काठमाडौं– सत्तारुढ दल नेपाली कांग्रेसको १४औँ महाधिवेशनको कार्यतालिका फेरि प्रभावित हुने भएको छ । महाधिवेशनका कार्यतालिका अनुसार १८ भदौ अर्थात आगामी शुक्रबार गाउँ तथा नगरको वडा अधिवेशन हुनुपर्ने हो । तर, शुक्रबार वडा अधिवेशन नहुने लगभग निश्चित भएको छ । क्रियाशील सदस्यतासम्बन्धी विवादका कारण यसपटक पनि महाधिवेशनको कार्यतालिका प्रभावित हुने भएको हो ।
कांग्रेसले हालसम्म ५६ जिल्लाको मात्र क्रियाशील सदस्यताको सूची सार्वजनिक गरेको छ । २१ जिल्लाको अझै पनि क्रियाशील सदस्यको सूची नै सार्वजनिक गरिएको छैन । यस्तो अवस्थामा आगामी शुक्रबार वडा अधिवेशन हुने संभावना छैन ।
कांग्रेसमा नेताहरूबीच १८ भदौमा देशभर एकैसाथ वडा अधिवेशन गर्ने समझदारी भएको थियो । वडा अधिवेशन सुरु हुन दुई दिन मात्र बाँकी हुँदा ५६ जिल्लाको मात्रै क्रियाशील सदस्यता सार्वजनिक गरिएको छ । ‘जति ठाउँमा तोकिएको मितिमा वडा अधिवेशन हुँदैन, त्यहाँ निर्वाचन अधिकृतलाई नै नयाँ मिति तोक्ने अधिकार दिइएको छ,’ सहमहामन्त्री डा. प्रकाशशरण महतले भने ।
निर्वाचन समिति सदस्य तेजबहादुर रावलका अनुसार क्रियाशील सदस्यता सूची समितिले पाउनेबित्तिकै जिल्लामा निर्वाचन अधिकृत खटाइने छ । निर्वाचन समितिका सदस्य रावलले सबै वडामा कार्यतालिका अनुसार अधिवेशन नहुने बताए । ‘देशभरका ६ हजार ७ सय ४३ वडामै एकैदिन अधिवेशन हुने अवस्था छैन,’ उनले भने, ‘बिहीबारसम्म जति जिल्लाको क्रियाशील सदस्यता सूची आउँछ, हामी त्यहाँ निर्वाचन अधिकृत खटाउँछौँ ।’
१८ भदौमा अधिवेशन हुन नसकेका वडामा अर्काे मिति तोक्ने अधिकार निर्वाचन अधिकृतलाई दिइएको छ । कांग्रेस सहमहामन्त्री डा. प्रकाशशरण महतले वडा अधिवेशनदेखि पालिका अधिवेशनको बीचमा पर्याप्त समय भएकाले त्यस बीचमा गर्न सकिने बताए । ‘जति ठाउँमा तोकिएको मितिमा वडा अधिवेशन हुँदैन, त्यहाँ निर्वाचन अधिकृतलाई नै नयाँ मिति तोक्ने अधिकार दिइएको छ,’ सहमहामन्त्री महतले भने, ‘क्रियाशील सदस्यता विवाद जति चाँडो टुंगिन्छ, उति छिटो अविधेशन हुन्छ ।’
