काठमाडौं- आदिवासी जनजाति चलचित्र महासंघ (फिन्फी) को आयोजनामा “छैटौं नेपाल आदिवासी जनजाति चलचित्र महोत्सव २०८३” आगामी जेठ १७, १८ र १९ गते काठमाडौंस्थित चलचित्र विकास बोर्डमा आयोजना हुने भएको छ। विहीबार अनामनगरमा रहेकाे सिलाैटाे रेष्टुरेन्टमा पत्रकार सम्मेलन गरी उक्त महोत्सवकाे बारेमा जानकारी गराएकाे हाे ।
महोत्सवले आदिवासी जनजाति समुदायका भाषा, संस्कृति, इतिहास, मिथक, लोकज्ञान तथा सामुदायिक स्मृतिलाई दृश्य-श्रव्य माध्यममार्फत उजागर गर्ने उद्देश्य लिएको आयोजकले जनाएको छ। महासंघका अनुसार महोत्सव केवल चलचित्र प्रदर्शनमा सीमित नभई सांस्कृतिक न्याय, आत्म-प्रतिनिधित्व, भाषिक पुनर्जागरण तथा आदिवासी ज्ञान-परम्पराको संरक्षणसँग जोडिएको सांस्कृतिक अभियानका रुपमा लिएकाे छ।
आयोजकका अनुसार नेपालमा आदिवासी चलचित्र निर्माणको चार दशक लामो यात्रामा हालसम्म करिब डेढ हजारभन्दा बढी चलचित्र निर्माण भइसकेका छन्। पछिल्लो समय निर्माण भइरहेका आदिवासी चलचित्रहरूले मातृभाषा, भूमि-सम्बन्ध, पूर्वजगत, सांस्कृतिक चेतना तथा सामुदायिक अस्तित्वलाई केन्द्रमा राख्दै पृथक सिनेम्याटिक सौन्दर्य-दर्शनको विकास गरिरहेका छन्।
महोत्सवमा लिम्बू, नेवारी, गुरुङ, तामाङ, मगर, भुजेल, माझी तथा राजवंशी समुदायका कथानक चलचित्र, लघु चलचित्र, वृत्तचित्र तथा एआई-जेनेरेटेड वृत्तचित्र प्रदर्शन गरिनेछ। कथानक चलचित्रतर्फ दिनेश लिङ्देन निर्देशित “रीत”, अमृतमान महर्जन निर्देशित “स्वयंगु”, जनक गुरुङ निर्देशित “डोल्स्यो रामरानी”, निमा लामा तामाङ निर्देशित “ह्याङ तामाङ” तथा अशोक आले मगर निर्देशित “दिलसरा” प्रदर्शन गरिने आयोजकले जनाएको छ।
त्यस्तै लघु चलचित्रतर्फ सागर केरुङ निर्देशित “तङसिङ”, हुतबहादुर तामाङ निर्देशित “दुखला ग्यम”, बिपना तामाङ भुजेल निर्देशित “निको पहिचान” तथा विशाल रोक्का मगर निर्देशित “लाहुरेनी” समावेश छन्। वृत्तचित्रतर्फ अनिल मगर निर्देशित “आग्रे”, होमकुमारी माझी निर्देशित “लदि पुजा” तथा अरविन्द विश्वास निर्देशित एआई-जेनेरेटेड वृत्तचित्र “बिराटनगरके प्राचिन राजवंशी” प्रदर्शन गरिनेछ।
महोत्सवमा उत्कृष्ट लघु चलचित्र, उत्कृष्ट वृत्तचित्र तथा कथानक चलचित्रतर्फ उत्कृष्ट चलचित्र, निर्देशक, स्क्रिप्ट, अभिनेता, अभिनेत्री, छायांकन, प्रोत्साहन पुरस्कार तथा जुरी अवार्ड प्रदान गरिने आयोजकले जनाएको छ। महासंघले महोत्सवले नेपाललाई विश्व आदिवासी चलचित्र आन्दोलनको एक सशक्त उदीयमान केन्द्रका रूपमा स्थापित गर्न सहयोग पुग्ने विश्वास व्यक्त गरेको छ। साथै आयोजकले सञ्चारमाध्यम तथा दर्शकलाई महोत्सवको प्रचार-प्रसार र सहभागिताका लागि आग्रह गरेको छ।
