काठमाडौं– पूर्वप्रधानमन्त्री तथा जनता समाजवादी पार्टी जसपाका संघीय परिषद् अध्यक्ष डा.बाबुराम भट्टराईले संसद विघटनको विरोधमा संयुक्त आन्दोलन गर्न आव्हान् गरेका छन् ।
प्रतिनिधिसभा पुनस्र्थापनाको माग गर्दै शनिबार धनकुटामा आयोजित विरोधसभामा डा.भट्टराईले सबै दल र नागरिक समाजलाई मतभेद बिर्सेर आन्दोलनमा आउन आह्वान गरे ।
‘कांग्रेस, नेकपा दाहाल–नेपाल पक्ष, जसपा, जनमोर्चा, विवेकशीललगायत पार्टी, नागरिक समाज सबै मिलेर एउटा आन्दोलनको आँधीबेहरी सिर्जना ग¥यौँ भने एक हप्ताभित्र केपी ओलीले घुँडा टेक्छन्,’ उनले भने, ‘ओलीको प्रतिक्रान्ति सच्याउने ०६२÷६३ मा जस्तो १९ दिन आन्दोलन गर्नु पर्दैन ।’
प्रधानमन्त्री ओलीको प्रतिगामी कदमविरुद्ध सडक संघर्ष नै उपयुक्त विकल्प भएको उनको भनाइ छ । ‘हाम्रा मतभिन्नता छाडेर सात दिन सडक ठप्प पारौँ, यो प्रतिक्रान्ति सुल्टिन्छ, हामी सही ट्र्याकमा जान्छौँ,’ उनले भने ।
कांग्रेसका तल्लो तहका नेता तथा कार्यकर्ताले ओलीको प्रतिगमनविरुद्ध आवाज उठाए पनि केन्द्रीय नेताहरू अलमलिएको उनले दाबी गरेका छन् । ‘कांग्रेस नेताहरू आन्दोलनमा नआएर के जोखाना हेरेर बसिराख्नु भएको छ ?’ उनले प्रश्न गरे, ‘लोकतन्त्र गयो त सबैथोक गयो, ०७ सालदेखि लोकतन्त्रका लागि लडेको कांग्रेस यस्तो बेलामा चुप लागेर बस्न मिल्छ ?’
पूर्वप्रधानमन्त्री डा.भट्टराईले सडकमा आन्दोलन गरिरहेको नेकपा दाहाल–नेपाल समूहले ओलीसँग निर्णायक सम्बन्धविच्छेद नगर्दा जनता सडकमा नआएको बताएका छन् । संसद विघटनविरुद्धको आन्दोलन व्यक्तिभन्दा पनि प्रवृत्तिविरुद्धको आन्दोलन भएको उनको भनाइ छ ।
