भक्तपुर– नेकपा एमालेका नेता एवं सांसद महेश बस्नेतले नेपाली संसदको उपहास गर्दै सभामुख अग्नी सापकोटाले एमालेले १४ सांसदलाई कारबाहीको सिफारिस गरेकोमा जालझेल गरी कारबाही नगर्ने निर्णय गरेको आरोप लगाएका छन् ।
उनले बिगतको गुरिल्ला शैलीमा झैँ छुट्टै सरकार र संसद झल्को दिने गरी एमालेले १४ सांसदलाई कारबाहीको सिफारिस गरेकोमा विभिन्न जालझेल गरेर कारबाही नगर्ने निर्णय गरेको आरोप लगाए ।
भक्तपुरमा आयोजित साक्षात्कार कार्यक्रममा बोल्दै बस्नेतले राष्ट्रिय अन्तर्राष्ट्रिय जगत्को केही पक्ष नेपालको राजनीतिलाई अस्थितरतातर्फ धकेल्ने प्रयासमा लागेको अवस्थामा सभामुख सापकोटाले गरेको निर्णय उनीहरूको पक्षपोषणमा रहेको र नेपाली राजनीति र संविधानको सवालमा गलत नजिर बसालेको बताए ।
उनले वर्तमान सरकारलाई सुरुवात मै कुपोषण लागेको आरोप लगाए । वर्तमान सरकारले सामेल दलहरूले संविधानभन्दा माथि गएर काम गरेको र अध्यादेशबाटै संसदलाई निरन्तरा दिने प्रक्रियका साथै एमाले फुटाउने अभियानमा मात्र केन्द्रित भएकाले सरकारले पूर्णता पाउन नसक्नु कुपोषणको लक्षण भएको बस्नेतले बताए ।
नेपाली राजनीतिमा च्याँखे दाउ थाप्न माहिर पुष्पकमल दाहालले कांग्रेससँग सहकार्य गरी आफ्नो छोरीलाई मेयर बनाएको र ०७४ को निर्वाचनमा एमालेसँग च्याँखे थापेको बताउँदै आगामी निर्वाचनमा महागठबन्धनको नाममा नयाँ च्याँखे थाप्न लगेको उनले आरोप लगाए । उनले भने वर्तमान माधब नेपालको एकीकृत नेकपा समाजवादी दल गठनको कुनै औचित्य नरहेको भन्दै सुरुवात मै मन्त्री पालैपालो खाने खेलबाट प्रष्ट रहेको उनको भनाइ छ । वर्तमान सरकारले पूर्णता पाउन नसक्नुको पछाडिको रहस्य टाउकोले पुच्छर हल्लाउनु पर्नेमा पुच्छरले टाउको हल्लाएको भन्दै बस्नेतले भने, ‘अबको एक मात्र विकल्पको तीनै तहको निर्वाचन तत्काल गरिनु हो ।’
