गण्डकी– गण्डकी प्रदेशका पर्यटन, उद्योग, वाणिज्य तथा आपूर्ति व्यवस्थामन्त्री मणिभद्र कँडेलले व्यावसायिक क्षेत्रमा छिट्टै खोपको व्यवस्था गरी पर्यटन क्षेत्रलाई उकास्ने आश्वासन दिएका छन् ।
होटेल तथा रेष्टुरेन्ट एशोसिएसन, लेखनाथद्वारा मन्त्री कँडेलको सम्मानमा बेगनास तालमा आयोजित स्वागत कार्यक्रममा उनले यस्तो आश्वासन दिएका हुन् ।
उनले मागअनुसार खोपको व्यवस्थापन गरी कोरोना प्रभावित व्यवसायलाई पुनरुत्थान गर्न सरकार गम्भीर रहेको बताए । उनले यसका लागि यहाँका सरोकारवालाको निरन्तर सक्रिय सहभागिता आवश्यक भएको बताए । उनले पर्यटकीय रूपमा लेखनाथ क्षेत्र धेरै सम्भावना भएर पनि ओझेलमा परेको उल्लेख गर्दै तालको संरक्षणका लागि जलाधार क्षेत्रबाट आउने गेग्रानको नियन्त्रणका लागि तत्काल पहल थाल्न सरोकारवालालाई सुझाव दिए । बेगनास ताल धार्मिक तथा पर्यटन विकास संस्थाका अध्यक्ष ध्रुवनाथ अधिकारीले सम्भावना भएर पनि ओझेलमा परेको लेखनाथ क्षेत्रको पर्यटकीय विकासलाई चासो दिन मन्त्री कँडेललाई आग्रह गरे ।
उक्त अवसरमा मन्त्री कँडेलले बेगनास ताल, बराह, माझीकुनालगायत स्थानमा पुगी त्यहाँका धार्मिक पर्यटकीय सम्भावनाबारे जानकारी लिएका थिए । वेगनास तालका डुंगा व्यवसायी समितिका अध्यक्ष ढकनाथ कँडेलले कोरोनाका कारण प्रभावित पर्यटनलाई जोगाउनका लागि राज्यको ध्यान पुग्नुपर्नेमा जोड दिए ।
होटेल तथा रेष्टुरेन्ट एशोसिएसन, लेखनाथका अध्यक्ष अर्जुनप्रसाद लम्सालले लेखनाथलाई सात तालको सहर भनिए पनि त्यसअनुरूप यसको प्रवद्र्धन र विकासमा सरकारको ध्यान नपुगेको गुनासो गरे ।
होटेल तथा रेष्टुरेन्ट एशोसिएसन लेखनाथका पूर्वअध्यक्ष दुर्गाप्रसाद अधिकारीले प्राकृतिक रूपमा सम्पन्न लेखनाथमा बाटोघाटोलगायत पूर्वाधार विकासमा राज्यले चासो दिनुपर्ने आवश्यकता भएको बताए ।
पचभैया सामुदायिक वन उपभोक्ता समूहका अध्यक्ष दीनानाथ ढकालले लेखनाथ क्षेत्र अझैँ पनि सरकारको प्राथमिकतामा नपरेको बताउँदै राजनीतिक तहबाट आश्वासनभन्दा पनि कार्यान्वयनको पाटोलाई ध्यान दिन आग्रह गरे ।
