गुल्मी– नेपाली कांग्रेसका सहमहामन्त्री डा.प्रकाशशरण महतले लोकतान्त्रिक मूल्यमान्यता शासन स्थापित गर्न नसकेका कारण ओली सरकार बहिर्गमन हुनुपरेको बताएका छन् ।
नेपाली कांग्रेस गुल्मीले सोमबार बिपी स्मृति भवन तम्घासमा आयोजना गरेको पार्टी कार्यकर्ता भेटघाट कार्यक्रममा उनले यस्तो बताएका हुन् । नेता महतले भने, ‘लोकतान्त्रिक मूल्य मान्यता, विधिको शासन एवं भ्रष्टाचारमुक्त र जनता केन्द्रित शासन स्थापित गर्न नसकेका कारण ओली सरकारको अन्त्य भएको हो ।’
नेपाली कांग्रेसलाई अहिले अनपेक्षितरूपमा सरकार सञ्चालनको अवसर प्राप्त हुनुमा ओली सरकारको ज्यादति नै प्रमुख कारण भएको उनको भनाइ थियो । उनले नेपाली कांग्रेसको नेतृत्वको सही समयमा सही निर्णय गर्ने सुझबुझ र परिपक्वताले मुलुकमा विधिको शासनलाई स्थापित गर्न मद्दत पुगेको पनि बताए । डा महतले भने, ँधैर्यता, संयमता र सुझबुझपूर्ण तरिकाबाट जसरी सत्ता सञ्चालनको जिम्मेवारी पाएका हौँ ।’
उनले सत्ता पाउनु मात्र ठूलो नभएको भन्दै त्यसलाई संयमित रूपमा शासन सत्ता सञ्चालन गर्नुपर्ने धारणा राखे । उनले कांग्रेसको सरकारलाई कहीँकतै पनि प्रश्न गर्ने ठाउँ दिन नहुने बताए ।
नेपाली कांग्रेस विधि र संविधानमा विश्वास गर्ने पार्टी भएका कारण जनताले यो सरकारप्रति ठूलो अपेक्षा गरेको भन्दै नेता डा.महतले उक्त अपेक्षालाई पूरा गर्न पनि वर्तमान सरकारलाई कहीँकतै त्रुटि नगरी सजग भएर पाइला चाल्नुपर्ने बताए । उनले मुलुक सञ्चालन गर्नका लागि इमान, सीप र समपर्ण चाहिने भन्दै त्यो कुरा नेपालका कम्युनिष्टहरूमा नदेखिएको आरोप पनि लगाए । उनले जनताका चाहना र अपेक्षा बुझेर नै वर्तमान सरकारले काम गर्ने पनि बताए ।
कार्यक्रममा नेपाली कांग्रेसका नेता एवं केन्द्रीय सदस्य डा.चन्द्र भण्डारीले यो अवस्थामा नेपाली कांग्रेसको काँधमा सरकार सञ्चालनको जिम्मेवारी आउनु भनेको अवसर र चुनौती दुवै उत्तिकै रहेको भन्दै यो अग्नि परीक्षामा खरो उत्रिनुपर्ने बताए ।
कार्यक्रममा नेपाली कांग्रेस गुल्मीका पार्टी सभापति भुवनप्रसाद श्रेष्ठले व्यक्तिभन्दा माथि उठेर मुलुक र पार्टीका लागि लाग्न नेतृत्व पंक्तिलाई सुझाव दिए ।
कार्यक्रममा पाटी नेता तथा कार्यकर्ताले पार्टीको आसन्न निर्वाचन, पेशागत समस्या, सरकार गठन प्रक्रिया र आउँदो निर्वाचनलगायतका विषयमा आफ्ना धारणा राखेका थिए ।
