काठमाडौं– नेपाल समाजवादी कांग्रेसका अध्यक्ष गोविन्द निरौलाले भ्रष्टाचार नेतृत्व तहबाट भइरहेको आरोप लगाएका छन् । आइतबार माइतीघर मण्डलामा आयोजित नयाँ विचार, नयाँ नेतृत्व र आधुनिक विकासका लागि आयोजित दीप प्रज्ज्वलन कार्यक्रममा बोल्दै अध्यक्ष निरौलाले राज्यको उपल्लो तहमा बसेका व्यक्तिहरूबाट भ्रष्टाचार हुने गरेको बताएका हुन् ।
देशको प्रधानमन्त्री र मन्त्रीले भष्टाचार गरेको तर कार्बाही भने सामान्य कर्मचारीलाई गर्ने गरिएको भन्दै देशका सबै तहमा अराजकता बढ्दै गएको उनले बताएका छन् । भ्रष्टाचार अन्त्य गर्नका लागि मन्त्री प्रधानमन्त्री नै लाग्नु पर्ने उनको तर्क थियो । कर्मचारीलाई देखाएर राजनीति नेतृत्व उम्कन नहुने उनले बताए । मन्त्रीहरूको संलग्नताबिना सामान्य कर्मचारीले केही पनि गर्न नसक्ने उनको भनाइ छ ।
अहिले राष्ट्रिय अस्तित्व खतरामा रहेको भन्दै आपूmहरू त्यसका लागि निरन्तर लड्दै आएको उनले दाबी गरेका छन् । राष्टिय अस्तित्व रक्षाका लागि संघीयता र धर्मनिरपेक्षता खारेजी गर्नु पर्ने पार्टीको माग रहेको पनि अध्यक्ष निरौलाले सुनाए । देशको अस्तित्व जोगाउनका लागि हिन्दू राज्यको स्थापना हुनु पर्ने र राजतन्त्र सहितको प्रजातान्त्रिक व्यवस्था हुनु पर्ने पार्टीको मुख्य माग रहेको उनले बताए । अरुले ठूला ठूला होटलमा कार्यक्रम गर्ने गरेको भन्दै आफूहरू जनताको साथमा सडकमा रहेको उनले बताए । जनतालाई जागरुक बनाउनका लागि पार्टी सधैँ लागिरहेको उनको दाबी थियो ।
साथै अध्यक्ष निरौलाले नेपालको संविधान, ०७२ मान्न नसकिने पनि बताएका छन् । त्यो संविधान खारेज गरेर नयाँ संविधान लेखन गर्नु पर्ने पनि उनको तर्क छ । यो सविधानले राष्ट्रिय अस्तित्व थेग्न नसक्ने भएकाले अर्को संविधान पुनर्लेखन गर्नु पर्ने नेपाल समाजवादी कांग्रेसले माग गरेको छ । पार्टीले उठाउँदै आएका मागलाई पूरा गर्दै नेपाल समाजवादी कांग्रेसलाई पनि सहभागी गराएर राष्ट्रिय सरकार बनाउनु पर्ने मागसमेत गरिएको छ ।
