काठमाडौं– एक नेपाली युवा तुइनबाट तर्दै गर्दा भारतीय पक्षल तुइन काटिदिँदा बेपत्ता भएका युवाका सम्बन्धमा छानबिन गर्न गृह मन्त्रालयले समिति बनाएको छ । तुइन काटेर नेपाली नागरिकको हत्या गरिएको भन्दै सर्वसाधारण र केही राजनीतिक दलहरूले समेत व्यापक विरोध गरेपछि झारा टार्न गृह मन्त्रालयले एक समिति गठन गरेको हो ।
गत शुक्रबार व्याँस गाउँपालिका–२ मालका ३३ वर्षीय जयसिंह धामी तुइनबाट तर्ने क्रममा भारतीय सुरक्षा बल (एसएसबी)ले तुइन काटेपछि महाकालीमा खसेको प्रत्यक्षदर्शीहरूले बताउँदै आएका छन् । सो कुरा बाहिरिएपछि मन्त्रालयले आइतबार छानविन गर्न पाँच सदस्यीय समिति गठन गरेको मन्त्रालयका प्रवक्ता तथा सहसचिव फणिन्द्रमणि पोखरेलले जानकारी दिए ।
तर, यो कुरालाई नेपाली अधिकारीहरूले आधिकारिक रूपमा लिन इन्कार गर्दै आएका छन् । स्थानीय बहादुरसिंह धामीले घटना एसएसबीले तुइन काटेपछि भएको भन्दै छानबिन गर्न माग गरेर भारतीय प्रहरी चौकी पाङलामा निवेदनसमेत दिएका थिए ।
तर, शनिबार भारतको पिथौरागढका जिल्ला अधिकारी आनन्द स्वरूपले दार्चुलाका प्रमुख जिल्ला अधिकारी सिद्धराज जोशीलाई दिएको जवाफमा यस घटनामा एसएसबीको संलग्नता नरहेको दाबी गरेका छन् । बेपत्ता रहेका धामीको प्रहरीले खोजी गरिरहेको छ । तर उनी फेला पर्न सकेका छैनन् । आइतबार गृह मन्त्रालयका प्रवक्ता फणिन्द्रमणि पोखरेलद्वारा जारी विज्ञप्तिमा दार्चुला घटनाको छानबिन गर्नका लागि सहसचिव जनार्दन गौतमको संयोजकत्वमा एक समिति गठन गरिएको भनिएको छ । गौतमको संयोजकत्वमा सुदूरपश्चिम प्रदेशका डिआइजी पुरुषोत्तम कँडेल, राष्ट्रिय अनुसन्धान विभागका निर्देशक (डिआइजी) हुतराज थापा, सशस्त्रका एसएसपी सुरेशकुमार श्रेष्ठ र दार्चुलाका सहायक प्रमुख जिल्ला अधिकारी ज्योत्स्ना भट्ट सदस्य रहने गरी ५ सदस्यीय छानबिन समिति गठन गरिएको हो । घटनाबारे सत्यतथ्य बुझेर प्रतिवेदन पेस गर्न उनीहरूलाई १० दिनको समय दिइएको छ ।
यता, नेपाली अधिकारीहरूले भने प्रत्यक्षदशीहरूको भनाइलाई बेवास्ता गरिरहेका छन् । दार्चुलामा तुइनबाट तर्ने क्रममा महाकालीमा खसेर शुक्रबार एक पुरुष बेपत्ता भएपछि भारतीय सीमा सुरक्षा बल एसएसबीको संलग्नताबारे छानबिन भइरहेको छ । अनुसन्धानमा खटिएको टोलीले धामी तुइनबाट खसेको प्रष्ट प्रमाण फेला पारेको छैन भनिरहेको छ ।
