काठमाडौं– प्रमुख सत्तारुढ दल नेपाली कांग्रेसले आगामी ९ देखि १३ मंसिरमा १४औँ महाधिवेशन गर्ने कार्यतालिका बनाएको छ । यद्यपि महाधिवेशन १८ भदौदेखि नै सुरु हुनेछ । उक्त दिन गाउँ तथा नगरपालिकाको वडा अधिवेशन गर्ने कार्यतालिका छ । वडा अधिवेशन गर्नुपर्ने दिन नजिकिँदै जाँदा कांग्रेस महाधिवेशन फेरि सर्ने हो कि भन्ने आशंका उब्जिएको थियो ।
मुलतः क्रियाशील सदस्यता विवाद समाधान हुन नसक्दा पटक–पटक सारिएको महाधिवेशन यसपटक पनि हुनेमा धेरैले शंका गरिरहेका थिए । वरिष्ठ नेता रामचन्द्र पौडेलनिकट जिल्ला सभापतिहरू नै पार्टी कार्यालय सानेपामा रिले अनसनमा बसेपछि महाधिवेशन नहुने हो कि भन्ने आशंका सर्वत्र थियो । तर, शुक्रबार साँझ सभापति शेरबहादुर देउवा र वरिष्ठ नेता पौडेलबीचको भेटमा महाधिवेशन तोकिएकै मितिमा गर्ने विषयमा सहमति भएपछि महाधिवेशन हुनेमा आसा बढेको छ ।
जिल्ला सभापति तथा अन्य जिल्लाका नेता कार्यकर्ताले विभिन्न माग राखी सानेपा दिइरहेको धर्नाको सम्बन्धमा समेत दुई शीर्ष नेताबीच छलफल भएको थियो । उक्त छलफलमा अनसनरत नेताहरूको माग सम्बोधन गर्ने सहमति बनेको थियो । शुक्रबारको सहमतिलगत्तै शनिबार संस्थापनइतर पक्षका शीर्ष नेताहरूको बैठक बसेको थियो । उक्त बैठकले महाधिवेशन हुने परिस्थिति बनेको निष्कर्ष निकाल्दै महाधिवेशनमा केन्द्रित हुने निर्णय गरेपछि कांग्रेस महाधिवेशन हुने कांग्रेस कार्यकर्तामा आसा सञ्चार भएको छ ।
सभापति देउवासँग कुराकानी गरेपछि वरिष्ठ नेता पौडेल समूहले शनिबार आफूनिकट नेता र जिल्ला सभापतिहरूसँग कांग्रेस नेता प्रकाशमान सिंहको निवास चाक्सिबारीमा छलफल गरेको थियो । देशभरका छ हजार ७४३ वडामा एकै दिन अधिवेशन गर्ने समझदारी भएको नेता सिंहले बैठकपछि जानकारी दिए । उनका अनुसार जिल्ला सभापतिहरूले राखेको माग पनि सुनुवाइ गर्ने समझदारी बनेको छ । जिल्ला सभापतिहरूले निर्वाचन निर्देशिका संशोधन र क्रियाशील सदस्यता नामावली सार्वजनिक गर्न माग गर्दै ८ भदौदेखि पार्टी केन्द्रीय कार्यालयमा अनसन सुरु गरेका थिए ।
पौडेल पक्षको बैठकले पार्टीको महाधिवेशन तोकिएकै मितिमा सम्पन्न हुने गरी केन्द्रित भएर लाग्ने निर्णय गरेको नेता सिंहले जानकारी दिए । महाधिवेशनमा एकजुट भएर लाग्नका लागि सिंगो पार्टी पंक्तिलाई एक औपचारिक कार्यक्रम गरी आह्वान गर्ने निर्णय पनि गरिएको उनले बताए । पौडेल पक्षले पछिल्लोपटक तोकिएको निर्वाचन कार्यतालिका अनुसार महाधिवेशनको कार्यक्रम नगरिए पार्टीको वैधानिकता नै संकटमा पर्ने निष्कर्ष निकाल्दै चिन्ता व्यक्त गरेको छ ।
५३ जिल्लाको सूची सार्वजनिक
