हाम्रो पार्टी फुटिसक्यो । यो दुर्भाग्यपूर्ण हो । गगन एक्लैले पार्टी चलाउन सक्दैनन् ।
डा. शशांक कोइराला
पूर्वमहामन्त्री
काठमाडौं- विशेष महाधिवेशनपछि संस्थापनबाट इतरपक्ष बन्न बाध्य शेरबहादुर देउवा र डा. शेखर कोइराला समूहले आफूहरु एक भएर पार्टी फुटाउन तयार भएको सन्देश दिएका छन् । लामो समयदेखि सभापति गगन थापासँग असन्तुष्ट देउवा र शेखर समूह आइतबार विराटनगरमा भेला भएर पार्टी फुटाउन आफूहरु तयार भइसकेको सन्देश दिएका हुन् ।
कांग्रेसलाई इतिहासकै कमजोर बनाउने काम विभिन्न नाटकबाट भयो । त्यसको मुख्य पात्र वा खलनायक भन्नुस्, हाम्रा अहिलेका सभापति गगनजी हुनुहुन्छ । उहाँको नेतृत्वमा पार्टी मिल्छ भनेर के आश गर्ने ?
मोहन बस्नेत
कांग्रेस नेता
यो सन्देशसँगै देउवा र शेखर समूहले डा. शेखरलाई साझा नेताका रुपमा अघि सार्ने तयारीसमेत गरेका छन् । कांग्रेसका पूर्वमहामन्त्री डा. शशांक कोइरालाले पार्टी फुटिसकेकोले सभापति थापाले पार्टी चलाउन नसक्ने दाबी गरे । कांग्रेसका पूर्वमहामन्त्री डा. शशांक कोइरालाले पार्टी फुटिसकेको बताएका हुन् । ‘हाम्रो पार्टी फुटिसक्यो । यो दुर्भाग्यपूर्ण हो,’ शशांकले भने, ‘यो सर्वोच्चले फुटाएको हो । गाउँभरि कांग्रेस छ । तर भोट गएन ।’
जेन–जी विद्रोहपछि कांग्रेसमा गत पुस मसान्तमा विशेष महाधिवेशन आयोजना भएको थियो । उक्त विशेष महाधिवेशनले गगनको नेतृत्वमा नयाँ कार्यसमिति चयन गर्दा देउवा र शेखर समूहले भने बहिस्कार गरेको थियो । उक्त समूहले पार्टी आधिकारिकता दाबी गर्दै निर्वाचन आयोगदेखि सर्वोच्च अदालत पुगे पनि गगनकै नेतृत्वमा चयन भएको कार्यसमितिलाई वैधानिकता प्रदान गरेको थियो । योसँगै असन्तुष्ट समूह भेलामार्फत शक्ति प्रदर्शनमा लागेको हो ।
शशांकले आफू डा. शेखर समूहमै रहेकोले उनकै नेतृत्वमा अघि बढ्नेसमेत बताए । कांग्रेस नेता बलबहादुर केसीले शेखरलाई नेतृत्व लिएर अगाडि बढ्न आग्रह गरे । ‘नेपाली कांग्रेसलाई मिलाएर लिएर जानुपर्छ । यसको नेतृत्व शेखर कोइरालाले लिनुभएको छ, हामीले साथ दिनुपर्छ,’ केसीले भने ।
अर्का नेता कृष्णप्रसाद सिटौलाले अनावश्यक नाटक बन्द गरी विवाद समाधानका लागि साहस देखाउन सभापति थापाको ध्यानाकर्षण गराए । ‘विवाद के होला भनेर नडराउनुस्, १० मिनेटमै कुरा टुंगिन्छ । यो साहस तपाईंको हृदयबाट आउनुपर्छ । लेख्ने र मेटाउने शक्ति तपाईंहरूसँगै छ, अब एकमुष्ट निर्णय गरेर अघि बढ्नुस्,’ सिटौलाले भने ।
शेखरले भने लोकतन्त्रको स्थापना र निरंकुशताको अन्त्यका लागि स्थापना भएको कांग्रेस पार्टीभित्र निरंकुशता सुरु भएको आरोप लगाए । ‘अहिले क्रियाशील सदस्यता अद्यावधिक गर्न नमानेको बहानामा देशैभरिका वडा सभापतिलाई मौखिकरूपमा हटाउने काम भइरहेको छ । यो निरंकुशताको सुरुआत हो, जुन कांग्रेसको आदर्शविपरीत छ,’ शेखरले भने ।
अहिलेको अवस्थामा कुनै पनि हालतमा पार्टी नफुट्ने र फुट्न नदिने प्रतिबद्धतासमेत उनले जनाए । ‘पार्टी फुट्न दिन्नँ । पार्टी फुट्दैन । यहाँबाट गएपछि आफ्ना साथीहरुलाई पनि तपाईंहरुले यही भन्नुपर्छ,’ शेखरले भने । कांग्रेसका अर्का नेता मोहन बस्नेतले भने गगनकै कारण कांग्रेस दुई टुक्रा भएको तर्क गरे । ‘कांग्रेसलाई इतिहासकै कमजोर बनाउने काम विभिन्न नाटकबाट भयो । त्यसको मुख्य पात्र वा खलनायक भन्नुस्, हाम्रा अहिलेका सभापति गगन थापाजी हुनुहुन्छ, उहाँको नेतृत्वमा पार्टी मिल्छ भनेर के आश गर्ने ?,’ उनले प्रश्न गरे ।
कांग्रेसलाई बलियो बनाउने हो भने आन्तरिक लोकतन्त्र, निष्पक्ष सदस्यता व्यवस्थापन र पुराना कार्यकर्ताको सम्मान सुनिश्चित गर्न आवश्यक रहेको नेता बस्नेतले बताए । संस्थापनइतरले गगनमाथि विभिन्न आरोपका साथ चेतावनी दिँदा उनी सानेपामा अर्थतन्त्रबारे बहसमा सहभागी थिए । गगनले उक्त सभामा पार्टी एकताबारे कुनै भनाइ राखेनन् ।
विराटनगरको सभामा भने १४ औं महाधिवेशनमा सभापतिका निकटतम् प्रतिद्वन्द्वी डा. शेखर, पूर्वमहामन्त्रीद्वय डा. शशांक र कृष्णप्रसाद सिटौला सहभागी थिए । त्यस्तै, नेताहरु डा. मिनेन्द्र रिजाल, एनपी साउद, मीनबहादुर विश्वकर्मा, महिन्द्रा लिम्बू, रामहरि खतिवडा, सरस्वती बजिमय, सुजाता परियार, सीता गुरुङसहितका नेताहरू सहभागी थिए । देउवा र शेखर कोइरालाले विशेष महाधिवेशनलाई सर्वोच्च अदालतले आधिकारिकता दिएपछि गरेको यो पहिलो औपचारिक भेला हो । यसअघि यो समूहले धुम्बाराहीस्थित स्मार्ट होटलमा पटक-पटक अनौपचारिक भेला आयोजना गरेको थियो ।
