काठमाडौं– नेकपा (एमाले) का स्थायी कमिटी सदस्य तथा पूर्व उपप्रधानमन्त्री रघुवीर महासेठले माधव नेपाललाई अध्यक्ष केपी ओलीसरहको जिम्मेवारी दिने सम्भावना शून्य रहेको दाबी गरेका छन् । उनले भने, ‘कुनै पनि हालतमा माधव कमरेडलाई इक्वेल अध्यक्ष दिइँदैन । यो सम्भावना शून्य छ । बरु आकाश खस्ला तर पार्टीमा बराबरको दुई अध्यक्ष हुन सक्दैनन् । हाम्रो पार्टीको विधानले पनि त्यो मिल्दैन ।’
सोमबार आयोजना गरेको विशेष साक्षात्कारमा बोल्दै नेता महासेठले यस्तो बताएका हुन् । उनले अहिले माधव नेपाललाई अध्यक्ष दिने गरी पावर सेयरिङमा छलफल भइरहेको भनेर बाहिर चर्चा भए पनि त्यस्तो कुनै सम्भावना नभएको जिकिर गरेका छन् ।
उनले नेपाललाई आम कार्यकर्ताले जस्तो मिडिया फे िगर्नुभन्दा पनि लो–प्रोफाइलमा बस्न सुझाव दिए । उनले भने, ‘एमालेमा मैले सबैभन्दा बढि सम्मान र माया गर्नै नेतामा माधव कमरेड नै हो । अहिले पनि गर्छु । एकताका लागि गम्भीर बन्नुहोस् । एकताको विकल्प छैन ।’
नेता महासेठले एमालेको एकताको विकल्प नभएको भन्दै ढिलो÷चाँडो एकता भइछाड्ने पनि दाबी गरे । उनले नेकपा (एमाले) बनाउनका लागि नेपालको ठूलो भूमिका रहेको भन्दै आफ्नो पार्टीलाई कमजोर बनाउने गतिविधिमा नलाग्न पनि आग्रह गरे । उनले अहिले देशी तथा विदेशी र प्रतिक्रियावादी शक्तिहरू एमालेको एकता नहोस् भनेर हात धोएर लागिपरेको भन्दै यसप्रति सबै नेता तथा कार्यकर्ताहरू सचेत हुनुपर्ने धारणा राखे ।
उनले एमालेमा फर्किँदा कतै नेता तथा कार्यकर्ताले अपमान गर्छन् कि भन्ने चिन्ता नलिन पनि आग्रह गरेका छन् । उनले एमाले कुनै पनि हालतमा विभाजन नहुने जिकिर गरे । अहिले एमालेको तल्ला तहदेखि माथिल्लो तहसम्मले अध्यक्ष ओली र वरिष्ठ नेता नेपाललाई एकताका लागि दबाब दिएको पनि स्मरण गराए । नेता महासेठले अहिले पार्टी एकताको लागि अध्यक्ष ओली र वरिष्ठ नेता नेपाल दुवै जना आन्तरिक छलफलमा रहेको पनि सुनाए ।
नेता महासेठले एमाले वरिष्ठ नेता नेपाल र माओवादी केन्द्रका अध्यक्ष पुष्पकमल दाहालले संसद् बचाउनका लागि आफूहरूले यो कदम उठाएको भनेर कांग्रेस सभापति शेरबहादुर देउवालाई प्रधानमन्त्री बनाइएकोबारे टिप्पणी गर्नुमा पनि कुनै सत्यता नभएको दाबी गरे ।
उनले एमाले एकताको विकल्प नभएको भन्दै यसको लागि सबै जिम्मेवारी हुनुपर्ने धारणा राखे । उनले नेपाल पक्षको एक्सन नेपाली जनता र पार्टी पँक्तिले वाच गरेको पनि सुनाए । उनले पार्टी एकताको प्रयास भइरहेको बेला एकले अर्को समूहमाथि गालीगलौज गर्ने र शक्ति प्रदर्शन गर्ने काम गर्दा बनिरहेको वातावरण र विश्वासमा संकट पैदा हुने बताए ।
उनले युवा संघ र युथफोर्स पार्टीकै जनवर्गीय संगठन भए पनि अहिले प्रभु साहको नेतृत्वमा गठन गरिएको आइटी आर्मीको औचित्य नै नभएको र पार्टीले नचिन्ने टिप्पणी गरे ।
उनले प्रतिनिधिसभा विघटनसम्बन्धी सर्वोच्च अदालतको संवैधानिक इजलाशले हालै दिएको फैसलाप्रति आफूहरूको रिजर्भेसन रहेको भए पनि आत्मासात् गरिएको सुनाए । उनले सर्वोच्च अदालतको फैसलामा प्रत्येक वाक्यमा राजनीतिक भाषा राखिएको पनि टिप्पणी गरे । उनले सर्वोच्चले संसद पुनस्र्थापना मात्रै गरिदिएको भए जनताले पनि यसमा कुनै आपत्ति जनाउने थिएनन् भन्ने धारणा राखे ।
नेता महासेठले कांग्रेस सभापति देउवा प्रधानमन्त्री बनेको दुई हप्ता बितिसक्दा पनि अझैसम्म मन्त्रिपरिषद विस्तार गर्न नसकेकोमा प्रधानमन्त्रीको आलोचना गरे । उनले कांग्रेस, माओवादी केन्द्र, जसपाको उपेन्द्र यादव, एमालेको नेपाल समूह र जनमोर्चाको गठबन्धन धेरै लामो समय नजाने ठोकुवा गरे ।
उनले राष्ट्रपति विद्यादेवी भण्डारीमाथि महाभियोग लगाउने हल्ला पनि चलेको उल्लेख गर्दै यस्तो सपना नदेख्न चेतावनी दिएका छन् । उनले भने, ‘राष्ट्रपतिमाथि महाभियोग लगाउने हल्ला यो त प्रोपोगान्डामात्रै हो । यो सम्भव छैन । महाभियोग लगाउन त्यति सजिलो छैन । त्यति सजिलो भएको भए महाभियोग पहिल्यै आउँथ्यो ।’
उनले कांग्रेस, माओवादी केन्द्रलगायत दलका नेताहरूलाई राष्ट्रपतिमाथि महाभियोग लगाएर मात्रै हेर्न चुनौती दिए ।
नेता महासेठले आगामी चुनावसम्म ओली, नेपाल र दाहाल एकै ठाउँमा उभिने पनि खुलासा गरे ।
उनले निवर्तमान प्रधानमन्त्री ओलीले साढे तीन वर्षको अवधिमा धेरै राम्रो काम गरेको दाबी गरे । उनले ८०/९० प्रतिशत राम्रो काम गरेको दाबी गरे । तर, काम गर्दै जाँदा दुई/चार वटा गल्ती भएको होला भन्ने उनको भनाइ थियो । उनले वर्तमान प्रधानमन्त्री जनादेशबाट नभई परमादेशबाट आएकोले लक्षण राम्रो नदेखाएको टिप्पणी गरे ।
