काठमाडौं– नेपाली कांग्रेस १४औँ महाधिवेशनको सम्मुखमा छ । आगामी १६ भदौदेखि १९ सम्मका लागि तय गरिएको महाधिवेशनको मिति नजिकिँदै गर्दा महाधिवेशन हुनेमा आशंका पनि सुरु हुन थालेको छ । महाधिवेशनमा केन्द्रित हुनुपर्ने सभापति शेरबहादुर देउवाले गत २९ असारयता मुलुकको कार्यकारी भार सम्हालेकाले उति ध्यान दिन पाएका छैनन् । कांग्रेसमा हालसम्म क्रियाशील सदस्यता विवाद नै मिलिसकेको छैन । विवाद मिलाउन गठन गरिएको समितिका सदस्य नै कार्यकर्ताबाट कुटिएबाट विवाद कति गहिरो छ भन्ने प्रष्ट हुन्छ ।
क्रियाशील सदस्यता विवादको विषयलाई दिएर केही कार्यकर्ता आन्दोलित नै भएका छन् । पार्टी केन्द्रीय कार्यलयमा अनसन सुरु भइसकेको छ । हुन त यसअघिको महाधिवेशनको सम्मुखमा पनि सानेपामा अनसन बसिएकै थियो । तर, यसपटकको अनसनमा वरिष्ठ नेता रामचन्द्र पौडेलले समर्थन जनाएका छन् । सोमबार उनले अनसनस्थलमा पुगेर क्रियाशील सदस्यताका लागि पार्टीभित्र भइरहेका आन्दोलनप्रति समर्थन जनाएका हुन् । देशभर निष्ठावान् कांग्रेसलाई अल्पमतमा पारेर पार्टी कब्जा गर्न खोजिएको आरोप लगाउँदै उनले पार्टी कार्यालय सानेपामा जारी ‘अनसन’ प्रति ऐक्यबद्धता रहेको जनाए ।
‘देशभरिका कांग्रेसजन आज विचल्लीमा परेका छन् । निष्ठावान् कार्यकर्तालाई किनारा लगाउन खोजिँदै छ । त्यसविरुद्ध पार्टी कार्यालयमै धर्ना र आमरण अनसन बस्नुपर्ने अवस्था आएको छ । यो अत्यन्तै दुःखद छ । यो आन्दोलनमा मेरो पूर्ण ऐक्यवद्धता छ,’ पार्टी कार्यालयमा भइरहेका आन्दोलनमा समर्थन जनाउन सानेपा पुगेका पौडेलले भने ।
कांग्रेस केन्द्रीय कार्यालयमा विभिन्न जिल्लाका नेता कार्यकर्ताहरूले क्रियाशील सदस्यता वितरणमा असन्तुष्टि जनाउँदै धर्ना दिइरहेका छन् । धनुषाका कांग्रेस नेता पूर्वसांसद चन्द्रमोहन यादवसहित रामपल्टन साह र दिनेश नायक आमरण अनसनमा बसेका छन् । त्यस्तै बारा, सर्लाही, मकवानपुरलगायत जिल्लाका कांग्रेस कार्यकर्ताहरू पनि सानेपामा धर्नामा बसिरहेका छन् ।
उनीहरूले समायोजनका नाममा जथाभावी क्रियाशील सदस्यता वितरण भएको, विधान र निर्देशिका उल्लंघन गरिएकोलगायत आरोप लगाउँदै आएका छन् । कांग्रेसको केन्द्रीय क्रियाशील सदस्यता छानबिन समितिले विवाद निरूपणको जिम्मा पाएपनि अहिलेसम्म टुंग्याउन सकेको छैन । यी सबै विवादका बीच कांग्रेसको आगामी महाधिवेशन हुनेमा आशंका उब्जिएको छ ।
