काठमाडौं– सत्तारुढ दल नेपाल कम्युनिस्ट पार्टी (एमाले) को विवाद सल्टिने पथतिर अघि बढाउन सकस भइरहेको छ । खासमा पार्टी अध्यक्ष केपी ओली र वरिष्ठ नेता माधवकुमार नेपाल आ–आफ्नो अडानबाट २० बाट १९ सम्म पनि तल झर्न नमान्दा विवाद सल्टिनै मुश्किल भएको हो ।
पछिल्लो समय दुई नेताहरूकै चाहनामा यसअघि एमाले विवाद मिलाउनका लागि बनेको कार्यदल ब्यूँताएर चार दिनदेखि लगातार छलफल गर्दा पनि कुनै ठोस सहमति हुन सकेको छैन । दोस्रो तहका नेताहरू सम्मिलत सो कार्यदलका सदस्यहरूबीच लगातार छलफल गरे पनि यसले कुनै निर्णय गर्न सकेको छैन ।
यसैबीच, अध्यक्ष ओली र वरिष्ठ नेता नेपालबीच भेटवार्ता भएको भोलिपल्ट बिहीबार बसेको बैठकपछि कार्यदलका सदस्यहरूले साँझसम्म सहमति हुने दाबी गरे पनि त्यस्तो हुन सकेको छैन । कार्यदलमा ओली पक्षको संयोजक रहेका सुवास नेम्वाङले त बिहीबार नै निष्कर्षमा पु¥याउने जोड रहेको बताएका थिए । त्यस्तै, नेपाल समूहबाट कार्यदलमा रहेका गोकर्ण विष्टले लगभग समाधानको विन्दुमा पुगेको दाबी गरेका थिए ।
तर, बिहीबार साँझ उनीहरूले भनेझैँ परिणाम भने निस्कन सकेन । नेताहरूले त साँझ सहमति जुट्छ भने पनि बिहीबार अनौपचारिक छलफल गरेरै समय कटान भएको एक नेताले बताएका छन् । बिहीबार साँझ ७ बजे अर्थ मन्त्रालयमा कार्यदलको बैठक पनि बोलाइए पनि बैठकमा कार्यदलका सदस्य एवं उपमहासचिव विष्णु पौडेल अनुपस्थित रहेपछि सो बैठक निष्कर्षविहीन भएको बैठक सहभागी नेताहरूले बताएका छन् ।
छलफलका लागि जम्मा भएका सदस्यहरू उहि १० दिन अघिदेखिको कुराभन्दा अरु केही नभएको कार्यदलका सदस्य एवं एमाले अर्का उपमहासचिव घनश्याम भुसालले बताएका छन् । उनका अनुसार अनौपचारिक छलफलमा १० दिनअगाडिका एजेन्डाहरूमाथि भएको र त्योभन्दा अघि केही भएको छैन । सहमति जुटाउने भन्दै बसेको बैठकले औपचारिक रूप लिन नसकेपछि निरास देखिएका उपमहासचिव भुसालले १० दिनदेखि अल्झेको विवाद समाधानतिर जान नसकेको बताए । उपमहासचिव भुसालले यस्तो निरासापन पोख्दै गर्दा कार्यदलका केही सदस्यहरूले भने पछिल्ला बैठकहरूपछि ‘आजै सहमति जुट्छ’ भन्दै आएका थिए ।
बताइए अनुसार दोस्रो तहका नेताहरूबीच भएको छलफल लामो समयदेखि सकारात्मक नै छ । तर बुँदागत रूपमा कुन विषयमा के गर्ने भन्ने टुंगिएको छैन । नेपाल पक्षले सर्वोच्च अदालतको फैसलाअनुसार २ जेठ ०७५ मा कायम रहेको पार्टी तथा जनवर्गीय संगठनलाई कायम गर्नुपर्ने र एकपक्षीय रूपमा गरेका निर्णयहरू खारेज गर्नुपर्ने माग राखेको छ भने ओली पक्षबाट भने निसर्त आफूहरूलाई सहयोग गर्नुपर्ने बताउँदै आएको छ ।
