काठमाडौं– नेपाली कांग्रेसमा १४औँ राष्ट्रिय महाधिवेशनको मिति नजिकिँदै जाँदा आन्तरिक विवाद पनि चर्कँदै गएको छ । पार्टी सभापति शेरबहादुर देउवाले आफू खुसी निर्णय गर्दै जान थालेपछि अन्य नेताहरू असन्तुष्ट बनेका हुन् । यसैक्रममा संस्थापनइतर समूहले सभापति देउवाका पछिल्ला निर्णय फिर्ता गराउन चरणबद्ध दबाब दिने निष्कर्ष निकालको छ ।
शनिबार इतर समूहको भर्चुअल बैठकमा सभापति देउवाद्वारा पार्टी विधानविपरीत गरिएका निर्णय सच्याउन एक साताको अल्टिमेटम दिने निष्कर्षमा पुगेका छन् ।
बैठकमा सहभागी वरिष्ठ नेता रामचन्द्र पौडेल, महामन्त्री शशांक कोइराला, प्रकाशमान सिंह, अर्जुननरसिंह केसी, शेखर कोइराला, रामशरण महत, महेश आचार्य, धनराज गुरुङ, चन्द्र भण्डारी, गगन थापा, गुरु घिमिरे, प्रदीप पौडेल, कल्याण गुरुङ, उमाकान्त चौधरीलगायतका नेताहरू सहभागी थिए । उनीहरू यसअघिबाटै सभापति देउवाले गरेका विधानविपरितका निर्णयहरू फिर्ता गर्नुपर्ने बताउँदै आएका छन् ।
छलफलमा सहभागी नेता केसीका अनुसार गएको विहीबार भर्चअल बैठकद्वारा गठित तीन सदस्यीय समितिले तयार पारेको प्रतिवेदनमाथि शनिबार आ–आफ्नो धारणा राखेका थिए । केन्द्रीय सदस्य गुरुराज घिमिरे, जीवन परियार र बद्रि पाण्डे सम्मेलित समितिले विभाग गठन, क्रियाशील सदस्यता वितरणमा अपारदर्शीता, भ्रातृ संस्थाको म्याद थपलगायतका बारेमा रणनीतिक प्रतिवेदन बनाएको थियो ।
सभापति देउवाले विरोधका बाबजुद पार्टीका केन्द्रीय विभाग गठन र विस्तार जारी राखेपछि इतरपक्ष आक्रोशति बनेको हो । अहिलेसम्म देउवाले ४७ वटा विभागमध्ये २० वटा विभाग बनाएर करिब नौ सय कार्यकतालाई जिम्मेवारी दिइसकेका छन् । साथै, पार्टीमा नवप्रवेशीलाई मनमौजी ढंगले क्रियाशील सदस्यताको फाराम दिने गरेकामा इतरपक्ष सशंकित बनेको छ ।
केन्द्रीय पदािधकारी, सदस्य, सांसद, जिल्ला सभापति र भ्रातृ तथा शुभेच्छुक संस्थासँग अन्तक्र्रिया गर्ने, पत्रकार सम्मेलन गर्ने, जिल्ला तथा केन्द्रीय कार्यालयमा धर्ना दिने दिने, जिल्ला तथा केन्द्रीय कार्यलयमा रिले र अन्तिममा आमरणअनशन बस्ने कार्यक्रमलाई थप विस्तृत रूप दिएर अगाडि बढ्ने बैठकले निष्कर्ष निकालेको नेता केसीले बताए ।
सिँगो पार्टी एक भएर जानुपर्छ भन्ने मान्यताअनुसार सभापतिले देउवाले आफ्नो सोच बदलेमा र निर्णय सच्याउन चाहेमा एक हप्ताको समय छुट्याइएको उनको भनाइ छ । उनले भने, ‘उहाँ वार्ता गर्न चाहनुहुन्छ भने वार्ताद्वारा यो समस्या समाधान बाटो पनि निकालौँ भन्ने हाम्रो मनसाय छ । होइन मैले जे गरेको छु त्यही ठीक हो भन्ने हो भने हामी चरणबद्ध रूपको कार्यक्रममा जान्छौँ ।’
तत्कालीन सभापति सुशील कोइरालाले तीन–साढे तीन वर्षमा विभाग गठन गर्दा देउवाले पनि केन्द्रय कार्यसमितिबाट राजीनामा दिएर अनशन र सत्याग्रहमा उत्रिएजस्तै आफूहरू पनि त्यो बाटो अबलम्बन गर्न बाध्य हुने केसीको भनाइ छ ।
