काठमाडौं– राजनीतिमा लामो समयसम्म सहकार्य गरेर अलग भएका नेकपा माओवादी केन्द्रका अध्यक्ष पुष्पकमल दाहाल र जनता समाजवादी पार्टीका अध्यक्ष डा.बाबुराम भट्टराई बिहीबार एउटै मञ्चमा देखिएका छन् । तत्कालीन नेकपा माओवादीको सशस्त्र युद्धका बेला नजिकबाट सहकार्य गरेका उनीहरू माओवादी शान्ति प्रक्रियामा आएको केहीसमयपछि छुट्टिएका थिए । माओवादी शान्तिप्रक्रियामा आएको बखत एउटै प्रकारको ड्रेसअपसमेत गर्ने उनीहरू संविधान जारी हुनेबित्तिकै अलग भए । डा.भट्टराईले नयाँ शक्ति पार्टी गठन गरेर अलग राजनीतिक यात्रा अघि बढाए । हाल उनी संघीय समाजवादीसँग एकीकरण गर्दै जसपामा आइपुगेका छन् ।
लामो समयदेखि राजनीतिक रूपमा मतभेद रहेका उनीहरू बिहीबार समाजवादी केन्द्र, नेपालले आयोजना गरेको ‘एक्काइसौँ शताब्दीको माक्र्सवाद र समाजवाद’ विषयक अन्तक्र्रियामा एउटै मञ्चमा देखिएका हुन् । नेकपा एमालेबाट माधवकुमार नेपाल समूह अलग भएको भोलिपल्ट दुई नेता एक ठाउँमा देखिनुलाई अर्थपूर्ण रूपमा हेरिएको छ । नेपाल पक्षले पनि नयाँ पार्टी गठन भएपछि वृहत कम्युनिस्ट मोर्चा निर्माण गर्ने बताइरहेको छ ।
कार्यक्रममा माओवादी केन्द्रका अध्यक्ष दाहालले माधवकुमार नेपालले गठन गरेको नयाँ पार्टीको सनाखत हुनेबित्तिकै मन्त्रिपरिषद् विस्तार हुने बताएका छन् । ‘नयाँ परिस्थिति बनेको छ । आज बिहान मात्रै प्रधानमन्त्रीजी, माधव नेपालजी र म बसेका पनि थियौँ । अब मन्त्रिपरिषद् बिस्तार गर्न ढिलो गर्नु हुँदैन, तुरुन्तै टुंग्याउनुपर्छ भनेर,’ उनले भने, ‘बिहान सबै पार्टीका नेताहरूको के समझदारी बनेको छ भने यो दर्ता भएको पार्टीको सनाखत हुने बित्तिकै एकैदिनमा मन्त्रिपरिषद् टुंग्याइदिनुपर्छ भन्ने कुरा भएको छ । जति छिटो उहाँको सनाखत हुन्छ । त्यति छिटो मन्त्रिपरिषद् विस्तार हुन्छ ।’
उनले विगतमा केपी ओलीले लोकतन्त्र, संविधान र गणतन्त्र सिध्याउन अध्यादेश ल्याएको भए पनि वर्तमान सरकारको अध्यादेश ल्याउनु उद्देश्य लोकतन्त्र, गणतन्त्र र संविधानको रक्षा गर्नु रहेको भन्दै अध्यादेशको प्रतिरक्षा गरे । उनले भने, ‘एउटा अध्यादेशको उद्देश्य लोकतन्त्र सिध्याउनु, संविधान सिध्याउनु, गणतन्त्र सिध्याउनु थियो । अर्को अध्यादेशको उद्देश्य लोकतन्त्र, गणतन्त्र र संविधानको रक्षा गर्नु छ । यो दुईवटामा आकाश, जमिनको फरक छ भन्ने बुझ्न जरुरी छ ।’
यस्तै अन्तक्र्रियामा बोल्दै जसपा अध्यक्ष डा. भट्टराईले नयाँ समाजवादको मोडल खोज्नुपर्ने आवश्यकता रहेको औँल्याए । नेताहरूले पुराना पार्टीको चुनाव चिह्न छाड्न गाह्रो मानेको भन्दै उनले क्षणिक पार्टीगत र चुनावी स्वार्थभन्दा माथि उठेर समाजवादी केन्द्र बनाउनुपर्नेमा जोड दिए । ‘फेरि नयाँ समाजवादको एउटा मोडल खोज्नेतिर देश गइरहेको छ ।
