गण्डकी–नेपालका मुख्य पर्यटन केन्द्र पोखरामा पर्यटन व्यवसायी र मजदूरलाई औपचारिकरूपमा कोभिडविरुद्धको खोप अभियान सुरु गरिएको छ । पर्यटन व्यवसायीले धेरै अगाडिदेखि खोपको माग गरेपछि नेपाल पर्यटन बोर्ड पोखराको परिसरमा बुधबार पोखराका पर्यटन व्यवसायी र मजदूरलाई औपचारिकरूपमा कोभिडविरुद्धको खोप लगाउने अभियाने सुरु गरिएको हो । गण्डकी प्रदेश पर्यटन, उद्योग वाणिज्य तथा आपूर्तिमन्त्री मणिभद्र शर्मा र कानुन, सञ्चार तथा प्रदेशसभा मामिलामन्त्री विन्दुकुमार थापाले पर्यटन व्यवसायीलाई कार्ड हस्तान्तरण गर्दै खोप अभियानको सुरुआत गरे ।
पर्यटन, उद्योग वाणिज्य तथा आपूर्तिमन्त्री मणिभद्र शर्माले कार्यक्रममा खोपका कारणले कोही पनि निराश नबनी, उच्च मनोबलका साथ आआफ्नो सेवामा जुट्नका लागि सबैमा अनुरोध गर्दै प्रदेशका अन्य १० जिल्लामा पनि निकट भविष्यमा खोप लगाउने तयारी भइरहेको जानकारी दिए । पर्यटन व्यवसायीको माग अनुसार वर्तमान सरकारले उनीहरूको मागअनुसार सम्बोधन सुरुआत गरेको बताउँदै कानुनमन्त्री थापाले व्यवसायीको मागलाई निरन्तररूपमा सम्बोधन गर्ने बताए । खोपको लागि विभिन्न पाँच वटा केन्द्रको व्यवस्था गरिएको थियो ।
नेपाल पर्यटन बोर्डमा टान, पश्चिमाञ्चल क्षेत्रिय संघ, एनएमए, ओटेफ र टेवान, माउन्ट कैलाशमा रेवान पोखरा र नेपाल हवाई खेलकुद संस्था, होटल बाराहीमा पश्चिमाञ्चल होटल संघ र पोखरा पर्यटन परिषद्, बोमर्याङ रेष्टुरेन्टमा नाट्टा गण्डकी प्रदेश, एगा पोखरा, टेसा पोखरा, एनटिभीए र द बीच रिसोर्टमा भिटोफ, मनि चेन्जर, स्पा, डुंगा एशोसिएसन, टुरिष्ट बुक सप, सिटी टुर गाइड, अखिल मजदूर संघ, युनिट्राभ र फेवा पर्यटन विकास समिति, थान्का एण्ड प्रिन्टिङ, नेशनल टुर गाइडलगायतलाई खोप लगाउने व्यवस्था मिलाइएको परिषद्का कार्यवाहक अध्यक्ष पोमनारायण श्रेष्ठले जानकारी दिए ।
गण्डकी प्रदेशका विशेष गरी पर्यटन व्यवसायी र मजदूरलाई औपचारिकरूपमा कोभिडविरुद्धको खोप अभियान सुरु भएकामा खुसी व्यक्त गर्दै पोखरा पर्यटन परिषद्का पूर्वअध्यक्ष गणेशबहादुर भट्टराईले आन्तरिक पर्यटन प्रवद्र्धनका लागि खोप अभियानलाई निरन्तरता दिनुपर्नेमा जोड दिए । बुधबार पोखरा पर्यटन परिषद्मार्फत दुई हजार ५०० खोप वितरण भएको हो भने उद्योग वाणिज्य संघ र अन्य व्यावसायिक संघसंस्थाले बिहीबारदेखि क्रमशः खोप कार्यक्रम सुरु गर्ने स्वास्थ्य निर्देशनालयले जनाएको छ ।
