नयाँदिल्ली– कोरोनाभाइरसबाट भारतमा कुल सङ्क्रमितको संख्या ३७ लाखभन्दा बढी पुगेको छ ।
अधिकारीले दिएको जानकारी अनुसार बुधबारसम्म सङ्क्रमितको कुल संख्या ३७ लाख ६९ हजार ५२३ पुगेको हो ।
तीमध्ये ७८ हजार ३५७ जना पछिल्लो एकैदिनमा थपिएको केन्द्रीय स्वास्थ्य तथा परिवार कल्याण मन्त्रालयले जनाएको छ ।
भारतमा कुल सङ्क्रमितमध्ये झण्डै २९ लाख अर्थात् ७६.९८ प्रतिशत सङ्क्रमित सङ्क्रमणमुक्त भएका छन् ।
अधिकारीका अनुसार भारतमा अहिलेसम्म कोरोनाका कारण ६६ हजार ३३३ जनाको मृत्यु भएको छ । तीमध्ये एक हजार ४५ जनाको पछिल्लो २४ घण्टामा मृत्यु भएको हो ।
भारतमा अहिले पनि आठ लाख एक हजार २८२ जना सङ्क्रमित अवस्थामै रहेका छन् ।
विश्वभरी महामारीका रूपमा फैलिएको कोरोनाका कारण अहिलेसम्म संसारभरी दुई करोड ५९ लाख २५ हजार ४७० जना सङ्क्रमित भएका छन् ।
तीमध्ये अहिलेसम्म आठ लाख ६१ हजार ६६७ जनाको कोरोनाकै कारणले मृत्यु भइसकेको छ ।
मृत्यु भएका र सङ्क्रमित भएका मध्ये सबैभन्दा धेरै अमेरिकामा रहेका छन् भने दोस्रो धेरै ब्राजिलमा र तेस्रो धेरै भारतमा रहेका छन् ।
कोरोनाभाइरसको उत्पत्ति भएको मानिने चीन भने अहिले सङ्क्रमितको संख्याका आधारमा ३८औँ स्थानमा रहेको छ ।
पछिल्लो विवरणअनुसार अमेरिकामा ६२ लाख ५८ हजार २८ जना सङ्क्रमित हुँदासम्म एक लाख ८८ हजार ९०७ जनाको मृत्यु भएको छ ।
त्यसैगरी ब्राजिलमा ३९ लाख ५२ हजार ७९० जना सङ्क्रमित रहेकामा एक लाख २२ हजार ६८१ जनाको मृत्यु भएको तथ्याङ्क छ ।
विश्वभरी महामारीका रूपमा फैलिएको कोरोनाभाइरसको सङ्क्रमण अहिलेसम्म विश्वका २१५ ओटा देशमा पुगेको छ ।
सन् २०१९ को डिसेम्बरको अन्त्यतिर पहिलो पटक कोरोनाको सङ्क्रमण चीनको उहान सहरमा देखिएको थियो ।
डिसेम्बर र जनवरीसम्म चीनमा मात्रै रहेको कोरोना फेब्रुअरीदेखि फिलिपिन्स, जापान, इरान, इटली, दक्षिण कोरिया, फ्रान्स हुँदै विश्वभरी फैलिएको हो ।
यो सङ्क्रमण फैलाउने विषाणुलाई नयाँ कोरोनाभाइरस भन्ने गरिएको छ ।
विश्वभरी फैलिएर सबैलाई प्रभावित पारेको यस्तो सङ्क्रमणको अहिलेसम्म पनि औषधि प्रमाणीकरण हुन सकेको छैन् । कतिपय बैज्ञानिकले औषधि बनाइएको दावी गरेपनि ती सबै अहिले परीक्षणकै चरणमा रहेका छन् ।
अमेरिकी अखबार द न्यूयोर्क टाइम्सका अनुसार हाल विश्वमा १२५ वटा कोरोनाभाइरसको खोपबारे अनुसन्धान भइरहेको छ जसमध्ये ३६ वटा मानवमा परीक्षण भइरहेका छन् ।
अघिल्लो साताको अन्त्यसम्म नौ खोपको तेश्रो चरण अन्तर्गत ठूलो संख्यामा मानिसमा परीक्षण भइरहेका उक्त अखबारले जनाएको छ ।
-1755862759.jpeg)
