काठमाडौं– नेपाल कम्युनिस्ट पार्टी एमालेका केही सांसदहरूले फ्लोर क्रस गर्दै प्रधानमन्त्री शेरबहादुर देउवालाई मत दिए पनि उनीहरूले आममाफी पाएका छन् ।
गत हप्ता फ्लोर क्रस गर्दै प्रधानमन्त्री देउवालाई मत दिनुलाई अक्षम्य अपराधको संज्ञा दिएका एमालेका अध्यक्ष केपी ओलीले पुष्पलाल स्मृति दिवसको अवसरमा बिहीबार आयोजित कार्यक्रममा बाटो बिराएका नेताहरूलाई ‘आममाफी’ दिने घोषणा गरेका हुन् ।
यसअघि बालुवाटारबाट बाहिरिएर आफ्नै निजी निबास बालकोट पुगेपछि दिएको मन्तव्यमा उनले सोही पक्षधरहरूलाई गद्दार घोषणा गर्दै उनीहरूलाई कुनै पनि हालतमा पार्टीमा स्थान नदिने बताएका थिए । तर, बिहीबार अध्यक्ष ओलीले यु टर्न गर्दै भने, ‘बाटो बिराएका भड्किएका साथीहरूलाई पनि आग्रह गर्न चाहन्छु, यस पार्टी र आन्दोलनको एकताका लागि पुष्पलाललाई सम्झिएर भन्न चाहन्छु, सबैलाई एम्नेस्टी इज ग्रान्टेड । जे सुकै भएको होस्, एम्नेस्टी । आउनुस् मिलेर काम गरौँ ।’
यो कार्यक्रम लगतै बसेको केन्द्रीय कमिटी बैठकले पार्टी एकताको प्रयासलाई निरन्तरता दिने निर्णय गरेको बताइएको छ । पार्टी एकताका लागि तत्कालीन कार्यदलका सदस्यहरूबीच संवाद भइरहेको भन्दै एमाले प्रवक्ता प्रदीप ज्ञवालीले यो प्रयासलाई अझ थप निरन्तरता दिने र कमसेकम नेतृत्वको तर्फबाट पार्टीका सबै साथीहरूलाई समेट्ने मामिलामा अधिकतम् प्रयत्न गर्ने निष्कर्ष निकालिएको बताएका छन् ।
बैठकलाई सम्बोधन गर्दै एमाले अध्यक्ष ओलीले पनि पार्टीमा योगदान गर्न चाहनेहरूलाई विगतको गल्तीबाट उन्मुक्ति दिई काम गर्ने वातावरण निर्माण गर्ने बताए ।
सोमबार सुरु भएको केन्द्रीय कमिटीको पहिलो बैठकले नै माधव नेपालसहित फ्लोर क्रस गर्ने २२ सांसदलाई २४ घन्टे स्पष्टीकरण सोध्ने निर्णय गरेको थियो । बैठकलाई सम्बोधन गर्दै ओलीले गल्ती कमजोरी स्वीकार गरे आए अरुलाई ठाउँ लिने, तर माधव नेपाललाई एमालेमा स्थान नभएको बताएका थिए । तर, बिहीबार पुष्पलाल स्मृति दिवसको कार्यकममा करिब एक घन्टा लामो सम्बोधन गरेका ओलीले एमालेलाई कसैले रोक्न नसक्ने बताएका छन् । पुष्पलालले रोपेको र मदन भण्डारीले स्याहार सुसार र प्रवलीकरण गरेको भन्दै उनले भने, ‘यो कर्कलोको पातको पानी होइन, कसैले हल्लाउँदैमा भुँइमा खस्छ ।’
निवर्तमान प्रधानमन्त्री समेत रहेका ओलीले आफ्नो पार्टी नेतृत्वको सरकार ढाल्न दुनियाँ लाग्दा पनि खुट्टासमेत हल्लाउन नसकेको र अदालतको परमादेशबाट हराइएको बताएका छन् । त्यसका बाबजुद स्थानीय तह, प्रदेश र संघीय संसदमा एमाले प्रमुख शक्ति रहेको भन्दै अध्यक्ष ओलीले भनेका छन्, ‘देशको प्रमुख राजनीतिक शक्ति हो, लोकतान्त्रिक आन्दोलनको प्रमुख राजनीतिक धार हो ।’
यस्तै, बैठकले २८ असारको सर्वोच्च अदालतको फैसलापछि विकसित नयाँ राजनीतिक परिस्थिति, पार्टीको नयाँ भूमिका, कम्युनिस्ट तथा लोकतान्त्रिक आन्दोलनका सामु उपस्थित चुनौती, पार्टी एकताका लागि भइरहेका प्रयास तथा पार्टीका कार्यभारका सम्बन्धमा विस्तृत र सघन छलफल गर्दै महत्वपूर्ण निष्कर्ष निकालेको छ ।
