काठमाडौं– नेपाली कांग्रेसका सभापति शेरबहादुर देउवाले महाधिवेशनको मिति कुनै पनि हालतमा नसर्ने बताएका छन् । बुधबार सभापतिको निजी निवास बूढानीलकण्ठमा बसेको कांग्रेसका पदाधिकारी, पूर्वपदाधिकारी बैठकमा सभापति देउवाले यस्तो बताएका हुन् ।
नेपाली कांग्रेसले आगामी १६ भदौमा महाधिवेशनको मिति तोकिसकेको छ । यसका लागि मंगलबारदेखि सुरु हुने भनिएको वडा अधिवेशनमा भने स्थगित गरिएको अवस्था छ । अधिवेशन स्थगित गरिएपछि अब महाधिवेशन प्रभावित हुने भनिरहेको बेला सभापति देउवाले १६ गतेको कार्यतालिका प्रभावित नहुने गरी कार्यतालिका ल्याउनु भनेका छन् ।
यता, महाधिवेशन निर्धारित मितिमै हुने वरिष्ठ नेता रामचन्द्र पौडेलले पनि बताएका छन् । नेता पौडेलले केही अनलाइन संस्करणहरूसँग पार्टीको १४औँ महाधिवेशन निर्धारित मितिमै हुने दाबी गरेका छन् । उनले महाधिवेशन सार्ने विकल्प सोच्नसमेत नसकिने बताए ।
तर, कांग्रेसको निर्धारित कार्यतालिका अनुसार मंगलबार नै वडा अधिवेशन हुनुपर्ने भए पनि सो कार्यक्रम स्थगित गरिएको छ । त्यस्तै, आगामी १६ साउनमा पालिका अधिवेशन हुनुपर्ने भनिए पनि सो कार्यक्रम पनि अब प्रभावित हुने निश्चित छ । यस्तो अवस्थामा पनि महाधिवेशनको मिति नसर्ने भनिरहँदा कतिपय कांग्रेसका नेताहरू पनि विश्वास गर्न सकेका छैनन् ।
यता, सभापति देउवा र वरिष्ठ नेता पौडेलले महाधिवेशन नसर्ने बताइरहँदा कांग्रेस पदाधिकारी तथा पूर्वपदाधिकारीको बैठकले भने कोरोनाको अवस्था हेरेर महाधिवेशन सम्बन्धी निर्णय लिइने सहमति गरेको छ । कोरोनाको अवस्थाको हेरेर महाधिवेशनको कार्यतालिका संशोधन गर्ने सम्बन्धमा निर्णय लिने भएको बताइन्छ ।
बैठकपछि पत्रकारहरूसँग कुरा गर्दै पार्टी प्रवक्ता विश्वप्रकाश शर्माले कोरोनाको अवस्थाका बारेमा जिल्लाका नेताहरूसँग पनि छलफल गरिने बताएका छन् । तर, अहिले नै महाधिवेशनको कार्यतालिका परिवर्तनका सन्दर्भमा कुनै निर्णय नभएको उनको भनाइ थियो । यसका लागि बिहीबार अपराह्न बस्ने बैठकले केही ठोस निर्णय लिने बताइएको छ । उनका अनुसार देशव्यापीरूपमा कोरोनाको अवस्था के छ ? जिल्लाबाट सुझाव लिएर यसबारे निर्णय लिइने प्रवक्ता शर्माले बताए ।
यता, कांग्रेस सक्रिया सदस्यता विवाद अझै साम्य हुन सकेको छैन । सभापति देउवाले केन्द्रीय क्रियाशील छानबिन समितिलाई नै क्रियाशील सदस्यताको प्रतिवेदन थप अध्ययन गरी २४ घन्टाभित्र परिस्कृत बनाएर ल्याउन भनेका छन् । केन्द्रीय सदस्यसमेत रहेका लेखक नेतृत्वको छानबिन समितिले सभापति देउवालाई मंगलबार क्रियाशीलको प्रतिवेदनसम्बन्धी अपूरो प्रतिवेदन दिएको थियो । सो अपूरो प्रतिवेदनलाई पूरा गरेर ल्याउन बैठकले छानबिन समितिलाई नै थप समय दिएको हो । क्रियाशीलको प्रतिवेदनबारे छानबिन समितिकै सदस्य कल्याण गुरूङले फरक मत राखेपछि सोही प्रतिवेदन सभापतिलाई बुझाइएको थियो ।
कागजातबिनै कतिपय क्षेत्रमा क्रियाशील दिइएको पाइएपछि सदस्य गुरुङले असन्तुष्टि जनाएका थिए । गत फागुनमा क्रियाशील सदस्यता छानबिन गर्न केन्द्रीय कार्यसमितिले लेखकको नेतृत्वमा समिति गठन गरेको थियो । कांग्रेसमा क्रियाशीलबारे करिब पाँच हजार उजुरी परेका थिए । लेखक नेतृत्वको समितिले नवीकरणतर्फ ७७ जिल्लाकै र नयाँ क्रियाशीलतर्फ ७५ जिल्लाको प्रतिवेदन सभापति देउवालाई बुझाएको थियो ।
क्रियाशील सदस्यता छानबिन समितिले बारा र सप्तरीका नयाँ क्रियाशीलबारे छानबिन नै गरेको थिएन । यी जिल्लाका पुराना क्रियाशीलको भने सदस्यता नवीकरण भएका छन् ।
प्रधानमन्त्रीको आलोचना
सत्तारुढ गठबन्धनको बैठकले प्रधानमन्त्री देउवाको पछिल्लो गतिविधिलाई लिएर आलोचना भएको छ । उनले उमेश श्रेष्ठलाई राज्यमन्त्री बनाएपछि गठबन्धनमा व्यापक असन्तुष्टि उत्पन्न भएको हो ।
बुधबार प्रधानमन्त्री निवास बालुवाटारमा सत्तारूढ गठबन्धनको बैठकमा स्वास्थ्य राज्यमन्त्रीमा श्रेष्ठको नियुक्तिलाई लिएर बैठकमा लगभग सबैले असन्तुष्टि व्यक्त गरेपछि प्रधानमन्त्री देउवाले छलफल गर्दै गरौँला भनेका थिए । महामारीको बेला गठबन्धनमा सल्लाह नै नगरी स्वास्थ्य राज्यमन्त्री बनाइएको भन्दै बैठकमा व्यापक असन्तुष्टि जनाउने काम भएको छ । गठबन्धन संस्कृतिमा सरसल्लाह नगरी निर्णय गर्ने कुराले राम्रो नतिजा नल्याउने नेताहरूले बताएपछि बैठकमा निक्कै गर्मागर्मीजस्तै भएको बताइन्छ ।
राष्ट्रिय जनमोर्चाका नेता चित्रबहादुर केसीले पनि उमेश श्रेष्ठ नियुक्तिको विरोध गरेका थिए । त्यसमा माओवादीका तर्फबाट प्रवक्ता नारायणकाजी श्रेष्ठले पनि असन्तुष्टि जनाएको बताइन्छ । गठबन्धनका अधिकांश नेताहरूले विरोध गरेपछि प्रधानमन्त्री देउवाले आगामी दिनमा गठबन्धनसँग सल्लाह गरेर मात्र नियुक्ति गर्ने बताएको बताइन्छ ।
उपस्थित अरू नेताहरूले पनि यसबारे आलोचना गरेपछि प्रधानमन्त्री देउवाले शिक्षा लिँदै जाने बताएका थिए । त्यसपछि भने देउवाले आफ्नै साथीहरूले समेत विरोध गरेको भन्दै सल्लाह गर्दै जाने बताएका थिए ।
