धनगढी– नेकपा एमालेका सुदूरपश्चिम प्रदेश सभाका थप तीन जना सांसदले नेकपा एकीकृत समाजवादीमा गएका छन् । आइतबार नेकपा एमाले परित्याग गरेर नेकपा (एकीकृत समाजवादी) पार्टीमा भौतिक पूर्वाधार विकास मन्त्री दीर्घबहादुर सोडारी, एमाले सुदूरपश्चिमका पूर्वप्रमुख सचेतक तारा लामा तामाङ र सुदूरपश्चिमका पूर्वराज्यमन्त्री प्रकाश रावलले निर्वाचन आयोमा गएर सनाखत गरेका हुन् । यससँगै समाजवादीमा सुदूरपश्चिममा १३ जना सांसद भएका छन् । एमालेमा रहेका साबिक २५ जनामध्ये अहिले १२ जनामात्र उक्त दलमा छन् । त्यस्तै माओवादीमा १३ जना सांसद नै छन् ।
नेकपा एमालेमै रहने बताउँदै आएका सुदूरपश्चिमका पूर्वराज्यमन्त्री प्रकाश रावलले पनि नेकपा एकीकृत समाजवादी पार्टीमै सनाखत गरेका छन् ।
यसअघि सांसद पूर्णा जोशी, लालबहादुर खड्का, बलबहादुर सोडारी, अम्मर साउँद, चुनकुमारी चौधरी, मना साउँद, कुलवीर चौधरी, सुशीला बुढाथोकी, दुर्गा कामी र माया भट्ट गरी १० सांसदले एकीकृत समाजवादीको पक्षमा सनाखत गरेका थिए । त्यस्तै प्रदेश २ मा माधवकुमार नेपाल नेतृत्वको नेकपा एकीकृत समाजवादी पार्टीको पक्षमा थप दुई सांसदले सनाखत गरेका छन् । सांसदद्वय सुन्दरबहादुर विश्वकर्मा र सीता गुरुङले नेकपा एस रोजेका हुन् ।
आइतबार निर्वाचन कार्यालय प्रदेश २ को कार्यालयमा पुगी दुवै जनाले सनाखत गरेका हुन् । यससँगै नेकपा एसको पक्षमा सनाखत गर्ने सांसदको संख्या १२ पुगेको छ । यसअघि बिहीबार नेकपा एमालेलाई छाडेर १० जना सांसदले नेकपा एस रोजेका थिए । विश्वकर्मा र गुरुङ भने एमालेको प्रदेश कमिटीको बैठकमा वीरगन्जमा सहभागी भएका थिए । विश्वकर्माले निर्वाचन आयोगले २२ भदौसम्म नयाँ पार्टी रोज्न समय दिएको र त्यसअघि एमालेमै रहेकोले प्रदेश कमिटीको बैठकमा सहभागी भएको बताए ।
त्यस्तै भारतको दिल्लीमा क्यान्सरको उपचार गराइरहेका प्रदेश सांसद डिल्लीप्रसाद उप्रेतीको सनाखतको गर्ने सांसद शत्रुधन महतोले बताए । उनले सनाखतका लागि दूतावासमार्फत प्रक्रिया अगाडि बढाइसकिएकाले सनाखतको काम पूरा हुने दाबी गरे । दैलेखमा आइतबार एकै दिन ३० जनाले जननिर्वाचित प्रतिनिधिहरूले एमाले परित्याग गरेका छन् । निर्वाचन आयोगले मंगलबार (२२ भदौ) सम्म दल रोज्न दिएको समयलाई सदुपयोग गर्दै आइतबार ३० जना जनप्रनिनिधिले नेकपा एकीकृत रोजेका हुन् । शुक्रबार २७ जनाले समाजवादीको पक्षमा सनाखत गरेका थिए ।
जसअनुसार अहिलेसम्म एमाले छाड्ने जनप्रतिनिधि ५७ पुगेको सांसद पार्वती विशुंखेले जानकारी दिइन् । उनका अनुसार आइतबार वडा अध्यक्ष ५ जना, गाउँपालिका अध्यक्ष एक जना, उपमेयर एकसहित बाँकी वडा सदस्यहरूले एकीकृत समाजावदी रोजेका हुन् । शुक्रबार गाउँपालिकाका एक अध्यक्ष, दुई उपाध्यक्ष, सात वडाध्यक्षसहित २७ जना जनप्रतिनिधिले एकीकृत समाजवादी रोजेका थिए ।
समाजवादी रोज्नेहरूमा महावु गाउँपालिकाका अध्यक्ष जंगबहादुर शाही, उपाध्यक्ष प्रेमकुमारी बुढा, ठाटीकाँध गाउँपालिकाका उपाध्यक्ष सुस्मिता सिंह छन् ।
त्यस्तै महावु गाउँपालिका–१ का वडाध्यक्ष डम्बर थापा, महावु–४ का वडाध्यक्ष देव शाही, महावु–५ का वडाध्यक्ष जगत हमाल, महावु–६ का वडाध्यक्ष डम्बर थापा, दुल्लु नगरपालिका–९ का वडाध्यक्ष रनबहादुर बोहोरा, भगवतीमाई गाउँपालिका–२ का वडाध्यक्ष कर्णबहादुर शाही र नारायण नगरपालिका–३ का वडाध्यक्ष चन्द्र उपाध्यायले एकीकृत समाजवादी रोजेका छन् । सनाखत गर्ने समय अझै दुई दिन बाँकी रहेकाले समाजवादी पक्षमा जनप्रतिनिधि थपिने नेताहरूको दाबी छ ।
