काठमाडौं– नेपाली कांग्रेसका नेता प्रकाशमान सिंहले पार्टीलाई संस्थागतरूपमा अगाडि बढाउने नेतृत्व कांग्रेसभित्र अभाव रहेको बताएका छन् ।
नेपाल महिला संघका संस्थापक अध्यक्ष मंगलादेवी सिंहको २४औँ स्मृति दिवसका अवसरमा संघको केन्द्रीय समितिले आयोजना गरेको ‘वर्तमान अवस्थामा महिलाको चुनौती र नेपाली कांग्रेसको विधान’ विषयक भर्चुअल अन्तक्र्रियामा उनले यस्तो बताएका हुन् । नेता सिंहले कांग्रेसको नेतृत्वप्रति कार्यकर्ताको भरोसा गुम्दै गएको समेत बताए ।
‘कांग्रेस बलियो भएन भने लोकतान्त्रिक व्यवस्था बलियो हुन सक्दैन, कांग्रेस बलियो बनाउनका लागि ठिक नेतृत्वको हातमा कांग्रेसलाई लैजानुपर्छ’, उनले भने । नेता सिंहले नेपाली महिलाको हक, अधिकारका लागि मंगलादेवीले आवाज उठाएको स्मरण गर्दैै पहिचान, स्वतन्त्रताका लागि लड्ने साहसी महिला स्व. सिंह भएको उल्लेख गरे । पार्टीको १४औँ महाधिवेशनका लागि महिलालाई क्रियाशिल बनाउनु जरुरी रहेको उनको भनाइ थियो ।
कार्यक्रममा नेपाली कांग्रेसका केन्द्रीय सदस्य एवं प्रवक्ता विश्वप्रकाश शर्माले मंगलादेवी सिंह साहसी र विद्रोही महिला भएको उल्लेख गरे ।
उनले भने, ‘मंगलादेवी सिंहले गरेको क्रान्तिका कारण पछिल्लो समय नेपाली महिला नेतृत्वमा पुग्न सकेका छन् ।’ उनले दक्षिण एशियामा पहिलो महिलामन्त्री, सभामुख, प्रधानन्यायधीश, राष्ट्रपति नेपाली महिला भएको बताउँदै नेपाली महिला अमेरिकी महिलाभन्दा अगाडि भएको दावी गरे । प्रतिशत भन्दा प्रतिस्पर्धा गरेर महिला अगाडि बढ्नुपर्ने उनको भनाइ थियो ।
त्यस्तै, कांग्रेस केन्द्रीय सदस्य एवं महिला विभाग प्रमुख ईश्वरी न्यौपानेले महिला आन्दोलनका कारण संविधानले महिलालाई अधिकार दिएको उल्लेख गरिन् भने अर्का केन्द्रीय सदस्य सीता गुरुङले पार्टीको विधानले टोल, वडा, पालिका, प्रदेश र केन्द्रमा ३३ प्रतिशत महिलाको अधिकार सुनिश्चित गरेको बताइन् । उनले भनिन्, ‘उक्त अधिकार कार्यान्वयनका लागि महिला संघले दवाव दिनुपर्छ ।’
संघका अध्यक्ष उमा रेग्मीले महिलालाई अधिकार सम्पन्न गराउने काम महिला संघको भएको बताउँदै पार्टी र सरकारसँग महिलाको हकअधिकारका लागि लड्नुपर्ने बेला आएको उल्लेख गरिन् । संघका महासचिव धना खतिवडाले पार्टीभित्र देखिएको गुट, उपगुटको पछाडि महिला नलाग्न आग्रह गरिन् ।
यस्तै, संघका केन्द्रीय उपाध्यक्ष सरस्वती अर्याल, काठमाडौं अध्यक्ष विष्णुदेवी पुडासैनी, झापा अध्यक्ष सुशीला ढकाल, कञ्चनपुर अध्यक्ष मधु भारतीलगायतले संविधानले ग्यारेन्टी गरेको महिलाको अधिकार प्राप्त गर्नका लागि पार्टी र सरकारलाई दवाव दिनुपर्ने आवश्यकता औँल्याए ।
