काठमाडौं– यसअघि प्रधानमन्त्री शेरबहादुर देउवाकै पालामा नेपालमा पारित गराउनका लागि प्रस्तुत भएको मिलिनियम च्यालेन्ज कर्पोरेसन (एमसिसी) सम्झौतालाई रोक्न काठमाडौंमा बृहत जुलुस गरिएको छ ।
राजावादीहरूको संस्था ‘वीर गोर्खाली’ले काठमाडौंको माइतीघर मण्डलामा मंगलबार दिउँसो १ बजेबाट ३ बजेसम्म दुई घन्टा एमसिसीविरुद्ध विरोध तथा धर्ना कार्यक्रम आयोजना ग¥यो ।
वीर गोर्खालीका अध्यक्ष वसन्तविक्रम पाण्डेको नेतृत्वमा आयोजना गरिएको सो धर्ना कार्यक्रममा सहभागीहरूले एमसिसीविरुद्धको प्लेकार्ड, ब्यानर प्रस्तुत गर्दै जुलुस नारा लगाएका थिए ।
एमसिसी देशका लागि साह्रै नै घातक भएको दाबी गर्दे यसलाई नेपालमा पारित नगराउन उनीहरूले सो कार्यक्रममा दबाब दिएका थिए । ‘देश डुब्न लागिसक्यो, राजा हामीलाई चाहिसक्यो’ सहित एमसिसीविरुद्ध विभिन्न नाराहरू उनीहरूले सो क्रममा लगाएका थिए ।
विरोध सभामा वीर गोर्खालीका करिब एक हजार सदस्यहरू सहभागी भएका थिए । सो धर्ना कार्यक्रमसँगै वीर गोर्खालीले मंगलबारै प्रधानमन्त्री देउवालाई नेपालमा एमसिसी सम्झौता नगर्न मागसहितको ज्ञापनपत्र बुझाएको छ । वीर गोर्खालीका अध्यक्ष पाण्डेको संयोजकत्वमा सो संगठनका तर्फबाट ज्ञापनपत्र बुझाइएको हो ।
धर्ना सभालाई समापन गर्दै अध्यक्ष पाण्डेले नेपालजस्तो गरिब मुलुकमा एमसिसी सम्झौता गर्नु देशकै लागि घातक हुने बताएका छन् । उनले भने, ‘यो धनी देशका लागि बनाइएको सम्झौता हो, हाम्रोजस्तो गरिब मुलुकमा यस्तो सम्झौता गरिए मुलुक झन् खतम हुन्छ ।’
उनले बिगतमा विभिन्न देशले एमसिसी सम्झौता गर्दा ती देशले भोग्नु परेको समस्या र देशमाथि भएको घातबारे पनि उनले कार्यक्रममा प्रकाश पारे । सोही कारण पनि आफूहरू एमसिसीलाई नेपालमा लागू हुन कुनै पनि हालतमा नदिने पक्षमा रहेको पनि उनले सो कार्यक्रममा बताए ।
