काठमाडौं– नेकपा माओवादी केन्द्रले अझैं प्रतिगमनको खतरा कायमै रहेको निष्कर्ष निकालेको छ । यसअघि नेकपा एमालेका अध्यक्ष तथा तत्कालीन प्रधानमन्त्री केपी ओलीले गरेको संसद विघटनको कदमलाई प्रतिगमन ठहर गरेको माओवादी केन्द्रले अझैं पनि त्यस्तो खतरा कायमै रहेको निष्कर्ष निकालेको हो । शनिबार र आइतबार भएको माओवादी केन्द्रको केन्द्रीय कमिटी बैठकले वर्तमान सत्ता गठबन्धन कमजोर नै रहेको भन्दै एमालेको माधवकुमार नेपाल समूहकै भर पर्नुपर्ने ठहर गरेको छ ।
बैठकले अध्यक्ष पुष्पकमल दाहालद्वारा प्रस्तुत राजनीतिक र विधान संसोधन प्रस्ताव सर्वसम्मत पारित गरेको छ । बैठकले विधान संशोधन र समसामयिक प्रतिवेदन पनि पास गरेको प्रवक्ता नारायणकाजी श्रेष्ठले जानकारी श्रेष्ठले दिए । बैठकमा पेस भएको अध्यक्षको प्रतिवेदनमा खासगरी आजको राजनीतिक कार्यभार र पार्टीको सांगठनिक अवस्थाबारे निर्दिष्ट गरेका नेता श्रेष्ठले जानकारी दिए । ‘खासगरी प्रतिगामी खतरा कायमै रहेको र सजग भएर अघि बढ्नुपर्ने, राष्ट्रिय एकताका लागि वाम लोकतान्त्रिक सहकार्यलाई निरन्तरता दिन आवश्यक छ,’ नेता श्रेष्ठले बैठकको निष्कर्ष सुनाउँदै भने ।
बैठकले आगामी पुस दोस्रो साता पार्टीको राष्ट्रिय सम्मेलन गर्ने निर्णय गरेको छ । बैठकको समापन अघि समूहगत छलफल गरेर आएको सुझावलाई समेटेर विभिन्न प्रतिवेदनहरू पारित भएका थिए । माओवादी केन्द्रको बैठकले विभिन्न ६ बुँदे प्रस्ताव पारित गरेको छ । जसमा महाकाली नदीमा तुइन काटेर नेपाली युवाको मृत्यु भएको दुई हप्ता भयो । यसबारे भारतसँग वार्ता गर्न र क्षतिपूर्तिका लागि सहल गर्न सरकारसँग माग गर्ने निर्णय गरेको छ । त्यस्तै, बेलायतमा गोर्खा सैनिकहरूले गरिरहेको आमरण अनसनमा ऐक्यबद्धता जनाउने र बेलायत सरकारसँग तत्काल वार्ताको पहल गर्न सरकारसँग माग गर्ने निर्णय भएको छ ।
बैठकले कोरोनाको तेस्रो लहरको खतरा देखिएको हुनाले त्यसको रोकथामको तयारी गर्न, जनतालाई खोपको प्रबन्ध गर्न र समग्र अर्थतन्त्रको पुनरुत्थानको माग सरकारसँग गर्ने निर्णय गरेको छ । त्यस्तै, सम्पूर्ण पार्टी पंक्तिलाई स्वास्थ्य मापदण्ड अपनाउँदै महामारीविरुद्ध जुध्न र देशका लागि योगदान गर्न आहवान गर्ने, बाढी, पहिरोबाट पीडितहरूको राहत उद्धार र पुनर्निर्माणमा सरकारको ध्यानाकर्षण गर्ने र अफगानिस्तानमा रहेका नेपालीहरूको अवस्थाबारे जानकारी गराउन सरकारसँग माग गर्ने निर्णय गरेको प्रवक्ता श्रेष्ठले बताए ।
बैठकमा अध्यक्ष दाहालको प्रतिवेदनमाथि सामूहिक छलफल भएको थियो । समूहगत रूपमा गरिएको छलफलको निष्कर्ष प्रस्तुतिपछि अध्ययक्ष दाहालले बैठकलाई सम्बोधन गरेका थिए । त्यसक्रममा उनले अहिले गरिरहेकै कामलाई निरन्तरता दिने र यथास्थितिमै रुमलिरहने हो भने माओवादी पार्टीको औचित्य नरहने बताए । ‘अहिले गरिरहेको कामलाई नै निरन्तता दिने हो यो पार्टीको काम छैन । विश्वमा कम्युनिस्ट पार्टीहरू पतन भए । गोर्भाचोभ देखियो, येल्तसिन पनि देखियो,’ उनले भने, ‘वर्गप्रति, सिद्धान्तप्रति इमान्दार नहुनुभन्दा पार्टीकै विघटन गरेर, अध्ययन–अनुसन्धानमा लाग्नु वा किताब लेखेर बस्नु बढी इमान्दारीता हुन्छ ।
