काठमाडौं– नेपाली कांग्रेसका सभापति शेरबहादुर देउवाले प्रधानमन्त्रीमा विश्वासको मत पाएका छन् । आइतबार बसेको प्रतिनिधिसभाको बैठकमा उनले विश्वासको मत पाएका हुन् । गत २९ असारमा प्रधानमन्त्री पदमा नियुक्त भई शपथ लिएका उनले नियुक्तिको पाँचौँ दिनमै संसदमा विश्वासको मत पाएका छन् ।
आइतबार संसदमा भएको मत विभाजनका क्रममा १३६ मत आवश्यक रहेकोमा प्रधानमन्त्री देउवाको पक्षमा १६५ मत परेको छ भने विपक्षमा ८३ मत मात्रै परेको छ । १ जना तटस्थ रहे । कुल २७१ सांसदमध्ये २१ जना भने अनुस्थित रहेका थिए । सभामुख अग्निप्रसाद सापकोटाले प्रतिनिधिसभामा भएको मत विभाजनमार्फत भएको मतदानमा देउवाले बहुमत प्राप्त गरेको घोषणा गरेका छन् ।
प्रधानमन्त्री देउवाको पक्षमा नेपाली कांग्रेस, नेकपा माओवादी केन्द्र, जनता समाजवाली पार्टीका दुवै पक्ष र राष्ट्रिय जनमोर्चाका सांसदले मतदान गरेका थिए । नेकपा एमालेका केही सांसदले विश्वासको मत दिएको थियो भने एमाले संस्थापन पक्षका सांसदहरूले मात्र प्रस्तावको विपक्षमा मतदान गरेका थिए ।
एमालेका माधव नेपाल पक्षका केही सांसद तटस्थ बसेका थिए भने माधव नेपालसहित केही एमालेले नेताले देउवालाई मत दिएका थिए । केपी ओली पक्षकै सांसदहरू प्रेम आले र किसान श्रेष्ठलगायतले देउवाको पक्षमा मतदान गरेका थिए ।
विश्वासको मत पाएलगत्तै प्रधानमन्त्री देउवालाई भारतीय प्रधानमन्त्री नरेन्द्र मोदीले बधाई दिएका छन् । मोदीले ट्वीटरमार्फत देउवालाई बधाई दिएका हुन् । उनले प्रधानमन्त्री देउवालाई बधाई दिँदै सफल कार्यकालको शुभकामना व्यक्त गरेका छन् । देउवाको कार्यकालमा द्विपक्षीय सम्बन्ध अझ गहिरो हुने पनि मोदीले बताएका छन् । देउवा प्रधानमन्त्री नियुक्त भएपछि भारतीय राजदूतले भेटेर बधाई दिएका थिए । तर, प्रधानमन्त्री मोदीले भने बधाई दिएका थिएनन् ।
२२ एमाले सांसदको मत
प्रधानमन्त्री देउवाले यसअघि राष्ट्रपति विद्यादेवी भण्डारी समक्ष ७ जेठमा १४६ सांसदको हस्ताक्षरसहित प्रधानमन्त्री पदमा दाबी गरेका थिए । तर, एमाले अध्यक्ष केपी ओलीले पनि आफूहरूलाई १५३ ना सांसदको समर्थन रहेको पत्रसहित राष्ट्रपति कार्यालयमा दाबी पेस गरेपछि राष्ट्रपति भण्डारीले दुवैको दाबी अस्विकार गरेकी थिइन् । त्यसपछि तत्कालीन प्रधानमन्त्री ओलीको सिफारिसमा राष्ट्रपतिले प्रतिनिधिसभा विघटन गरेकी थिइन् ।
राष्ट्रपति भण्डारीको संसद विघटन गर्ने निर्णयविरुद्ध संसद पुनस्र्थापना र कांग्रेस सभापति देउवालाई प्रधानमन्त्रीमा नियुक्त गर्न परमादेशको माग गर्दै १४६ जना सांसदले सर्वोच्च अदालतमा रिट निवेदन दिएका थिए । त्यसअघि राष्ट्रपति कार्यालयमा समर्थन गर्दा एमालेका माधवकुमार नेपाल पक्षका २६ सांसदले समर्थन गरेकोमा अदालत जाँदा भने २३ जना सांसदले मात्र हस्ताक्षर गरेका थिए ।
