काठमाडौं– निर्वाचन आयोगका अनुसार अब नेपाल कम्युनिस्ट पार्टी (एमाले) र नेपाल कम्युनिस्ट पार्टी (माओवादी केन्द्र) दुई छुट्टाछुट्टै दल भएको छ । नेकपा खारेजीसँगै नेकपा एमाले र नेकपा माओवादी केन्द्र एकीकरण अघिको अवस्थामा रहेको जानकारी संघीय संसद सचिवालयलाई दिने आयोगले निर्णय गरेसँगै दुई दल विधिवत् रुपमा छुट्टिएका हुन् ।
एमाले र माओवादी केन्द्र छुट्टाछुट्टै दल बनेको जानकारी संसदलाई दिने निर्वाचन आयोगले निर्णय गरेको छ । आयोगको बैठकले एमाले र माओवादी केन्द्र साविकको अवस्थामा रहेको जानकारी केन्द्रमा संघीय संसद सचिवालयसँगै प्रदेश सभा सचिवालयहरूमा पनि पठाउने निर्णय गरेको हो ।
आयोगले केपी ओली र पुष्पकमल दाहाललाई पनि नेकपा खारेजीसँगै दल साविकको अवस्थामा कायम रहेको जानकारी दिने भएको छ । आयोगले राजपत्रमा पनि खारेजीको सूचना प्रकाशित गर्ने भएको छ ।
साविकमा राजनीतिक दलका रूपमा रहेको नेकपा एमाले र माओवादी केन्द्र अलग–अलग राजनीतिक दलका रूपमा सविककै अवस्था ३ जेठ ०७५ भन्दा अघि रहेको सूचना प्रकाशत गर्ने आयोगले निर्णय गरेको बताइएको छ । आयोगको पत्रसँगै अब संसद सचिवालयले छुट्टाछुट्टै दलका रूपमा एमाले र माओवादी नेताहरूको सिट व्यवस्थापन गर्नुपर्ने भएको छ । उनीहरूको बस्ने ठाउँ फरक हुनेछ ।
आयोगले यसअघि गोपाल किराँतीको नाममा रहेको नेकपा माओवादी केन्द्रलाई नयाँ नाम र चुनाव चिह्न तथा सन्ध्या तिवारीको नाममा रहेको नेकपा एमालेलाई नयाँ नाम प्रस्ताव गर्न सुझाएको छ । आयोगले दियो किराँतीलाई पार्टीको नाम र चिह्न फेर्न १५ दिन र तिवारीले पार्टीको नाम मात्र फेरे हुने भनेर भनेको छ ।
आयोगले मंगलबार विज्ञप्ति निकालेर नेकपा माओवादी केन्द्रको हकमा अर्को नयाँ नाम र चिह्न तथा नेपाल कम्युनिस्ट पार्टी एकीकृत माक्र्सवादी–लेनिनवादीको हकमा नयाँ नाम प्रस्ताव गरी १५ दिनभित्र सुधारसहितको विवरण पेस गर्न भनेको छ ।
आयोगका प्रवक्ता सहसचिव राजकुमार श्रेष्ठद्वारा जारी विज्ञप्तिमा तिवारी नेतृŒवको नेकपा एमालेको नाम मात्रै सुधार गर्न भनिएको छ । उक्त पार्टीले पहाडबाट उदाउँदै गरेको सूर्य चिह्न लिएको थियो । सर्वोच्च अदालतले नेपाल कम्युनिस्ट पार्टी ऋषि कट्टेलको भएको फैसला गरेपछि नेकपा एमाले र नेकपा माओवादी केन्द्र ब्यूँताइदिएका छन् ।
एकताको आह्वान
आयोगले एमाले र माओवादी केन्द्रलाई फेरि एकीकरण गर्ने भए १५ दिनभित्र आउन भनेको छ । अदालतले खारेज गरिदिएको एकीकरण फेरि गर्ने भए नेकपा (एमाले) र माओवादी केन्द्रले १५ दिनभित्र नयाँ पार्टीको नाम र चुनाव चिह्नसहित निर्वाचन आयोगमा आउन भनेको हो । मंगलबार निर्वाचन आयोगले यी दुई पार्टी मिलेर बनेको नेकपाको दर्ता खारेज गर्दै फेरि एकीकरण गर्ने भए केन्द्रीय समितिको निर्णयसहित १५ दिनभित्र आयोगमा आउन भनेको छ । ‘आयोगको मिति २०७५ जेठ २३ गतेको निर्णयबाट नेपाल कम्युनिस्ट पार्टी (एकीकृत माक्र्सवादी–लेनिनवादी) र नेपाल कम्युनिस्ट पार्टी (माओवादी केन्द्र) बीच एकीकरण भई बनेको नेपाल कम्युनिस्ट पार्टी (नेकपा) नामक राजनीतिक दल सम्मानित सर्वोच्च अदातलतको २०७७ फागुन २३ गतेको फैसलाले बदर भएकाले अब यी दुई दलले दल एकीकरण गर्ने भएमा राजनीतिक दलसम्बन्धी ऐन, ०७३ र राजनीतिक दलसम्बन्धी नियमावली, ०७४ विपरीत नहुने गरी दुवै दलले आ–आङ्खनो केन्द्रीय समितिबाट दल एकीकरण गर्ने निर्णय गरी सो निर्णयसहित नयाँ दलको रूपमा एकीकरण गर्ने भएमा एकीकरणपछि बन्ने दलको नयाँ नाम र चिह्नसमेत प्रस्ताव गरी १५ दिनभित्र आयोगमा निवेदनसहित उपस्थित हुनका लागि नेपाल कम्युनिस्ट पार्टी (एकीकृत माक्र्सवादी–लेनिनवादी) र नेपाल कम्युनिस्ट पार्टी (माओवादी केन्द्र) लाई जानकारी गराउने,’ भनी निर्वाचन आयोगले जारी गरेको विज्ञप्तिमा भनिएको छ ।