छलफलका क्रममा ओली पक्षका नेताहरू सकारात्मक पनि देखिन्छन् । तर जेठ २ मा फर्किँदा जनवर्गीय संगठनहरूको नेतृत्व, केन्द्रीय कमिटीको संख्या, पूर्वमाओवादी नेताहरूको व्यवस्थापन कसरी गर्ने भन्ने विषयमा प्रवेश नै गर्न नचाहेपछि एमालेको विवाद समाधानतिर अघि बढ्न सकेको छैन । वास्तवमा पुरानो कार्यदल ब्यूँतिए पनि भएका छलफलहरूको अवस्था पनि योभन्दा खासै फरक भएको छैन । उनीहरूको जोड या त सर्वोच्चमा विचाराधीन प्रतिनिधिसभा विघटनको मुद्दामा भएको हस्ताक्षर फिर्ता लिने वा एमाले एक भइसक्यो भन्ने सन्देश दिनेमा मात्र देखिएको नेपाल पक्षको आरोप छ ।
तर, बिहीबारको बैठकमा उपमहासचिव पौडेल अुनपस्थित नभएपछि नेपाल पक्ष सशंकित भएको छ । ओली पक्षले साँच्चै सहमति चाहेको हो भने मन्त्रिपरिषद बैठक रोकेर पनि पौडेल बैठकमा आउनु पर्ने नेपाल पक्षको भनाइ छ । अहिले ओली पक्ष एमाले एकताभन्दा सर्वोच्च अदालत र विपक्षी गठबन्धनलाई प्रभावित गर्नेतिर मात्र गएको नेपाल पक्षको आरोप छ ।
विवाद समाधान गर्न गठित कार्यदलको बैठक कुनै प्रगतिबिनै सकिएपछि अब बैठकप्रति नेपाल पक्षले विश्वास गर्न छाडेको छ । तर, एमाले नेता नेम्बाङले शुक्रबार बस्ने बैठकले निष्कर्ष निकाल्ने बताएका छन् । बिहीबारको बैठकमा कार्यदलका सदस्य पौडलबाहेक कार्यदलका अन्य सबै नेता सहभागी थिए । मन्त्रिपरिषद् बैठक चलिरहेकाले पौडेल बैठकमा उपस्थित हुन नसक्ने बताएर बैठक शुक्रबार बिहान साढे ११ बजे बस्ने सहमति भएको बताइएको छ । अनौपचारिक रूपमा १० दिन अघिदेखि तयार पारेको मस्यौदामा अहिलेसम्म कार्यदल प्रवेश गर्न नसक्दा एमाले विवाद समाधान हुनेमा एमालेकै कतिपय नेताहरूले शंका गर्न थालेका छन् ।
वरिष्ठ नेता नेपाल पक्षले २ जेठ अघिको एमाले हेर्न चाहेको भए पनि अध्यक्ष ओलीले भने माओवादीबाट एमालेमा आएका नेताहरूलाई कुनै पनि मूल्य र मान्यतामा एमालेमा स्थापित गर्न चाहँदा सहमति हुन सकेको छैन । नेपाल पक्षधरहरूको मागलाई बेवास्ता गर्दै आएका ओली पक्षधरले भने एमालेबाट चुनाव जितेकाहरूले एमालेलाई निसर्त सहयोग गर्नुपर्ने भन्दै आएका छन् ।
त्यसअघि बिहीबार कार्यदलका सदस्यहरू वार्ता रोकेर छुट्टाछुट्ट छलफलमा जुटेका थिए । नेपाल पक्षका कार्यदल सदस्यहरू सिंहदरबारस्थित अर्थमन्त्रालयकै एउटा कोठामा छलफलमा बसेका थिए, भने ओली पक्षका कार्यदल सदस्यहरू प्रधानमन्त्री कार्यालयमा बसेका थिए ।
पार्टी एकताको प्रयासका लागि दुई दिनयता १० सदस्यीय कार्यदलको बैठक अर्थमन्त्रालयमा नियमितजसो बस्दै आएको छ । विहीबार पनि बिहान ११ बजेपछि कार्यदलको बैठक बसेको थियो । तर, केही समय आन्तरिक गृहकार्य गर्ने भन्दै बैठक रोकिएको छ ।
यही क्रममा बुधबार राति मेरियट होटलमा अध्यक्ष ओली र नेता नेपालबीच पनि वार्ता भएको थियो । वार्तामा दुवै नेताहरू आ–आफ्नै अडानमा रहेकाले सहमति जुट्न सकेको थिएन ।