कांग्रेसले हालसम्म ४३ जिल्लाको क्रियाशील सदस्यता सार्वजनिक गरेको छ । संस्थापनइतर पक्षको तीव्र दबाबका बीच १४औँ महाधिवेशनका लागि केन्द्रीय क्रियाशील सदस्यता छानबिन समितिले बुझाएको प्रतिवेदनअनुसार ती जिल्लाको क्रियाशील सदस्यताको सूची सार्वजनिक गरिएको हो ।
वडा अधिवेशनका लागि शनिबार पाँच जिल्लाको विवरण सार्वजनिक गरिएको छ । शनिबार नुवाकोट, धादिङ, चितवन, ललितपुर र अर्घाखाँची जिल्लाका क्रियाशील सदस्यको नामावली प्रकाशित गरिएको हो । गएको बिहीबार ३८ जिल्लाको क्रियाशील सदस्यता सूची सार्वजनिक गरेको निर्वाचन समितिले शुक्रबार थप १० जिल्लाको नामावली सार्वजनिक गरेको थियो । निर्वाचन समिति संयोजक महादेव यादवले सदस्यता सूची सार्वजनिक भएका जिल्लामा निर्वाचन अधिकृतलाई खटाइएका छन् । निर्वाचन समितिले शुक्रबार धनकुटा, भोजपुर, गुल्मी, प्युठान, दाङ, सल्यान, कालीकोट, जाजरकोट, दैलेख र अछाम जिल्लाको क्रियाशील सदस्यता पार्टीको वेबसाइटमा सार्वजनिक गरेको थियो ।
निर्वाचन समितिले बिहीबार ताप्लेजुङ, पाँचथर, इलाम, संखुवासभा, तेह्रथुम, खोटाङ, सोलुखुम्बु, ओखलढुंगा, उदयपुर, झापाको क्रियाशील सदस्यता सार्वजनिक गरेको थियो । यस्तै दोलखा, रामेछाप, सिन्धुली, भक्तपुर, गोरखा, लमजुङ, तनहुँ, कास्की, मनाङ, मुस्ताङ, पर्वत, स्याङ्जा, म्याग्दी र नवलपुरको सदस्यता सूची सार्वजनिक गरेको थियो । त्यस्तै, नवलपरासी, रूपन्देही, पाल्पा, रुकुम पूर्वी, रोल्पा, रुकुम पश्चिम, जुम्ला, मुगु, हुम्लाका साथै बझाङ, डोटी, दार्चुला, बैतडी र कञ्चनपुरको सदस्यता सूची पनि पार्टीको वेबसाइटमा सार्वजनिक गरिएको निर्वाचन समितिले जनाएको छ ।
बाँकी जिल्लाको पनि चाँडै सदस्यता विवरण सार्वजनिक गर्ने संस्थापन पक्षले प्रतिवद्धता जनाएको छ । वरिष्ठ नेता पौडेलसँग शुक्रबार भएको छलफलमा सभापति देउवाले अन्य जिल्लाको सूची चाँडै सार्वजनिक गर्ने प्रतिवद्धता जनाएका थिए । पौडेल पक्षले बाँकी जिल्लाको सूची सार्वजनिक गर्न दुई दिनको अल्टिमेटम दिएको छ । शनिबारको बैठकबाट पौडेले पक्षले सो अल्टिमेटम दिएको हो ।
तोडियो अनशन
कांग्रेसको मुख्यालय सानेपामा पौडेलनिटक जिल्ला सभापतिहरू गत बुधबारदेखि बसेको रिले अनशन तोडिएको छ । प्रत्येक दिन तीन जिल्लाका सभापतिहरू रिले अनसनमा बसिरहेका थिए । कांग्रेसकोे १४औँ महाधिवेशनअन्तर्गत गाउँ÷नगर वडा अधिवेशन यही १८ भदौ, गाउँ/नगरपालिका अधिवेशन २७ भदौ, प्रदेशसभा क्षेत्रीय अधिवेशन आगामी १ असोज, प्रतिनिधिसभा क्षेत्रीय अधिवेशन/एक मात्र प्रतिनिधिसभा निर्वाचन क्षेत्र भएको जिल्ला अधिवेशन ५ असोजमा तोकिएको छ । यसैगरी कांग्रेसले एकभन्दा बढी प्रतिनिधिसभा निर्वाचन क्षेत्र भएको जिल्ला अधिवेशन १० असोज, प्रदेश अधिवेशन १० देखि १२ कात्तिकसम्म र केन्द्रीय महाधिवेशन आगामी ९ देखि १३ मंसिरसम्म तय गरेको छ ।
