काठमाडौं– प्रमुख सत्तारुढ दल नेपाली कांग्रेसका प्रभावशाली नेता तथा पूर्वसभासद् डा.चन्द्र भण्डारीले आज÷भोलिभित्रै मन्त्रिपरिषद् विस्तार हुने स्पष्ट पारेका छन् ।
सोमबार राजधानीमा आयोजना गरेको साक्षात्कारमा बोल्दै नेता भण्डारीले यस्तो बताएका हुन् । उनले अहिले मन्त्री बन्ने आकांक्षीहरू धेरै भएको सुनाउँदै उनले काम गर्नको लागि धेरै मन्त्री नभए पनि हुने तर्क गरे ।
उनले जनताले दुई तिहाई जनमत दिएर सरकारमा पठाउँदा पनि कम्युनिस्ट पार्टी सरकारबाट बाहिरिनुपरेको र कांग्रेस सरकारमा जानुपरेको सुनाए । उनले कांग्रेस सभापति शेरबहादुर देउवालाई पनि यति चाँडै प्रधानमन्त्री हुन्छु भनेर नलागेको पनि टिप्पणी गरे । उनले भने, ‘उहाँलाई पनि यति चाँडो प्रधानमन्त्री हुन्छु भन्ने थिएन, अहिले सानो थालको भागमा सरकार परेको छ ।’
उनले ओली सरकार हटाएर देउवाको नेतृत्वमा सरकार बनाउनको लागि नेपाली कांग्रेस, नेकपा (माओवादी केन्द्र), नेकपा (एमाले), जनता समाजवादी पार्टी, नेपाल र जनमोर्चाको गठबन्धन बनेको पनि स्मरण गराए । उनले मन्त्री सानो संख्यामा बनाएर भए पनि देश चलाउन सकिने र जनताको पक्षमा काम गर्न सकिने विश्वास दिलाए ।
उनले अहिले धेरै कुरा गर्नुभन्दा पनि जनताको पक्षमा काम गर्नुपर्ने बेला भएको सुनाए । पछिल्लो ३० वर्षमा अरु देश कहाँबाट कहाँ पुगेको भए पनि विकासको दृष्टिकोणले नेपाल धेरै पछि परेको उनको भनाइ छ ।
त्यस्तै, विकास निर्माणको पाटोमा पनि सरकारले विशेष ध्यान दिनुपर्ने उनको सुझाव छ । नेपालमा अहिलेसम्म कुनै पनि परियोजना समय सीमाभित्रै सम्पन्न हुन नसक्नु विकासको अर्को बाधक भएको भण्डारीको भनाइ थियो । नेपालको दक्ष जनशक्ति विदेशिन बाध्य भएको पनि उनको टिप्पणी छ ।
माओवादी केन्द्रका प्रभावशाली नेता तथा सांसद देवेन्द्र पौडेलले अबको दुई÷तीनभित्र मन्त्रिपरिषद् विस्तार हुने दाबी गरेका छन् । सरकारको आयु डेढ वर्ष भएकोले यो अवधिमा जनताको मन जित्ने गरी राम्रो काम गरिने पनि उनले विश्वास दिलाए । उनले समाजवादमा पुग्नको लागि धेरै मेहनत गरिने पनि बताए ।
नेता पौडेलले सत्तपक्षीय गठबन्धनको कार्यदलले हिजो सार्वजनिक गरेको न्यूनतम साझा कार्यक्रममा धेरै राम्रो कुराहरू समेटिएको पनि जिकिर गरे । त्यस्तै, आम जनतालाई कोभिडविरुद्धको खोप उपलब्ध गराउने कुरा पनि साझा कार्यक्रममा समावेश गरिएको उनको भनाइ छ ।
नेता पौडेलले आवश्यक खोप आपूर्तिको लागि सम्बन्धित पक्षसँग सरकारले पहलकदमी गरिरहेको पनि विश्वास दिलाए । त्यस्तै, सीमा समस्या समाधानको लागि आवश्यक पहल गरिने कुरा पनि कार्यक्रममा उल्लेख गरिएको उनको भनाइ छ । त्यस्तै, सुशासन कायम गरिने, आम जनसमुदायमा राज्य छ भन्ने अनुभूति दिनेगरी काम गरिने, भ्रष्टाचार नियन्त्रणको लागि उचित कदम चालिनेलगायत कुरा समेटिएको पनि पौडेलले जनाए ।
जनता समाजवादी पार्टी, नेपालका शीर्ष नेता तथा सांसद राजेन्द्र श्रेष्ठले अबको दुई÷चार दिनभित्रै सरकारले पूर्णता पाउने विश्वास दिलाए । यसको लागि गठबन्धनमा आवद्ध दलका शीर्ष नेताहरूबीच कुराकानी पनि भइरहेको उनको भनाइ छ ।
उनले वर्तमान सरकारसँग आगामी निर्वाचन पनि सम्पन्न गराउने दायित्व भएकोले उपयुक्त समयमा उपयुक्त निर्णय लिइने पनि बताए । उनले मन्त्री बन्नको लागि आकांक्षी धेरै हुनुलाई स्वभाविक रूपमा लिनुपर्ने पनि बताए । उनले केपी ओली नेतृत्वको सरकारको प्रतिगमनविरुद्ध आफूहरूको एलायन्स बनेको सुनाए । आफूहरू यो संसदलाई पूर्ण कार्यकाल चलाउनुपर्ने पक्षमा उभिएको सुनाउँदै सोहीअनुसार अघि बढेको श्रेष्ठको भनाई छ ।
