काठमाडौं– नेपाली कांग्रेसको क्रियाशील सदस्य विवादसम्बन्धी अपूरो प्रतिवेदन पार्टी सभापति शेरबहादुर देउवालाई बुझाइकाएको छ । विवादित क्रियाशील सदस्यताबारे छानबिन गर्ने जिम्मेवारी पाएको केन्द्रीय क्रियाशील सदस्यता छानबिन समितिले मंगलबार ‘अपूरो’ प्रतिवेदन बुझाएको हो ।
यो समितिको संयोजकमा केन्द्रीय सदस्य रमेश लेखक थिए। सदस्यहरू आनन्दप्रसाद ढुंगाना, श्यामकुमार घिमिरे, प्रदीप पौडेल, कल्याण गुरूङ, जीवन परियार र योगेन्द्र चौधरी थिए । गत ६ फागुनमा कांग्रेस केन्द्रीय कार्यसमितिले लेखकको नेतृत्वमा क्रियाशील छानबिन समिति बनाएको थियो । पाँच महिनामा यो विवाद समाधान गर्न पटकपटक म्याद लिए पनि सो विवादलाई किनारा लगाउन नसकेपछि मुख्य विवाद छाडेर समितिले प्रतिवेदन बुझाएको छ ।
मंगलबार बुझाइएको प्रतिवेदनमा ८ लाख ५२ हजार क्रियाशील सदस्य रहेको देखाइएको छ । तर, सो प्रतिवेदनमा विवाद भएका जिल्लाहरू धनुषा, सर्लाही, बारा र सप्तरीको नयाँ क्रियाशील सदस्यको संख्या भने यसमा समावेश छैन ।
क्रियाशील सदस्यको संख्या दोब्बर बनाउने योजनका साथ अघि बढेको कांग्रेसले आफ्नो योजनाअनुुरूपम काम गरेको देखिन्छ । १३औँ महाधिवेशनमा चार लाख ८० हजार रहेको क्रियाशील सदस्यको संख्या १४औँ महाधिवेशनको ठीक अघि ८ लाख ५२ हजार पु¥याइएको छ । कांग्रेसका अनुसार विवादित जिल्लामा करिब १ लाख सदस्य रहेकाले कांग्रेसले आफ्नो योजनालाई पूरा गरेको छ ।
कांग्रेसको विधानअनुसार क्रियाशील सदस्य वडा अधिवेशनका मतदाता हुन् र उनीहरूबाटै क्षेत्रीय प्रतिनिधि चुनिएर महाधिवेशनका लागि प्रतिनिधि बन्छन् र केन्द्रीय कार्यसमिति बनाउँछन् । समितिका संयोजक रमेश लेखकले मंगलबार सभापति देउवालाई बुझाएको प्रतिवेदनमा चार लाख ४३ हजार छ सय ७८ जना नयाँ क्रियाशील वितरण गरिएको उल्लेख छ ।
संयोजक लेखकका अनसार ७७ जिल्लाकै नवीकरणको काम सकिएको छ । नयाँतर्फ ७५ जिल्लामा क्रियाशील टुंगिएको र बाँकी दुई जिल्लामा विवाद छ ।
प्रतिवेदनमा विदेशस्थित जनसम्पर्क समितिबाट प्राप्त क्रियाशीलको विवरणसमावेश गरेको छैन । प्रतिवेदनअनुसार कांग्रेसमा ६ लाख ५३ हजार ८ सय ३८ जना पुरूष क्रियाशील छन् भने महिला एक लाख ९९ हजार ९७ जना छन्। अन्यतर्फ भने १७६ जना छन् । उमेरअनुसार हेर्दा १६ देखि २५ वर्ष उमेर समूहका ४० हजार चार सय २७ जना क्रियाशील छन् । २६ देखि ४० वर्षसम्मका २ लाख ४९ हजार ७ सय ७४ जना छन् । कांग्रेसमा यसपटक युवाको आकर्षण देखिएको छ ।
४१ देखि ६० वर्ष उमेर समूहका धेरै क्रियाशील छन् । तीन लाख २८ हजार दुई सय ३४ जना क्रियाशील यो समूहबाट छन् । यस्तै ६१ देखि ७५ वर्ष उमेरका ८३ हजार १० जना छन् भने ७५ वर्षभन्दा माथिका ११ हजार ७ सय ८२ जना मात्रै छन् ।
अल्पसंख्यकतर्फ ६ हजार ८ सय २९ जना क्रियाशील छन् । मधेसीतर्फ ९५ हजार १ सय ४१, मुश्लिम १६ हजार ९ सय ७०, थारूतर्फ २७ हजार ६ सय १५, अपांगता भएकातर्फ दुई सय १, पिछडिएको क्षेत्रबाट १४ हजार ९ सय १४, आदिवासी जनजाति २ लाख ८ हजार एक सय ५९, खसआर्य तीन लाख ६७ हजार ६ सय ११, दलित ४५ हजार चार सय १७ जना छन् ।
प्रदेश नम्बर १ मा एक लाख ७४ हजार सात सय ८२ जना क्रियाशील छन् । प्रदेश नम्बर २ मा एक लाख १२ हजार ९ सय ४६, वागमती प्रदेशमा एक लाख ८६ हजार एक सय ४३, गण्डकी प्रदेशमा एक लाख १८ हजार ६ सय ३३ जना, लुम्बिनी प्रदेशमा एक लाख ३० हजार ८ सय ८५, कर्णाली प्रदेशमा ५४ हजार ५ सय ६६ र सुदुरपश्चिम प्रदेशमा ७४ हजार ७ सय ५६ जना क्रियाशील छन् ।
