काठमाडौं– सरकार समर्थित गठबन्धन बलियो पथतिर अघि बढेको छ । खासमा गठबन्धनमा एमालेकै असन्तुष्ट पक्षले धोका दिएमा गठबन्धन कमजोर हुने भनिएको बेला एमाले अध्यक्ष केपी ओलीसँग विद्रोह जारी राखेका वरिष्ठ नेता माधवकुमार नेपाल फेरि गठबन्धनको बैठकमा सामेल हुन थालेपछि गठबन्धन बलियोतिर अघि बढेको हो ।
शनिबार साँझ बालुवाटारमा भएको गठबन्धनको बैठकमा नेता नेपालले सहभागिता जनाएका छन् । यसअघि उनले एकपटक आफ्ना विश्वास पात्र विजय पौडेललाई गठबन्धनको बैठकमा पठाएका थिए भने त्यसपछि गोप्य रूपमा बसेको गठबन्धनको बैठकमा देउवालाई विश्वासको मत दिने प्रतिवद्धता नेपालले जनाएका थिए ।
बैठकमा मन्त्रिपरिषद् विस्तार, गठबन्धन सरकारको न्यूनतम् साझा कार्यक्रमलगायत विषयमा छलफल भएको बताइन्छ । सरकार गठन भएको एक हप्ताभन्दा बढी समय भइसकेको र प्रधानमन्त्रीले विश्वासको मत लिइसकेको अवस्थामा पनि मन्त्रिपरिषद् विस्तार हुन सकेको छैन । माओवादी केन्द्रका अध्यक्ष दाहालले शनिबार प्रधानमन्त्री देउवा र नेकपा एमालेका नेता नेपालसँग भेट गरेका थिए ।
शनिबारको गठबन्धनको बैठकमा नेपाल सामेल भएसँगै ओलीसँग उनको एकता अझै टाढिँदै गएको चर्चा चल्न थालेको छ । गठबन्धनको बैठकमा प्रधानमन्त्री एवं नेपाली कांग्रेस सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल। जसपाका नेता उपेन्द्र यादव, राष्ट्रिय जनमोर्चाका अध्यक्ष चित्रबहादुर केसी सहभागी थिए । गठबन्धन र सरकार दुवैलाई कसरी प्रभावकारी ढंगबाट अगाडि बढाउन सकिन्छ भन्नेमा बैठक केन्द्रित रहेको बताइएको छ ।
नेता नेपालले हिजो मात्रै ओलीलाई अझै नसुध्रिएको, तर्साउन खोजेको र आफूहरूलाई आममाफी दिन्छु भन्दै श्री ५ सरकारको जस्तो हुकुमी शैली प्रदर्शन गरेको आरोप लगाएका थिए । ओलीले केही दिनअघि आफू पक्षीय केन्द्रीय कमिटी बैठकमा नेपाल र उनी समर्थक खासगरी देउवालाई विश्वासको मत दिने सांसदहरूलाई गल्ती गरेको भए पनि आममाफी दिने घोषणा गरेका थिए ।
नेपालसहित २२ जना सांसदहरूले देउवालाई विश्वासको मत दिएपछि ओली र नेपालबीच झनै तिक्तता बढेको छ । यो बीचमा दोस्रो तहका नेताहरूले नेपाल र ओलीबीच सहमति गराउने दाबी गरेपनि उनीहरू असफल भइरहेका छन् ।
यता, नेकपा माओवादी केन्द्रका अध्यक्ष दाहालले वर्तमान सत्ता गठबन्धन टुटाउन ठूलो कसरत भइरहेको बताएका छन् । नेकपा एमालेकै एक पक्षलाई लक्षित गर्दै दाहालले नपत्याउँदो किसिमले गठबन्धनलाई टुटाउन सकिन्छ कि भनेर कसरत भइरहेको बताएका हुन् । स्व. नरबहादुर कर्माचार्यको आठौँ स्मृति दिवसको अवसरमा पेरिसडाँडामा आयोजित कार्यक्रममा बोल्दै दाहालले शनिबार एमालेभित्रै ‘आममाफी’ घोषणालाई पनि त्यो कसरतभित्र देख्न सकिने बताए ।
‘एमालेभित्र फर्माम घोषणा भएको छ, कहाँ प्वाल छ भनेर प्रतिक्रियावादीहरूले टर्च बालेर हेरिरहेका छन्,’ दाहालले भने, ‘एमसिसी, आइटिएसले पो झगडा पारिदेला कि भनेर अनेक किसिमका कसरत भइरहेका छन् ।’
