काठमाडौं– नेकपा एमालेका वरिष्ठ नेता माधवकुमार नेपालले अध्यक्ष केपी ओलीलाई आफूभन्दा ओली नै नेकपा माओवादी केन्द्रका अध्यक्ष पुष्पकमल दाहालको ‘ठूलो मतियार’ भएको जवाफ फर्काएका छन् । पार्टीले सोधेको १० बुँदे लिखित स्पष्टीकरणको १३ बुँदामा प्रतिवाद गर्दै ओली दाहालको ठूलो मतियार भएको स्पष्ट पारेका हुन् ।
नेता नेपाललाई एमालेले किन दाहालको मतियार बनेको भन्दै स्पष्टीकरण सोधेको थियो । तर, ओलीले आफूलाई दाहालको मतियार भनेको विषयमा उनले प्रतिप्रश्न गरेका छन्, ‘पार्टी एकताको पूर्वसन्ध्यादेखि प्रतिनिधिसभाको विघटनसम्मको अवधिमा तपाईंले पुष्पकमल दाहाल ‘प्रचण्ड’ सँग गर्नुभएका सम्झौता, निरन्तर गर्ने गरेको गोप्य बैठक र सहकार्यको आधारमा तपाईं नै उहाँको सबभन्दा ठूलो ‘मतियार’ हो भन्न सकिन्न र ? तर यस्तो दृष्टिकोण ममा छैन ।’
यस्तै, नेपालले सर्वोच्च अदालतले नेकपा एमालेलाई पूर्ववत् अवस्थामा फर्काएपछि पनि एकलौटी ढंगले केन्द्रीय कमिटीको बैठक डाकेर पार्टी विधानको उल्लंघन किन गरेको भन्दै प्रश्न गरेका छन् । ‘गत फागुन २३ गतेको सर्वोच्च अदालतको फैसलाबाट नेकपा एमाले पुनर्जिवित भएपछि नवौँ राष्ट्रिय महाधिवेशनबाट निर्वाचित केन्द्रीय कमिटीको बैठक विधिवत् बोलाई एकताबद्ध भएर जाने कार्यमा पार्टी अध्यक्षको हैसियतले पहल गर्नु तपाईको कर्तव्य थियो कि थिएन ?’ स्पष्टीकरणपत्रमा नेपालले ओलीमाथि नै प्रश्न गरेका छन् ।
२८ फागुनमा प्रधानमन्त्रीको सरकारी निवासमा आङ्खना गुटका मानिसहको भेला बोलाई त्यसलाई कथित केन्द्रीय कमिटीको विशेष बैठकको संज्ञा दिएको भन्दै नेपालले, ‘पार्टीको विधान र प्रक्रियाविपरीत नवौँ राष्ट्रिय महाधिवेशनबाट निर्वाचित पदाधिकारी र सदस्यहरूको जिम्मेवारी परिवर्तन गर्ने, एमालेको सदस्य नरहेका २३ जनालाई केन्द्रीय कमिटीको सदस्य मनोनयन गर्ने, पार्टी विधानमा संशोधन गर्नेजस्ता निर्णय गरिएको भनी सार्वजनिक गरेर पार्टी विधानको ठाडो उल्लंघन गर्दै पार्टी विभाजनको रेखा कोर्ने आपत्तिजनक काम किन गर्नुभयो ?’ भन्दै प्रश्न गरेका छन् ।
‘यसप्रकार तपाईंले गुटगत गतिविधि गरी नेकपा एमालेको झण्डा, चुनाव चिह्न र संगठनको दुरूपयोग गरेको कुरा सार्वजनिक सञ्चारमाध्यमबाट जानकारी भएकाले त्यस्तो पार्टी विधानविपरीत गरिएको बैठकका अवैध निर्णयहरूको आधारमा नेकपा एमालेबारे कुनै पनि सूचना अद्यावधिक नगरियोस् भनी म समेतले निर्वाचन आयोगमा मिति २०७७।१२।१ मा निवेदनसमेत गरेको तपाईंलाई जानकारी छ कि छैन ? तपाईंले उक्त प्रकारका कार्य गरी नेकपा एमालेको नवौँ राष्ट्रिय महाधिवेशनद्वारा पारित विधानका प्रावधानहरूको ठाडो उल्लंघन किन गर्नुभयो ?’ पत्रमा भनिएको छ ।
यस्तै, नेता नेपालले २८ फागुनमा ओली पक्षको बैठकले गरेका निर्णय पार्टीलाई विभाजन गराउने उद्देश्यले गरेको ठानेका छन् । ‘तपाईंबाट फागुन २८ गते अवैधानिक रूपमा गरिएको निर्णय बदर गरौँ भन्दा तपाईंले किन मान्नु भएन ? यसको तात्पर्य तपाईंमा पार्टी विभाजनको दुराशय रहेको देखियो किन नभन्ने ?’ स्पष्टीकरणपत्रमार्फत नेपालले ओलीलाई प्रश्न गरेका छन् ।
सरकारका कमी कमजोरीलाई औँल्याई सत्मार्गतर्फ अग्रसर गराउने तथा आलोचना गर्ने कुरालाई ‘विरोध’ ठान्ने गलत मानसिकताले नै पार्टीमा गम्भीर समस्या उत्पन्न भएको समेत नेपालको निष्कर्ष छ ।
“अनुशासनको कारबाही गरिएको होइन ?”
एमाले नेता डा.भीम रावलले पार्टीलाई १४ बुँदे स्पष्टीकरण पठाउँदै अध्यक्ष ओलीमाथि संगीन आरोप लगाएका छन् । रावलले ओलीमाथि विदेशीसामु लम्पसार परेको, भ्रष्टाचार गरेकोदेखि पार्टीले अनुशासनको कारबाही गरेको प्रसंगमा समेत आरोपित गरेका छन् ।
रावलले ओलीलाई ‘साविक नेकपाको केन्द्रीय कमिटीले अनुशासनको कारबाही गरेको होइन ?’ भन्दै प्रश्न उठाएका छन् । रावललाई पार्टीले महाधिवेशन आयोजक समिति सदस्यका रूपमा स्पष्टीकरण मागेको थियो । तर उनले आफूलाई उपाध्यक्षकै रूपमा पेस गरेका छन् ।
आर्थिक हिनामिनाबारे सोधिएको प्रश्नको जवाफ दिँदै आफूलाई लगाएको आरोप तथ्यहीन भएको बताएका छन् । उनले भनेका छन्, ‘यस्तो निकृष्ट प्रचार गरेर तपाईंले पार्टी एकीकरणपछि समेत केन्द्रीय कार्यालयमा सञ्चित १८ करोड बढी रकमको दुरूपयोग गर्न आफूलाई सहज तुल्याउने अभ्यास गर्नुभएको मात्र हो किन नभन्ने ?’
अध्यक्ष ओलीको अध्यक्षतामा बसेको बैठकले एमाले नेताहरू नेपाल, रावलसहित सुरेन्द्र पाण्डे र घनश्याम भुसाललाई स्पष्टीकरण सोध्ने निर्णय गरेको थियो । सोही निर्णयअनुसार महासचिव ईश्वर पोखरेलले चारै जनालाई तीनदिनभित्रै जवाफ दिने गरी लिखित स्पष्टीकरण पत्र थमाएको थियो । बिहीबार अन्तिम दिन सबै नेताले लिखित स्पष्टीकरण बुझाएका हुन् ।
