काठमाडौं– सत्तारुढ दल नेपाली कांग्रेसका जिल्ला सभापतिहरूले पार्टी केन्द्रीय कार्यालय सानेपामा बुधबारबाट धर्ना सुरु गरेका छन् । १४औँ महाधिवेशनको तयारीमा रहेको कांग्रेको क्रियाशील सदस्यता विवरण सार्वजनिक गर्न माग गर्दै जिल्ला सभापतिहरूले रिले अनसन सुरु गरेका हुन् ।
लामो समयदेखि विवादित रहेको क्रियाशील सदस्यताका विषयमा पछिल्लो समय शीर्ष नेताहरू कृष्णप्रसाद सिटौला, डा.मिनेन्द्र रिजाल र रमेश लेखक सदस्य रहेको कार्यदले सहमति जुटाएको थियो । लेखक संयोजत्वको समितिले धेरै कोसिस गर्दा पनि क्रियाशील सदस्यतासम्बन्धी विवाद समाधान गर्न सकेको थिएन । त्यसपछि तीन सदस्यीय कार्यदललाई विवाद समाधानको जिम्मा दिइएको थियो । विवाद समाधानका लागि उक्त कार्यदललाई २ भदौसम्मको समय दिइएको थियो । तर, कार्यदलले ७ भदौमा सहमति जुटाएर सभापति शेरबहादुर देउवा र वरिष्ठ नेता रामचन्द्र पौडेललाई प्रतिवेदन बुझाएको थियो । उक्त कार्यदलले सहमति गरेर कायम गरेको क्रियातील सदस्यता विवरण हालसम्म सार्वजनिक भएको छैन ।
उक्त सदस्यता विवरण सार्वजनिक गर्न माग गर्दै वरिष्ठ नेता पौडेल पक्षधर जिल्ला सभापतिहरूले २४ घन्टे रिले अनसन सुरु गरेका हुन् । यसैगरी सबै जिल्लाका सभापतिको निर्वाचन प्रक्रियामा एकरुरूता आउने गरी निर्वाचन निर्देशिका संशोधन गर्न पनि उनीहरूले माग गरेका छन् । कांग्रेसका नुवाकोटका जिल्ला सभापति जगदीश्वरनरसिंह केसीसहित बुधबार तीन जिल्ला सभापति अनशनमा बसेका छन् । केसीसँगै काभ्रेका मधु आचार्य र धादिङ जिल्ला सभापति रमेश धमला पहिलो दिन रिले अनशनमा बसेका छन् ।
प्रत्येक दिन नयाँ तीन जिल्ला सभापति अनशनमा बस्ने केसीले जानकारी दिए । ‘जबसम्म हाम्रा मागबारे सम्बोधन हुँदैन, तबसम्म अनशन जारी रहन्छ,’ सभापति केसीले भने, ‘यो जिल्ला सभापतिको माग मात्र होइन, देशभरका क्रियाशील सदस्यको भावनाको प्रतिनिधित्व हामीले गरेका हौँ ।’
कांग्रेसको वडा अधिवेशन १८ भदौका लागि तोकिएको छ । सभापति देउवाले तत्काल माग सम्बोधन गरेर महाधिवेशन निश्चित गर्नुपर्ने संस्थापनइतर समूहको भनाइ छ । कांग्रेसले १४ औँ महाधिवेशन ९ देखि १३ मंसिरसम्म गर्ने गरी कार्यतालिका सार्वजनिक गरिसकेको छ । वडा अधिवेशन आउन १० दिन पनि बाँकी रहेका बेला निर्वाचन समितिले क्रियाशील सदस्यताको अन्तिम सूची पाएको छैन । पार्टी देउवाले सदस्यता सूची निर्वाचन समितिलाई बुझाएपछि नामावली सार्वजनिक गर्ने बताएका छन् । कांग्रेसले यसपटक वेबसाइटमै सदस्यता इन्ट्री, उजुरी दर्ता गरेको थियो भने नामावली सार्वजनिक पनि वेबसाइटमै गर्ने तयारी छ ।
