काठमाडौं– माधवकुमार नेपाललाई नेकपा एमालेमा स्विकार गर्न नसकिने अध्यक्ष केपी ओलीले घोषणा गरेका छन् । काठमाडौं जिल्ला कमिटीको बैठकलाई शनिबार सम्बोधन गर्दै उनले नेता नेपाललाई अपराधीको संज्ञा दिँदै उनलाई स्वीकार नगरिने बताए ।
उनले बाटो बिराएकालाई माफी दिने भनेको तर सबै नेतालाई नभनेको बताएका छन् । उनले भने, ‘बाटो बिराएको साथीहरू मुख्यमुख्य अपराधीहरूबाहेक सबैलाई स्वागत छ तर अब माधव नेपालजस्ता आन्दोलन विरोधी, देशद्रोहीलाई कुनै ठाउँ छैन ।’
उनले नेता नेपाललाई अपराधीको संज्ञा दिँदै प्रधानमन्त्री शेरबहादुर देउवालाई विश्वासको मत दिएका सांसदहरूलाई प्रतिक्रियावादीको मतियार बनेको आरोपसमेत लगाएका छन् । ओलीले विश्वासको मत दिनेबाहेकसँग पार्टी एकताका लागि नेताहरूसँग छलफल गरिहेकेको बताए । अरु गल्ती महशुस गरेर फर्किए पार्टीमा ठाउँ दिने र पार्टीमा नआउने छुट्दै जाने उनको भनाइ छ ।
वामपन्थी सरकार ढाल्ने, दक्षिणपन्थी सरकार बनाउने, दक्षिण पन्थीको पक्षमा फ्लोर क्रम गरेर मत हाल्ने, आफ्नो पार्टीको प्रधानमन्त्रीले विश्वासको मत माग्दा २७ जना बाहिर लिएर गएर पार्टीको सरकार ढाल्ने, अनि दक्षिणपन्थी सरकार बनाएर फ्लोर क्रस गर्नेहरूलाई माफी नदिने बताए ।
अध्यक्ष ओलीले माधव नेपालप्रति आक्रोश व्यक्त गर्दै भने, ‘यस्ता प्रतिक्रियावादीहरूका मतियारका लागि पार्टीमा ठाउँ छैन ।’ उनले माधव नेपाल पक्षका अन्य नेताहरूलाई भने पार्टीका आउन पुनः आह्वान गरे । ‘अरू साथीहरू गल्ती महसुस गरेर फर्कनु हुन्छ भने हामी मौका दिन्छौँ । आउनुहोस्, यो पार्टी हामी सबैले बनाएका हौँ’, अध्यक्ष ओलीले थपे, ‘गल्ती भइहाल्यो भने पनि त्यसलाई सच्याएर आउनुहोस्, काम गरौँ ।’
उनले माधव नेपाल पक्षमा नेताहरू नआए पनि चिन्ता गरेर बस्नुपर्ने अवस्था आफूहरूका लागि नरहेको दाबी गरेका छन् । अध्यक्ष ओलीले आगामी निर्वाचनमा आफ्नो पार्टीले बहुमत ल्याएर देखाउने दाबीसमेत गरे । पार्टीमा खुट्टा तान्ने तत्वहरू अब पार्टीभित्र नरहेकाले बहुमत ल्याउन सकिने उनको तर्क थियो ।
‘अबको निर्वाचनमा बहुमत ल्याएर देखाउँछौँ किनभने पार्टीमा खुट्टा तान्ने तत्वहरू छैनन् । अगाडि बढ्न खोज्यो, खुट्टा तान्ने, उम्मेदवार बनाउन खोज्यो नजित्नेलाई अघि सार्ने, जो पार्टीप्रति समर्पित छैन । उसलाई उम्मेदवारको रूपमा अघि सार्नु पर्छ भन्ने,’ उनले भने, ‘अहिले फ्लोर क्रस गरेर शेरबहादुर देउवाका पछिपछि कुद्ने छन् नि, यस्ता तत्वहरू नभएपछि पार्टीले स्पष्ट बहुमत ल्याउनेछ ।’
