काठमाडौं– प्रमुख सत्तारूढ नेपाली कांग्रेसका जिल्ला सभापतिहरूले चाँडोभन्दा चाँडो क्रियाशिल सदस्यताको नामावाली सार्वजनिक गर्न नेतृत्वसँग माग गरेका छन् । बिहीबार आयोजना गरेको साक्षात्कारमा बोल्दै नुवाकोट कांग्रेस सभापति जगदिशनरसिंह केसीले आफूहरू महाधिवेशनको विरोधी नभएको स्पष्ट पारेका छन् । उनले भने, ‘हामीले महाधिवेशन भाँड्न खोजेको होइन । हामीले सभापतिहरूले पटक–पटक मिटिङ गर्ने काम ग¥यौँ । नेताहरूलाई विशेष महाधिवेशन गरौँ भन्यौँ, अर्ली महाधिवेशन गर्ने हो भने पनि गरौँ भन्यौँ, पछि टाइम्ली महाधिवेशन गरौँ भन्यौँ । हामीले विगत तीन वर्षदेखि यो कुरा भन्दै आयौँ, सुझाव दिँदै आयौँ ।’
उनले पार्टीले तत्काल क्रियाशील सदस्यताको नामावाली सार्वजनिक गर्नुपर्ने बताए । उनले भने, ‘नेपाली कांग्रेसको १४औँ महाधिवेशनको मतदाताको नामावाली सार्वजनिक हुनुपर्छ ।’ त्यस्तै, त्यसरी नाम सच्याउँदा दाबी/विरोध गर्ने र सच्याउने मौका दिनुपर्ने पनि आफूहरूको अर्को माग रहेको केसीको भनाइ छ । उनले आफूहरूले अघि सारेका तीन बुँदे माग आमनेपाली कांग्रेस पक्षधरको आवाज भएको बताए । उनले पूर्वमहामन्त्री कृष्णप्रसाद सिटौला, डा.मिनेन्द्र रिजाल र रमेश लेखकको समितिले बुझाएको क्रियाशिलको प्रतिवेदनमा सैद्धान्तिक र नीतिगत रूपमा मात्रै सहमति गरेकाले व्यवहारिक रूपमा समाधान हुनुपर्ने धारणा राखे । उनले भने, ‘यो पार्टी कसैको पेवा होइन ।’
त्यस्तै, कार्यक्रममा भक्तपुरका जिल्ला सभापति दुर्लभ थापाले अधिवेशन नजिकिँदै जाँदा विभिन्न बखेडा झिकेर धर्नामा बस्नु गलत भएको भन्दै आक्रोश पोखेका छन् । उनले भने, ‘हामीलाई त अधिवेशनको समय घर्किँदै गर्दा खासै केही समस्या नहोला । तर, कालिकोट, मुगुको सभापतिलाई समस्या होला ।’ उनले वरिष्ठ नेता रामचन्द्र पौडेल समूहलाई जिल्ला सभापतिहरू उचालेर महाधिवेशन भाँड्ने क्रियाकलाप गरेको भन्दै आफू त्यसको विरुद्धमा रहेको स्पष्ट पारे । उनले आफूहरूले क्रियाशिल वितरण सर्वसम्मत रूपमा वितरण गरेको पनि सुनाए ।
थापाले अहिले कांग्रेस वैधानिक संकटमा छ भन्ने कुरा पनि आएको उल्लेख गरे । उनले सभापति शेरबहादुर देउवा, वरिष्ठ नेता रामचन्द्र पौडेल र पूर्वमहामन्त्री कृष्णप्रसाद सिटौलाले क्रियाशिल सदस्यताको विवाद समाधानबारे सहमतिमै प्रतिवेदन बुझेको र सहमति गरेको पनि स्मरण गराए । रामेछापका सभापति लवश्री न्यौपाने पनि तत्काल क्रियाशिल सदस्यताको नामावली तत्काल सार्वजनिक गर्न माग गरेका छन् । उनले आफूहरू अधिवेशनको विरोधी नभएको पनि जिकिर गरे ।
त्यस्तै धादिङका सभापति रमेश धमलाले क्रियाशिल सदस्यता सार्वजनिक गर्नुपर्ने माग गरे । आफूहरू पार्टीको हितमा नै केन्द्रित भएर लागेको पनि उनको स्पष्टोक्ति थियो । उनले पार्टीको आन्तरिक लोकतन्त्रको दृष्टिकोणमा पनि कांग्रेस सक्षम, योग्य र जनताले भरोसा गर्न योग्य बनाउन आफूहरू लागिपरेको बताए । बुधबारबाट २४ घन्टे रिले अनसन सुरु गरेका कांग्रेस जिल्ला सभापतिहरूको अनसन बिहीबार पनि जारी छ । उनीहरूले क्रियाशील सदस्यता विवरण सार्वजनिक गर्नुपर्नेलगायत तीनबुँदे माग राख्दै अनसन सुरु गरेका हुन् । कांग्रेसले वडा अधिवेशन भदौ १८ मा गर्ने भने तापनि अहिलेसम्म क्रियाशील विवरण सार्वजनिक गर्न सकेको छैन ।
