तालाई पनि समेटेको बताए ।
दश बुँदेलाई पनि आत्मसात् गर्न नसकी माधव नेपाल समूहले पार्टी फुटको अवस्थामा पुर्याएको उनको भनाई थियो । पार्टीमा समयसापेक्षरूपमा युवा जनशक्ति आउनुपर्ने आवश्यकता औँल्याउँदै उनले समयको मागलाई आत्मसात् गर्न सक्ने नेतृत्व वर्तमानको आवश्यकता भएको बताए ।
त्यस्तै उनले एकमना सरकारले समेत राज्यलाई सही निकास दिन अप्ठ्यारो परेको नेपालको वर्तमान अवस्थामा विभिन्न दल मिलेर बनेको गठबन्धन सरकारले समस्याको समाधान गर्न नसक्ने बताए । उनले हालको जल्दोबल्दो विषय एमसिसी यसअघि नै संसदमा छलफल हुनुपर्नेमा जोड दिए । उनले यसका गतल र सही पक्षबारे संसदमै छिनोफानो गरी निष्कर्ष निकालेको भए अहिलेको अवस्था सिर्जना नहुनसमेत बताए । कार्यक्रममा सचिव राजाराम पौडेलले मुलुकको समसामयिक गतिविधि एवं यस क्षेत्रको पत्रकारिताको अवस्थाबारेमा जानकारी गराएका थिए ।
