काठमाडौं - नेपाल क्लाइम्बिङ स्पोर्ट संघ (Nepal Climbing Sport Association - NCSA) ले 'नेपाल क्लाइम्बिङ स्पोर्ट प्रतियोगिता-२०२६'(National Sport Climbing Championship 2026) आयोजना गर्ने भएकाे छ ।
प्रत्येक वर्ष विभिन्न प्रतियोगिता तथा कार्यक्रमहरू सञ्चालन गर्दै आइरहेको नेपाल क्लाइम्बिङ स्पोर्ट संघले साहसिक खेलकुद तथा खेल पर्यटन क्षेत्रको विकास र प्रवर्द्धनका लागि नेपाल क्लाइम्बिङ स्पोर्ट प्रतियोगिता-२०२६ आयोजना हुने भएकाे हाे ।
काठमाडौंको कालधारा, ठमेलस्थित यही शनिबार काठमाडौं स्पोर्ट क्लाइम्बिङ सेन्टरकमा उक्त प्रतियोगिता हुने भएकाेछ । नेपाल क्लाइम्बिङ स्पोर्ट संघ नेपालमा क्लाइम्बिङ खेलको राष्ट्रिय खेल संघ हो तथा अन्तर्राष्ट्रिय क्लाइम्बिङ महासंघ (World Climbing) को सदस्य संस्था पनि हो। प्रतियोगिता Bouldering विधामा अन्तर्राष्ट्रिय महासंघद्वारा निर्धारित नियम तथा मापदण्डअनुसार Qualification Round र Final Round मा सञ्चालन गरिनेछ। Bouldering विधाको मात्र प्रतियोगिता भएकाले कार्यक्रम एक दिनमै सम्पन्न हुनेछ।
राष्ट्रिय स्तरको प्रतियोगिता भएकाले सातै प्रदेशबाट प्रतिनिधित्व हुने गरी १७ वर्ष वा सोभन्दा माथिका इच्छुक खेलाडीहरूले सहभागिता जनाउन सक्नेछन्। प्रतियोगिताको औपचारिक उद्घाटन राष्ट्रिय खेलकुद परिषद्का सदस्य–सचिव **श्री रामचरित्र मेहता**को प्रमुख आतिथ्यतामा बिहान ८ बजे हुनेछ। उद्घाटनपछि खेलाडीहरूलाई प्रतियोगिताको स्वरूपबारे जानकारी गराइने तथा शपथ ग्रहण कार्यक्रम सम्पन्न गरिनेछ। त्यसपछि बिहान ८ बजेदेखि बेलुका ६ बजेसम्म पुरुष तथा महिला दुवै विधाका Qualification तथा Final Round सञ्चालन गरिनेछ।
Qualification Round बाट महिला ८ जना र पुरुष ८ जना गरी कुल १६ जना खेलाडी Final Round का लागि छनोट हुनेछन्। Final Round को प्रतिस्पर्धापछि उत्कृष्ट महिला तथा पुरुष खेलाडीहरूलाई प्रथम, द्वितीय र तृतीय स्थानका विजेताका रूपमा घोषणा गरिने आयाेजकले जनाएकाे छ ।
यस प्रतियोगिताको मुख्य उद्देश्य क्लाइम्बिङ खेल तथा यस क्षेत्रमा आबद्ध खेलाडी, प्रशिक्षक, प्राविधिक र साहसिक खेलकर्मीहरूको मनोबल उच्च राख्दै खेलको विकास र प्रवर्द्धन गर्नु हो। साथै साहसिक खेल र पर्यटनको प्रवर्द्धनमार्फत देशको आर्थिक तथा पर्यटन क्षेत्रमा योगदान पुर्याउने लक्ष्य पनि रहेको छ। प्रतियोगिताको अवधिभर सहभागी खेलाडी तथा प्राविधिकहरूको खेल जोखिम तथा दुर्घटनालाई मध्यनजर गर्दै म्यादी बीमाको व्यवस्था गरिनेछ।
