काठमाडौं– नेकपा एमालेले वरिष्ठ नेता माधवकुमार नेपालसहित चार जनालाई पार्टी हितविपरीत कार्य गरेको भन्दै सोमबार स्पष्टीकरण सोधेको छ । यसअघि आइतबार बसेको केन्द्रीय कमिटी बैठकको निर्णयअनुसार नेपालसहित भीमबहादुर रावल, सुरेन्द्र पाण्डे र घनश्याम भुषाललाई लिखित स्पष्टीकरण सोधिएको हो ।
नेता नेपाल र पाण्डेलाई सोधिएको स्पष्टीकरण पत्र उनीहरूका स्वकीय सचिवले बुझेका थिए भने भुषालले आफैँ पत्र बुझेका थिए । रावलले भने पत्र बुझ्न नमानेकाले पोष्टबक्समा राखिएको छ । उनले स्पष्टीकरण सोध्नेहरूको धरातल नै कमजोर भएकाले पत्र नबुझेको प्रतिक्रिया दिएका छन् ।
महासचिव ईश्वर पोखरेलले हस्ताक्षर गरेको स्पष्टीकरण पत्रमा नेपाललाई पार्टीको वरिष्ठ नेता नरहेको जनाउसहित १० बुँदे स्पष्टीकरण मागिएको छ । पत्रमा नेपाललाई ‘महाधिवेशन आयोजक समिति सदस्य’ भनी सम्बोधन गरिएको छ । अन्य सबैलाई सोही सम्बोधन प्रयोग गरिएको स्रँेतले जानकारी दियो । जबकी नेकपा (माओवादी केन्द्र) सँगको एकतापूर्व नेपाल वरिष्ठ नेता, रावल उपाध्यक्ष र भुषाल उपमहासचिव थिए । पाण्डे स्थायी कमिटी सदस्य थिए ।
नेपाललाई सोधिएको स्पष्टीकरण पत्रको पहिलो बुँदामा ‘साविक नेकपाको वरिष्ठ नेताको जिम्मेवारीमा रहँदा पार्टी अध्यक्ष केपी ओलीविरुद्ध १९ पृष्ठ लामो अराजनीतिक, तथ्यहीन र शत्रुतापूर्ण आरोप तयार गर्न, पार्टीको विधानको व्यवस्थाविपरीत छापामार शैलीमा तत्कालीन पार्टी सचिवालयमा प्रस्तुत गर्न र पार्टीको नाम, झण्डा र लोगोसमेत अनधिकृत रूपमा प्रयोग गरी पुस्तकाकारमा प्रकाशित गरेर वितरण गर्नमा अग्रसर भई पुष्पकमल दाहालको मतियारसमेत भई पार्टी हितविपरीत कार्य गर्नु गराउनुको कारण के हो ?’ भनी सोधिएको छ ।
त्यस्तै, दोस्रो बुँदामा ‘नेकपाको विधानविपरीत सडक तथा अनधिकृत स्थानमा बसी अनधिकृत र कानुनविपरीत अध्यक्ष ओलीलाई अध्यक्ष र पार्टीको साधारणसदस्य पदबाट हटाउनु’को आधार सोधिएको छ । उनलाई निर्वाचन आयोगमा पार्टी विधान र हितविपरीत पटक–पटक निवेदन दर्ता गर्नु÷गराउनु, पार्टी फुटाउने उद्देश्यले आयोगमा पार्टीको नाम, चिह्न र झण्डाको प्रयोग आङ्खनो गुटले गर्न पाउने निवेदन दिनुको कारण सोधिएको छ । त्यस्तै, पार्टी फुटाउदा के उद्देश्य हासिल हुने ? ४ र ५ चैतमा बोलाइएको राष्ट्रिय कार्यकर्ता भेला तथा त्यसपछिका विभिन्न भेला गरी पार्टी फुटाउन अग्रसर हुनुको कारण स्पष्ट पार्न भनिएको छ ।
पत्रमा नेता नेपाललाई ‘ओली नेतृŒवको सरकारको सदन, सञ्चारमाध्यम र सडकबाट निरन्तर विरोध गरेको भन्दै छापामार शैलीमा सरकारविरुद्ध अविश्वासको प्रस्ताव तयार गरी संसद सचिवालयमा दर्ता गर्ने प्रयासजस्तो अत्यन्तै हानिकारक र अनुशासनहीन कार्य गरेको’ भन्दै त्यसबारे पनि सोधिएको छ । पत्रमा उनलाई अविश्वासको प्रस्तावमा केही सांसदलाई प्रलोभनमा पारेको र केहीको फर्जी हस्ताक्षर गरेको आरोप लगाइएको छ ।
सर्वोच्च अदालतको फैसलापछि ब्यूँतिएको एमालेको दशौँ, एघारौँ र बाह्रौँ केन्द्रीय बैठक र संसदीय दलको बैठकमा अनुपस्थित रहनुको कारण र पार्टीको एकताविरोधी प्रस्ताव तथा अभिव्यक्ति दिनुको कारण पनि नेता नेपाललाई सोधिएको छ ।
त्यस्तै, नयाँ सरकार गठन गर्नका लागि आङ्खनै पार्टी नेतृŒवको सरकारविरुद्ध विपक्षी दलसँग छलफल गर्नुका साथै, माओवादी केन्द्रका अध्यक्ष दाहालसँग निरन्तर भेटघाट र अझैँ साँठगाँठ गर्नुको कारण सोधिएको छ । पत्रमा लेखिएको छ, ‘माधव नेपालहरू सके नेकपा एमाले कब्जा गरेर, नसके विद्रोह गरेर नेकपा माओवादी केन्द्रसँग एकता गर्न आउनुहुन्छ भन्ने पुष्पकमल दाहालका सार्वजनिक भनाइहरूप्रति तपाईंको मौन समर्थन रहनुको रहस्य वा कारण के हो ?’
पत्रमा नेपाललाई पार्टी हितविपरीत वैधानिक व्यवस्था र कार्यक्रमको विपक्षमा सार्वजनिक क्रियाकलाप गरेको, गुटबन्दी तथा षड्यन्त्र गरेको, पार्टी निर्णय बारम्बार उल्लघंन गरेको, पार्टीका बारेमा भ्रम फैलाई निष्ठा र विश्वासबाट च्यूत भएको, गोपनीयता भंग गरेको, विपक्षी र अवाञ्छित तŒवसँग साँठगाँठ गरी पार्टी र राष्ट्रहितविपरीत कार्य गरेकोलगायत आरोप लगाइएको छ । पत्रमा तीन दिनभित्र जवाफ पेस नगरे नियम कानुन र विधान बमोजिम कारबाही हुनेसमेत चेतावनी दिइएको छ ।
मंगलबार नै जवाफ
ओली पक्षले सोधेको स्पष्टीकरणको जवाफ लिखित रूपमै फर्काउने नेपालपक्षले निर्णय गरेको छ । ललितपुरमा सोमबार सम्पन्न खनाल–नेपाल पक्षका स्थायी कमिटी सदस्यहरूको अनौपचारिक छलफलपछि स्पष्टीकरणको लिखित जवाफ दिने निष्कर्षमा सो पक्ष पुगेको हो । ‘महासचिव ईश्वर पोखरेलको हस्ताक्षर रहेको पत्र आज प्राप्त भएको छ, भोलिसम्म यसको लिखित जवाफ तयार हुन्छ,’ एक नेताले भने ।
