काठमाडौं– नवगठित नेकपा (एकीकृत समाजवादी) पार्टीका अध्यक्ष माधवकुमार नेपालले आफ्नो साथ छाडेका एमालेका दोस्रो पुस्ताका नेताहरूसँग ठूलो गुनासो गरेका छन् । उनले दोस्रो पुस्ताका नेताहरूले नयाँ दल दर्ताका लागि आफूलाई बारम्बार घचेटेर अन्तिममा साथ छाडेको टिप्पणी गरेका हुन् । उनले भने, ‘मलाई घचेटेर अगाडि बढ भने, पछाडि हेर्छु त कोही पनि छैन ।’
पेसागत महासंघ नेपाल, वाग्मती प्रदेशले शनिबार गरेको जिल्लास्तरीय भेलामा अध्यक्ष नेपालले ‘आजै पार्टी फुटाऔँ, भोलि नै पार्टी फुटाऔँ’ भन्ने नेताहरूको पोजिसन परिवर्तन भएको देख्दा अचम्म लागेको बताए । २३ फागुन ०७७ को सर्वोच्च अदालतको फैसलाले नेकपा खारेज भएपछि आफूहरू विद्रोही आवाजका साथ एमालेमै बस्न चाहेको नेता नेपालले सुनाए । त्यसबेला आफूलाई दोस्रो पुस्ताका नेताहरूले ‘आजै पार्टी घोषणा गरौँ, भोलि नै पार्टी घोषणा गरौँ’ भनेर दबाव दिने गरेको नेता नेपालले सम्झिए । उनले भने, ‘बलियो मोर्चा बन्न थालेपछि अगाडि बढ्नुस्, जो सुकैलाई प्रधानमन्त्री बनाए पनि हुन्छ, तर केपी ओलीलाई फाल्नैपर्छ भनेर भन्ने उहाँहरू नै हो ।’
‘केपी ओली प्रतिगमनका बाहक हुन्, दक्षिणपन्थी भासमा भासिएका छन् । विदेशीसामू लम्पसार परेका छन् । त्यसैले जसरी पनि फाल्नुपर्छ । दोस्रो पुस्ताका नेताहरू भन्थे’ उनले भने, ‘तयार नभएका शेरबहादुर देउवालाई तयार गर्न साथीहरू जानुभएको थियो । माओवादीहरूलाई एक ठाउँमा ल्याउन भूमिका खेल्नुभयो । उपेन्द्र यादवलाई त्यो विश्वास दिलाउनु भएको थियो ।’ आफूहरूको साथ पाउने भएपछि नै कांग्रेस, माओवादी र जसपा तयार भएको उनले खुलासा गरे । त्यसबेला पनि आफूले ओलीलाई फाल्न त सकिन्छ, तर संसदमा आफूहरू चाहिने भनेर सम्झाएको सुनाए । ‘संसदबाट राजीनामा दिएर निस्कौँ भने संख्या पुग्दैन । प्रधानमन्त्रीलाई सडकबाट फाल्न सकिँदैन, संसदबाटै हटाउनुपर्छ । त्यसैले संसदको गतिविधिमा भाग नलिऔँ, बहिष्कार गरौँ भनेँ,’ नेता नेपालले भने ।
त्यही योजनाअनुसार तत्कालीन प्रधानमन्त्री ओलीले गत २७ वैशाखमा विश्वासको मत लिँदा आफूहरू संसदमा अनुपस्थित भएको अध्यक्ष नेपालले बताए । फेरि प्रधानमन्त्री बनेका ओलीले सर्वोच्च अदालतको फैसलाविपरीत संसद विघटन गर्न खोजेपछि संविधानको धारा ७६ (५) अनुसार नयाँ सरकार गठनका लागि बहुमत सदस्यको हस्ताक्षर जुटाउनु परेको उनले बताए । उनले भने, ‘त्यो बेला केहीकेहीको खुट्टा काम्न थाल्यो । हामी खुट्टा कमाउने मान्छे होइनौँ । कसैको खुट्टा कामे काम्छ, म अगाडि बढेँ भनेर हिम्मत गरेँ ।’ नयाँ पार्टी गठनमा आफूलाई साथ नदिएका दोस्रो तहका नेताहरूतर्फ संकेत गर्दै उनले भने, ‘मलाई घचेटेर अगाडि बढ भने, पछाडि हेर्छु त कोही पनि छैन ।’
उनले ती नेताहरूलाई नयाँ पार्टीमा आउन आह्वान पनि गरेका छन् । अध्यक्ष नेपालले पार्टी विभाजनपछि आफूहरूलाई साथ नदिएका एमालेका दोस्रो पुस्ताका नेताहरू पार्टीमा आए नेतृत्व छाड्न तयार रहेको घोषणासमेत गरे । आफूले पदका लागि कहिल्यै पनि लडाइँ नगरेको पटक–पटक दोहो¥याए । अध्यक्ष नेपालले भने, ‘आउनुहोस् दोस्रो पुस्तालाई नेतृत्व हस्तान्तरण गर्न म अहिले पनि तयार छु । आउनुहोस्, नेपाल कम्युनिस्ट पार्टी (एकीकृत समाजवादी) को अध्यक्ष बन्नुहोस् । म अध्यक्ष पदबाट त अहिल्यै भनी हाल्छु, अनि केही वर्षपछि राजनीतिबाटै बिदा भइहाल्छु, भएन ? पदको लडाइँ होइन, यो । विचारको लडाइँ हो, यो । सिद्धान्तको लडाइँ हो यो । मूल्य र मान्यताको लडाइँ हो यो ।’
