काठमाडौं– प्रमुख प्रतिपक्षी दल नेकपा एमालेका अध्यक्ष तथा निवर्तमान प्रधानमन्त्री केपी ओलीले मंगलबार सरकारबाट बाहिरिएपछि पहिलोपटक संसदलाई सम्बोधन गरेका छन् । उनले सरकारको काम कारबाहीदेखि हालै सार्वजनिक गरिएको सरकारको न्यूनतम् साझा कार्यक्रमका सन्दर्भमा पनि प्रश्न गर्न भ्याए ।
करिब सवा घन्टा सम्बोधन गरेका अध्यक्ष ओलीले सरकारलाई अमेरिकी मिलेनियम च्यालेन्ज कर्पोरेसन (एमसिसी), सरकार विस्तार र खोपमा भएको ढिलाइ, लडाकू शिविरमा भएको भ्रष्टाचारको छानबिनदेखि कालापानी लिपुलेक र लिम्पियाधुरासम्मको सवालमा प्रश्न गरेका छन् । उनले संयुक्त सरकारको न्यूनतम साझा कार्यक्रममा ‘कांग्रेसको अनुहार खोइ ?’ भनी प्रश्न गरे । शेरबहादुर देउवा नेतृत्वकै अघिल्लो सरकारले एमसिसी सम्झौता गरे पनि संयुक्त सरकारले एमसिसीबारे प्रष्ट धारणा नराखेको ओलीको टिप्पणी छ । उनले एमसिसी पास गर्ने, नगर्ने वा चुप लाग्ने के हो ? भनी प्रधानमन्त्री देउवालाई प्रश्नसमेत गरे । ‘नेपाली जनताले जान्न चाहेको छ सम्माननीय प्रधानमन्त्रीज्यू, के गर्नुहुन्छ एमसिसी ? एमसिसी पास गर्ने की फेल गर्ने की चुप लाग्ने ?’ ओलीले प्रश्न गरे ।
सत्तारुढ दलहरूले २५ साउनमा सार्वजनिक गरेको न्यूनतम् साझा कार्यक्रम एमसिसीबारे मौन छ । सन् २०१७ मा हस्ताक्षर भएको एमसिसी सम्झौता दुई वर्षभन्दा लामो समयदेखि संसदमा विचाराधीन छ । ओली सरकारले यसलाई अनुमोदन गर्न चाहेको थियो, तर साविकको कम्युनिस्ट पार्टी (नेकपा) ि भत्रै यस विषयमा एकमत रहेन । त्यसबेला प्रमुख प्रतिपक्षमा रहेको कांग्रेसले भने एमसिसी सम्झौता छिटो पास गर्न दबाब दिएको थियो । एमसिसी सम्झौताबारे सत्तारुढ गठबन्धनमा एकमत नभएको फाइदा ओलीले उठाउन खोजेका छन् ।
अध्यक्ष ओलीले वर्तमान सरकारले राष्ट्रियताका मुद्दाहरूमा खुट्टा कमाएको पनि टिप्पणी गरेका छन् । उनले भने, ‘साझा कार्यक्रममा कालापानी भारतसँग वार्ता गरेर फिर्ता ल्याउँछौँ किन सक्नुभएन ? यसलाई कालापानी समस्या भनेर राख्नुभयो । के यो समस्या हो ? हाम्रो अभिन्न भू–भाग, पवित्र भू–भाग समस्या हुन्छ ? समस्या समाधान कसरी गर्ने त ? छोडिदियो भने त समाधान होला नि । स्पष्टरूपमा फिर्ता लिन्छौँ भन्ने कि समस्या हो समाधान गर्छौँ भन्ने ? त्यस्तो खुट्टा कमाउनुपर्ने कसले बनायो ?’ उनले सदनमा थपे, ‘त्यो हाम्रो पवित्र भू–भाग हो, फिर्ता लिनुस् । छोड्ने अधिकार कसैलाई छैन । सक्नुभएन भने ढेढ व र्ष पर्खिनुस् । हामी आउछौँ ।’ छिमेकीहरूसँग सीमा समस्या समाधान गर्ने भनेर साझा कार्यक्रममा उल्लेख गरिएको विषयमा पनि ओलीले प्रश्न उठाए । उनले भने, ‘कुन–कुन देशसँग कहाँ–कहाँ के समस्या छ ? कति साह्रो डराएको ? जिब्रोबाट पनि रगत आइसक्यो होला कुरा चपाउँदा चपाउँदा ।’
