काठमाडौं– कांग्रेस केन्द्रीय कार्यालयमा धर्नाका विरुद्ध धर्ना बस्नेहरूको घुइँचो लागेको छ । कांग्रेसको १४औँ महाधिवेशन हुने भएपछि क्रियाशील सदस्यता वितरणकै विषयलाई लिएर निस्केको विवाद मिल्न नसक्दा अहिले सानेपास्थित केन्द्रीय कार्यालयमा अनशन बस्नेहरूको घुइँचो लागेको हो ।
पार्टी नेतृत्व सरकार गठन र गठबन्धन रिझाउन लागिपरे पनि नेता÷कार्यकर्ता भने १४औँ महाधिवेशनको तयारीमा देखिन्छन् । मुख्यगरी क्रियाशील सदस्यताबारे कांग्रेसमा विवाद छ । विवाद समाधान गर्न केन्द्रीय सदस्य रमेश लेखक नेतृत्वको केन्द्रीय क्रियाशील छानबिन समिति बनाए पनि त्यो समितिले विवाद सुल्झाउन सकेको छैन । बरु क्रियाशील सदस्यत वितरणको विषयलाई लिएर केन्द्रीय कार्यालयमा आमरण अनशन सुरु भएपछि अहिले केन्द्रीय नेताहरू अनशनकारीको भावना जित्नतिर लागेका छन् ।
वरिष्ठ नेता रामचन्द्र पौडेल र महामन्त्री शशांक कोइराला पक्षका नेता÷कार्यकर्ता केन्द्रीय कार्यालयको मुल ढोकामा धर्ना बसेको १३ दिन पुग्दा पनि उनीहरूको माग पूरा गर्नेतिर भन्दा पनि उनीहरूलाई देखाएर मतदाता तान्न उनीहरू व्यस्त छन् ।
त्यसमाथि बिहीबारदेखि सभापित शेरबहादुर देउवा पक्षका नेता÷कार्यकर्ताले मेत धर्ना थालेपछि अहिले कार्यालयमा सानोतिनो मेला नै लाग्ने गरेको नेताहरूले बताएका छन् । उनीहरूले पनि टेन्ट टागेर धर्ना दिएका छन् । त्यसो त बिहीबारदेखि नेता÷कार्यकर्तालाई त्यही भातभान्साको व्यवस्था गरिन थालिएको छ ।
महाधिवेशनको प्रक्रिया सुरु हुन ६ दिन मात्रै बाँकी रहँदा कांग्रेसको क्रियाशील सदस्यता विवाद उत्कर्षमा पुगेको छ । क्रियाशिल सदस्यता छानबिन समितिले लगभग सबै ठाउँको क्रियाशिल सदस्यता छानबिनको काम सकेको भने पनि प्रदेश २ को बारा र सप्तरीको विवाद सुल्झिएको छैन । खासमा बारा र सप्तरीको विवादले पार्टीलाई गाँजेको छ । समितिले ती जिल्लाहको विवाद केन्द्रीय कार्यसमितिमै फिर्ता गरेपछि विवाद बढेको देखिन्छ । वरिष्ठ नेता पौडेल पक्षधरले जथाभावी बाँडिएको क्रियाशिल सदस्यताविरुद्ध उठेपछि यसलाई काउन्टर दिँदै सभापति देउवा पक्षधरले पनि जिल्लाबाट सिफारिस आएका सबैलाई अनुमोदन गर्नुपर्ने माग राख्दै धर्ना सुरु गरेको छ ।
बताइएअनुसार बारामा १३औँ महाधिवेशनमा ७ हजार ९ सय ३७ जना क्रियाशिल सदस्यता रहेकोमा अहिले पाँच हजारले मात्रै नवीकरण गरेका छन् । बारा जिल्ला कार्यसमितिका सभापति जयचन्द्र चौरासियाका अनुसार नवीकरण बराबर नै नयाँ क्रियाशिल पठाए पनि विवाद झिकिएको छ । त्यस्तै सप्तरीमा पनि संस्थापन पक्षबाट आफूखुसी गरिएको पौडेल पक्षधर नेता लक्ष्मण रायले बताएका छन् । उनका अनुार जिल्ला सभापति नागेन्द्र रायले न्यूनतम् प्रक्रियासमेत पूरा नगरी गैरकांग्रेसलाई बाहुबलको आधारमा क्रियाशिल सदस्यता दिइएको छ । १३औँ महाधिवेशनमा ७ हजार तीन सय ६० क्रियाशिल सदस्यता रहेको सप्तरीमा झन्डै पाँच हजार क्रियाशिल बढी पठाइएको बताइएको छ ।
यता, कांग्रेसले १४औँ महाधिवेशनका लागि सत प्रतिशत क्रियाशिल सदस्यता थप्ने नीति लिएको छ । कांग्रेसको १४औँ महाधिवेशनको प्रक्रिया १२ साउनदेखि सुरु हुने भए पनि क्रियाशिल सदस्यता विवाद टुंगिन नसक्दा महाधिवेशन अनिश्चिततातिर अघि बढेको छ । पूर्व निर्धारित कार्यतालिका अुनसार उक्त दिन देशभरका ६ हजार ७ सय ४३ वटा वडामा अधिवेशन हुनेछ । पार्टी सरकारमा गएको र क्रियाशिल सदस्यतासमेत नटुंगिएकाले केन्द्रीय महाधिवेशन नसर्ने गरी तल्ला तहको अधिवशेन सार्ने विषयमा कांग्रेसले छलफल थालेको छ ।
यहि विषयम छलफल गर्न शुक्रबार सभापति देउवाले पदाधिकारी तथा पूर्वपदाधिकारीको बैठक बोलाएका छन् । उक्त बैठकले क्रियाशिल विवाद र महाधिवेशन कार्यतालिका हेरफेरबारे निर्णय गर्न सक्ने बताइएको छ । तर, भरपर्दो स्रोतका अनुसार पार्टीले सरकारको नेतृत्व गर्दा आन्तरिक तयारीमा केही ढिलाइ हुने देखिएकाले केही समयका लागि महाधिवेशन सारिने सम्भावना रहेको छ । तर, वडास्तरमा अधिवेशनको तयारी भइसकेकाले अब सो समय सार्न कांग्रेसका लागि निक्कै चुनौतिपूर्ण रहेको कांग्रेसकै कतिपय नेताहरूले बताएका छन् ।
त्यसो त विधानानुसार कार्यकाल सकिएको कांग्रेसका समितिहरू संविधानको सहारामा आउँदो १९ भदौसम्मका लागि कामचलाउ वैधानिकतामा छन् । भदौ १६ देखि १९ गतेसम्म काठमाडौंमा महाधिवेशन तय गरिएको कांग्रेसको क्रियाशील सदस्यता नै नटुँगिँदा महाधिवेशनको पहिलो खुड्किलो वडा अधिवेशन नै प्रभावित हुने भएको देखिन्छ ।
