काठटमाडौं– सत्ता साझेदार दल नेकपा (माओवादी केन्द्र)ले विचार मिल्ने सबै कम्युनिस्ट घटकसँग सहकार्य एवं एकता गर्ने निष्कर्ष निकालेको छ । नेकपा एमालेसँग ३ जेठ ०७५ मा भएको एकीकरण सर्वोच्च अदालतले भंग गरिदिएपछि पुनः पुरानै अवस्थामा पुगेको माओवादी केन्द्रले सहकार्य र एकतालाई जोड दिइरहेको छ । पछिल्लो समय एमालेभित्रको अन्तरविरोधमा माओवादी केन्द्रका अध्यक्ष पुष्पकमल दाहालले राम्रै खेलिरहेको राजनीतिक विश्लेषकहरूको दाबी छ । उनले एमालेका वरिष्ठ नेता माधवकुमार नेपाल पक्षलाई पार्टी फुटाउन उक्साएको आरोप खेपिरहेका छन् । अन्ततः नेपाल पक्षले नयाँ दल नेकपा (एकीकृत समाजवादी) दर्ताका लागि निर्वाचन आयोगमा निवेदन दिएपछि माओवादी केन्द्रले सहकार्य र एकताको ढोका खोलेको हो ।
नयाँ दल दर्तापछि नेपाल र दाहालबीच सहकार्य वा एकताकै संभावना रहेको चर्चा चलिरहँदा पार्टी केन्द्रीय कार्यालय पेरिसडाँडामा आइतबार बसेको स्थायी समितिको बैठकले समान विचार भएका वामपन्थी पार्टीसँग सहकार्य, एकता गर्दै नयाँ कम्युनिस्ट पार्टीको अवधारणाका साथ अगाडि बढ्ने निर्णय गरेको हो ।
तत्कालीन एमाले र माओवादी केन्द्रका बीचमा चुनावी गठबन्धन र पार्टी एकतासमेत भएको थियो । एकता प्रक्रिया तीन वर्ष पूरा नहुँदै टुटेपछि नयाँ आधारमा कम्युनिस्ट पार्टीबीचको एकता र सहकार्यलाई अगाडि बढाउने माओवादीले निष्कर्ष निकालेको छ । विचार मिल्ने सबै वामपन्थी पार्टी र समूहसँग सहकार्य गर्दै एकताको प्रक्रिया अगाडि बढाउने बैठकको निष्कर्ष रहेको माओवादी केन्द्रका प्रवक्ता नारायणकाजी श्रेष्ठले जानकारी दिए ।
बैठकले पार्टीका विभागीय प्रमुख तोकेको छ । जिल्ला इन्चार्ज तोक्ने जिम्मा भने प्रदेश समितिलाई दिइएको उनले बताए । केन्द्रीय समितिको बैठकको दिशानिर्देशअनुसार आइबार विभागीय प्रमुख, प्रदेश प्रमुख तोकिएको हो । बैठकले प्रदेश २ को इन्चार्जको जिम्मेवारी गणेश साहलाई दिएको छ । वागमतीमा हितमान शाक्य, गण्डकीमा हितराज पाण्डे, लुम्बिनीमा चक्रपाणी खनाल, कर्णालीमा शक्तिबहादुर बस्नेत र सुदूरपश्चिममा खगराज भट्टलाई इन्चार्ज तोकिएको छ । प्रदेश १ मा भने तत्कालका लागि इन्चार्ज तोकिएको छैन ।
माओवादीले सात प्रदेशका इन्चार्ज र अन्य विभागका प्रमुख तोकेर पार्टी संगठनको कामलाई प्रभावकारी बनाउन लागिएको जनाएको छ । माओवादीले जिल्ला समितिलाई जिल्ला समन्वय समितिमा रूपान्तरण गरेको छ । सोही आधारमा जिल्ला इन्चार्ज तोकेको छ ।
त्यस्तै, केही जिल्लामा केन्द्रीय प्रतिनिधि तोकेको छ । केन्द्रीय प्रतिनिधिले पार्टी संगठनको काम सम्हाल्नेछ । माओवादीले संघीय, प्रदेश र स्थानीय समिति बढी कामकाजी बनाउन लागेको छ । जिल्ला समितिलाई प्रदेश र स्थानीय तहको समन्वय गर्ने जिम्मा मात्रै दिइएको छ । यस्तै, माओवादी छाडेर एमाले प्रवेश गरेका नेताको सट्टामा अन्य नेतालाई जिम्मेवारी दिएर परिपूर्ति गरिएको छ ।
यस्तै, माओवादीले वडा, पालिका र प्रदेश अधिवेशनको प्रक्रिया अगाडि बढाउने निर्णय गरेको छ । अधिवेशनका लागि आवश्यक पर्ने नियमावली र निर्देशिका तयार पार्ने काम जारी रहेको छ । ती तयार भएपछि तल्ला तहमा पठाइनेछ । माओवादीले पार्टीको संगठन विस्तारका साथसाथै राष्ट्रिय स्वाधीनताको रक्षाको विषय, तत्काल कोभिड महामारीमा जनतालाई सहयोग गर्ने विषय र कोभिडसँग जुध्न एकताबद्ध हुने विषयलाई पनि प्रमुख प्राथमिकताका साथ अगाडि बढाउने भएको छ ।
