दोलखा- राष्ट्रिय स्वतन्त्र पार्टी (रास्वपा) दोलखाले संगठन विस्तार र पार्टी गतिविधिलाई व्यवस्थित बनाउन जिल्ला सचिवालय गठन गरेको छ।
पार्टी जिल्ला समन्वय समितिको बैठकले नौवटै स्थानीय तहका संयोजक, दुई विभाग र जिल्ला सल्लाहकार परिषद् गठन गरेको छ। बैठकले संगठन विभागको प्रमुखमा अर्जुन कार्की, उपप्रमुखमा सोभित उप्रेती र सचिवमा निशान बुढाथोकीलाई चयन गरेको छ।
बैठकले जिल्ला समितिका पदाधिकारी तथा सदस्यलाई स्थानीय तहमा समन्वय र सहजीकरणको जिम्मेवारीसमेत दिएको छ। पार्टीले भीमेश्वर नगरपालिकाको संयोजकमा जिल्ला सभापति दिनेश बस्नेतलाई तोकेको छ।
मेलुङमा उपसभापति कृष्णबहादुर खड्का, बैतेश्वरमा सचिव रमेशकुमार श्रेष्ठ र तामाकोशीमा सहसचिव अर्जुन कार्कीलाई जिम्मेवारी दिइएको छ। पालिका अध्यक्षलाई पार्टी संगठन विस्तार र गतिविधिमा सहयोग पुग्ने गरि नयाँ व्यवस्था गरिएको सचिव रमेशकुमार श्रेष्ठले बताए।
हरेक स्थानीय तहबाट कम्तीमा एक जना रहने गरी नौ जनाको विभाग गठन गरिएको छ। रास्वपा दोलखाले जिल्ला सल्लाहकार परिषद्समेत गठन गरेको छ। परिषद्को अध्यक्षको जिम्मेवारी बाबुलाल लामा बैतेश्वरलाई दिइएको छ।
बैठकमा केन्द्रीय सदस्य एवं सांसद जगदीश खरेल, सांसद स्मृति सेञ्चुरी, प्रदेश समिति सदस्य प्रकाश खत्री सहभागी थिए।
![सिण्डिकेटधारीविरुद्ध व्यवसायीको आक्रोशः २५ व्यवसायीको तस्बिरमा जुत्ता प्रहार [भिडियो]](https://www.prabhabonline.com/uploads/posts/200X200/jutta-prahar-bairo-1789318338.jpg)