काभे्रपलाञ्चोक–नेकपा (एमाले)का केन्द्रीय सदस्य गोकुलप्रसाद बाँस्कोटाले बालबालिकालाई राजनीतिक चेतना राख्न आग्रह गर्दै नयाँ पुस्ताले धैर्य राख्न सके मात्र जीवन सफल बन्ने सुझाव दिएका छन् । बुधबार पनौती नगरपालिकालाई बालमैत्री स्थानीय शासन नगरपालिका घोषणा विशेष समारोहमा उनले अहिलेको परिस्थितीको सिर्जना नै अधैर्यताले गरेको टिप्पणी गर्दै यस्तो सुझाव दिएका हुन् । उनले अधैर्यताले सम्पूर्ण क्षेत्र तहसनहस हुने बताउँदै बालबालिकालाई अधैर्य नबन्न आग्रह गरे ।
बाँस्कोटाले अधैर्यताले व्यक्तिगत जीवनसँगै राजनीतिमा समेत नकारात्मक असर पर्ने भएकाले बालबालिकालाई राजनीतिक चेतना राख्न आग्रह गरे । उनले भने, ‘ बालबालिकाले धैर्यतापूर्वक राजनीतिक चेतना राख्दै देशभक्त बन्नु तर पार्टीभक्त कहिल्यै नबन्नु ।’ अधैर्यताले स्वयं व्यक्तिगत र राजनीतिक दलको उद्देश्यमा ठूलो आघात पुग्ने भएकाले यसको असर हालै भोग्नुपरेको उनले बताए ।
उनले लामो जीवन किशोरकिशोरीको रहेकाले अबको विकास र सुरक्षा उनीहरूलाई चाहिएको बताए । उनले अघिल्लो सरकारले सुख–समृद्धिको राष्ट्रिय मान्यता स्थापित गरेको जिकिर गर्दै प्रधानमन्त्री केपी शर्मा ओलीको जनादेशले नभई परमादेशले बहिर्गमन भएको बताए । उनले नेपाली कांग्रेसलाई शुभकामना दिदैँ व्याग्यात्मक रूपमा सत्ता टिकाउन सुझाव दिए । उनले भने, ‘नेपाली कांग्रेसको सरकारले अबको थप प्रक्रियामा बहुमत पुरोओस्, तत्कालीन खिलराज रेग्मीको झैँ अवस्था नआओस्, काम शुरु भएका राष्ट्रिय गौरवका आयोजना सञ्चालन हुन, योजनाका बजेट नकाटियोस्’
त्यस्तै उनले एमालेका वरिष्ठ नेता माधवकुमार नेपाललाई अब पार्टीमा कुनै पनि ठाउँ नरहेको बताए । पार्टीभित्रकै चुनौतीले संविधान संकटमा पर्नसक्ने र पार्टी कमजोर भए लोकतन्त्र कमजोर हुने हुनाले पार्टी हित लाग्नेहरूको लागी एमालेमा कुनै ठाउँ नहुने भनाइ थियो ।
पनौती नगर बालमैत्री स्थानीय शासन घोषणा गर्ने नेपालमा आठौँ, प्रदेशमा चौँथो र जिल्लामा दोस्रो भएको छ ।
कार्यक्रममा संविधानसभा सदस्य रामहरि सुवेदी, वाग्मती प्रदेशसभा सदस्य चन्द्र लामा, नेकपा (एमाले) पनौती नगरपालिका संयोजक सुरेशप्रसाद हुमागाईँ, नेपाली कांग्रेसका पनौती नगर सभापति रामशरण भण्डारी, जिल्ला बाल संगठनका अध्यक्ष विदुरप्रसाद हुमागाईँलगायतले नगरमा बालमैत्री स्थानीय शासन कार्यान्वयन गर्न आग्रह गरे । नगरप्रमुख भीमप्रसाद न्यौपानेले नगरका १२ वडामा ४९ सूचक पूरा गरिएको र नगरमा १६ हजार ५१० बालबालिका रहेको जानकारी दिए ।
