काठमाडौं– नेपाली कांग्रेसका प्रभावशाली नेता तथा पूर्वमन्त्री महेन्द्र यादवले नेकपा (एमाले) का वरिष्ठ नेता माधवकुमार नेपाललाई जननेताको संज्ञा दिएका छन् । नेता नेपालले पार्टीभन्दा माथि उठेर राजनीतिक व्यवस्था, संविधान, लोकतन्त्रको पक्षमा आफूलाई उभ्याएको र सोहीअनुसार भूमिका खेलेको यादवको भनाइ छ ।
सोमबार आयोजना गरेको साक्षात्कारमा बोल्दै उनले यस्तो बताएका हुन् । उनले भने, ‘माधव नेपालले पार्टीभन्दा माथि उठेर आफ्नो भूमिका निर्वाह गर्नुभयो । संविधान, व्यवस्था र कानुनको रक्षाको लागि अडान लिनुभयो । अब उहाँलाई एमालेले कारबाही गरेर उहाँको हाईट घट्दैन, बरु बढ्छ ।’ उनले नेपाललाई गिरिजाप्रसाद कोइरालासँग तुलना गरेका छन् । उनले भने, ‘जसरी गिरिजाबाबु सबैले भरोसा गर्न योग्य नेता हुनुहुन्थ्यो, अहिले माधव नेपालपनि त्यस्तै हुनुभएको छ ।’
उनले माधव नेपाल समूह पनि ढिलो÷चाँडो सरकारमा सहभागी हुने विश्वास दिलाए । उनले प्रधानमन्त्री शेरबहादुर देउवाले जुनसुकै बेला पनि मन्त्रिपरिषद् विस्तार गर्न सक्ने सुनाए । उनले भने, ‘मन्त्रिपरिषद् विस्तार जतिबेला पनि हुन सक्छ । अब धेरै ढिलो हुँदैन । प्रधानमन्त्रीज्यू गठबन्धनमा आवद्ध दललाई विश्वासमा लिएर अघि बढ्न चाहनुहुन्छ । यो सरकार संविधानको धारा ७६ को ५ अनुसार बनेको हो । त्यसैले उहाँ सबैलाई समेटेर अघि बढ्न चाहनुहुन्छ । राष्ट्रिय सरकार नै बनाउन चाहनुहुन्छ ।’ मन्त्रिपरिषद् विस्तारबारे अहिले गृहकार्य भइरहेको उनको भनाइ छ । उनले भने, ‘कांग्रेस अरु दललाई बिच्काउन चाहँदैन । उहाँहरूलाई पूरै सन्तुष्ट गरेर नै अघि बढ्छौँ । बरु, कांग्रेसले एक÷दुई वटा मन्त्रालय नै कम लिन्छ ।’
उनले कांग्रेसको क्रियाशिल सदस्यताको विवाद पनि समाधानको चरणमा रहेको सुनाए । उनले यो हप्ताभित्रै विवाद समाधान हुने दाबी गरे । उनले महाधिवेशन भदौको अन्तिम साताबाट प्रारम्भ भएर मंसिर÷पुससम्म सम्पन्न गरिसक्ने पनि सुनाए । उनले प्रधानन्त्री तथा पार्टी सभापति देउवाको पछिल्लो समय हाइट बढेको र विपीको स्थानमा पुग्न सक्ने पनि सुनाए । उनले भने, ‘अहिले प्रधानमन्त्रीज्यूप्रति जनताको सम्मान बढेको छ । उहाँको हाइट धेरै बढेको छ । उहाँ सबैले भरोसा गर्न योग्य व्यक्ति हो ।’
उनले प्रधानमन्त्री देउवा बन्नेबित्तिकै गच्छदारलाई उन्मुक्ति दिइएको भन्ने हल्लामा कुनै सत्यता नभएको पनि स्पष्ट पारे । उनले भने, ‘देउवाजी प्रधानमन्त्री हुनेबित्तिकै गच्छदारले उन्मुक्ति पाएका होइनन् । अदालतप्रति हामीले विश्वास गर्नुपर्छ ।’ उनले पार्टी सभापति देउवाले कहिल्यै पनि आलमलाई छुटाउने भनेर नभनेको पनि जिकिर गरे । उनले भने, ‘भोलि आलम रिहा भए पनि यसलाई सरकारसँग जोडेर हेर्नु हुँदैन । हामीले अदालतलाई विश्वास गर्नुपर्छ ।’
उनले पार्टीमा सभापति देउवा र वरिष्ठ नेता रामचन्द्र पौडेल अनुभवी र खारिएको नेता भएको पनि सुनाए । उनले आफूहरूलाई नेतृत्वमाथि पूर्ण विश्वास र भरोसा रहेको पनि सुनाए । उनले पार्टी सभापति देउवामा समन्वयकारी क्षमता भएको पनि सुनाए ।