आइतबार संसदमा फरक दृश्य देखियो । यसअघि देउवाको समर्थनमा हस्ताक्षर गरेर राष्ट्रपति कार्यालय र सर्वोच्च अदालतसम्म पुगेको सांसदहरू अनुपस्थित हुँदा यसअघि अध्यक्ष ओलीको पक्षमा खुलेको केही सांसदले देउवालाई विश्वासको मत दिएका छन् । एमालेका कुल २२ सांसदले देउवालाई विश्वासको मत दिएका छन् ।
एमाले माधवकुमार नेपाल, विरोध खतिवडा, जीवनराम श्रेष्ठ, कल्याणी खड्का, मेटमणि चौधरी, भवानी खापुङ, मुकुन्द न्यौपाने, पार्वती विशुंखे, हिरा केसी, कृष्णकुमार श्रेष्ठ किसानले देउवालाई विश्वासको मत दिएका छन् । त्यस्तै, गोपाल बम, प्रेमबहादुर आले, धनबहादुर बुढा, बिना बुढाथोकी, सरला यादव, पुष्पाकुमारी कर्ण, लक्ष्मी चौधरी, निरादेवी जैरु, रामकुमारी झाँक्री, कलिला खातुन, समिना हुसेन र कृष्णलाल महर्जनले पनि देउवालाई मत दिएका छन् ।
देउवालाई विश्वासको मत दिने एमाले सांसदमध्ये आले यसअघि ओली सरकारमा वनमन्त्री थिए । त्यस्तै, कृष्णकुमार श्रेष्ठ, धनबहादुर बुढा, पार्वती विशुंखे, समिना हुसेन, हिरा केसी, बिना बुढाथोकी र गोपाल बम ओलीनिकट थिए । तर, यसअघि नेपाल पक्षमा खुलेका १० सांसदहरू भने मतदान प्रक्रियामा सहभागी भएनन् । प्रधानमन्त्री देउवाको विपक्षीमा एमाले ओली पक्षका ८२ र नेपाल मजदुर किसान पार्टीका एक गरी ८३ सांसदले मतदान गरेका छन् । राप्रपाका एक सांसद भने तटस्थ बसेका थिए ।
प्रधानमन्त्री देउवाले विश्वासको मत पाएलगत्तै एमाले अध्यक्ष वरिष्ठ नेता नेपालले निरंकुश प्रवृत्तिमा अंकुश लागेको बताएका छन् । प्रधानमन्त्री शेरबहादुर देउवाले विश्वासको मत पाएपछि प्रतिक्रिया दिँदै नेपाले भने, ‘आजको प्रतिनिधिसभाको घटनाले निरंकुश प्रवृत्तिमा अंकुश लगायो ।’ सर्वोच्चको फैसलाको जित भएको र व्यवस्था जोगिएको नेपालको भनाइ छ । ‘सर्वोच्चको फैसलाको जित भएको छ । व्यवस्था पनि जोगिएको छ । पटक–पटक प्रतिनिधिसभा विघटन गरियो । यो प्रतिनिधिसभाले स्थायित्व दिन सक्दैन भन्ने कुरा झुट साबित भएको छ,’ उनले भने ।
ठाकुर पक्षको पनि समर्थन
प्रधानमन्त्री देउवाले विश्वाको मत लिनेबेलासम्म एमाले अध्यक्ष ओलीको साथमा रहेको जसपाको महन्थ ठाकुर पक्षले आइतबार देउवालाई समर्थन गरेको छ । शनिबार एमाले अध्यक्ष ओलीलाई बालकोेटमा भेटेर सहकार्यको प्रस्ताव राखेको जसपाको ठाकुर पक्षले आइतबार देउवाले लिखितरूपमा समर्थन माग गरेको र आफूहरूको माग पूरा गर्ने आश्वासन दिएकाले समर्थन दिएको बताएको छ । यद्यपि ठाकुर पक्षमा रहेका २० सांसदमध्ये धेरैले देउवालाई समर्थन गर्ने घोषणा गरेपछि दबाबमा परेको ठाकुर पक्षले पनि अन्तिममा आएर देउवालाई विश्वासको मत दिने घोषणा गरेको बताएको छ ।