एमाले अध्यक्ष ओलीले तत्कालीन जनसेनाको अस्थायी शिविरमा भएको भ्रष्टाचारको अनुसन्धान गर्न संसदसमक्ष माग गरेका छन् । भ्रष्टाचारीलाई कारबाही गर्ने सरकारको नीतिप्रति टिप्पणी गर्दै उनले भने, ‘भ्रष्टाचारीलाई कारबाही गर्ने भन्नु भएको छ, खुसी लाग्यो । छानबिन गर्ने र कारबाही अगाडि बढाउने भन्ने राम्रो कुरा हो । भ्रष्टाचारका थुप्रै कुरा उठिरहेका छन् । क्यान्टोनमेन्टको यत्रो कुरा पनि उठेकै छ । यसपल्ट पक्कै पनि यत्रो गठबन्धनको सरकारले यस कुराको छानबिन गरेर नेपाली जनतालाई जवाफ दिनेछ । ललिता निवास, मातातीर्थको पनि गर्छ होला ।’
उनले सरकारले आफू नेतृत्वको सरकारले गरेको निर्णय र नियुक्ति उल्ट्याउने कार्यको पनि विरोध गरेका छन् । उनले वर्तमान सरकारले गरेको राम्रो कामलाई पनि नउल्ट्याउन चेतावनी दिँदै भने, ‘ओलीको याद दिलाउने सबै काम उल्ट्याउनुहोस्, धरहरा भत्काउनुहोस्, रानी पोखरी पनि पुर्नुहोस् । आलीको याद दिलाउने सबै मेटाउनुहोस् ।’
उनले आफू नेतृत्वको अघिल्लो सरकारले यथेष्ट खोप ल्याएर थुपारेको भन्दै छिटो वितरण गर्न माग गरेका छन् । उनले भने, ‘मेरो सरकारले खोप ल्याएर थुपार्देको छ त । चैतसम्म किन पर्खिनुहुन्छ ? लगाउनुस् न छिटो–छिटो । लगभग एक करोड स्टकमा छ । एकैचोटि ल्याएर राख्न नमिलेको भएरमात्र हो । आइराख्या छ । चैतसम्म भनेको के फागुनको निर्वाचन नगर्न खोजेको हो कोभिड छ भनेर ? म पहिल्यै सजक गराउन चाहन्छु ।’
अध्यक्ष ओलीले आफू नेतृत्वको सरकार गिराउन सहयोग गरेका एमालेकै वरिष्ठ नेता माधवकुमार नेपाल समूह र नेकपा माओवादी केन्द्रका अध्यक्ष पुष्पकमल दाहाललाई पनि बाँकी राखेनन् । उनले नेपाल समूहप्रति कटाक्ष गर्दै मन्त्री बनाइदिन देउवालाई आग्रह गरेका छन् । ‘प्रधानमन्त्रीज्यू मेरै पार्टीका केही नेताहरू पाउँला र खाउँला भनेर यहाँका पछि कुदेका छन् । तिनीहरूलाई मन्त्री दिनुहोस् न किन बिलम्ब गर्नुभएको ? हिरिक्क, हिरिक्क भएका छन् विचराहरू मन्त्री खानलाई ।’
त्यस्तै, पूर्वप्रधानमन्त्री ओलीले माओवादी केन्द्रका अध्यक्ष दाहालले संसदमा उभिएर आफूलाई ‘आगो’ को संज्ञा दिएकोमा कडा जवाफ दिए । उनले भने, ‘सरकार परिवर्तन हुनेबित्तिकै, अर्को सरकार बन्नेबित्तिकै सत्तापक्षका नेताहरूले यसै रोष्ट्रमबाट भन्नुभयो, होसियार, म आगो हुँ, मसँग नखेल.. नत्र । उहाँ आगो हो, डढेलो लगाउनुहुन्छ । यस्तो डढेलो निभाउन हामीलाई नि आउँछ । पानी खन्याउनुपर्छ पानी ।’ यसअघि दुई चार बाल्टीले नै निभाएको भन्दै उनले दाहाललाई ब्यंग्य पनि कसेका छन् ।
