काठमाडौं– वाग्मती प्रदेश सरकारको मुख्यमन्त्री फेरिएको छ । बुधबार मुख्यमन्त्री डोरमणि पौडेलले पदबाट राजीनामा दिएपछि नयाँ मुख्यमन्त्रीका रूपमा सत्तारुढ दल नेकपा एमालेकी स्थायी कमिटी सदस्य अष्टलक्ष्मी शाक्य नियुक्त भएकी हुन् । बुधबार नै प्रदेश प्रमुख विष्णु प्रसाईंले पौडेलको राजीनामा स्वीकृत गर्दै शाक्यलाई मुख्यमन्त्री पदमा नियुक्त गरेका थिए । मुख्यमन्त्री शाक्यको बुधबार नै शपथग्रहण कार्यक्रम सम्पन्न भएको छ ।
त्यसअघि बुधबार बसेको एमाले प्रदेशसभा संसदीय दलको बैठकले शाक्यलाई संसदीय दलको नेता चयन गरेको थियो । पौडेलकै प्रस्तावमा शाक्य संसदीय दलको नेता चयन भएकी थिइन् । नेकपा एमालेको विभाजनसँगै शाक्यले मुख्यमन्त्री बन्ने मौका पाएकी हुन् । उनी नेपालकै पहिलो महिला मुख्यमन्त्री बन्न सफल भएकी छन् । राजनीतिमा लामो योगदान र अनुभव भएकी उनको नेतृत्वमा वाग्मती प्रदेशको समृद्धि र विकासले सार्थकता पाउने अपेक्षा गरिएको छ ।
मुख्यमन्त्री शाक्य यसअघि नेता माधवकुमार नेपाल पक्षमा थिइन् । तर, उनले पार्टी विभाजनमा नेपाललाई साथ नदिने भन्दै केही समय पहिलेदेखि नै संस्थापन पक्षसँग निकटता बढाएकी थिइन् । कर्णाली, सुदूरपश्चिम, लुम्बिनी, गण्डकीलगायत प्रदेशसभामा नेपाल पक्षका प्रदेशसभा सदस्यले संस्थापन पक्षविरुद्ध मोर्चाबन्दीमा सामेल भए पनि प्रदेश १ र वाग्मती प्रदेशमा नेपाल पक्षका सांसदहरूले पार्टीविरुद्ध गएका थिएनन् । तुलनात्मक रूपमा प्रदेश १ र वाग्मतीमा नेपाल पक्षको उपस्थिति बलियो भए पनि उनीहरूले पार्टीविरुद्धको मोर्चाबन्दीमा साथ दिन अस्विकार गरेका थिए । विशेष गरेर शाक्य आफैँले पार्टी एकताको पक्षमा जोड दिँदै आफ्नै दलको सरकारविरुद्ध अविश्वासको प्रस्ताव नल्याउने अडान लिइकी थिइन् । उनले वाग्मती प्रदेशबाट पार्टीको नेताहरूले सिक्नुपर्ने भन्दै पार्टी एकताका लागि सबै कुरा बिर्सिएको प्रतिक्रिया दिएकी थिइन् ।
संस्थापन पक्षले पनि पार्टी औपचारिक रूपमा विभाजन हुने नै भएपछि हतारमा शाक्यलाई मुख्यमन्त्री पद सुम्पिएको हो । प्रदेशसभा गठन हुनेबित्तिकै भएको प्रदेशसभा संसदीय दलको निर्वाचनमा शाक्य पौडेलसँगै पराजित भएकी थिइन् । त्यसयता पार्टी नेतृत्वसँग असन्टुष्ट रहँदै आएकी उनी बल्ल प्रदेशसभाको आयु डेढ वर्ष बाँकी रहँदा मुख्यमन्त्रीको कुर्सीमा पुगेकी हुन् ।
मंगलबार सरकारले राजनीतिक दलसम्बन्धी अध्यादेश जारी गर्न राष्ट्रपति विद्यादेवी भण्डारीलाई सिफारिस गरिएपछि संस्थापन पक्षले शाक्यलाई मुख्यमन्त्री दिएको हो । उनी नेपालसँगै अर्को पार्टीमा जान सक्ने आँकलन गर्दै संस्थापन पक्षले हतारमा उनलाई मुख्यमन्त्रीको कुर्सी सहजै सुम्पिएको बताइएको छ ।
