काठमाडौं - अमेरिकामा लामो समयदेखि बसोबास गर्दै आएकी स्रष्टा तथा गीतकार रिमा श्रेष्ठ नेपाली सांगीतिक क्षेत्रमा निरन्तर सक्रिय रहँदै नयाँ–नयाँ सिर्जनामार्फत दर्शक तथा स्रोतामाझ परिचित बन्दै गएकी छन्। पेशाले आइटी इन्जिनियर भए पनि उनले संगीत, साहित्य र कला क्षेत्रमा आफ्नो सिर्जनशील यात्रालाई निरन्तर अघि बढाइरहेकी छन्।
प्रवासको व्यस्त जीवन र पेशागत जिम्मेवारीबीच पनि रिमा श्रेष्ठले नेपाली भाषा, कला र संस्कृतिप्रतिको प्रेमलाई गीत–संगीतमार्फत अभिव्यक्त गर्दै आएकी छन्। उनका सिर्जनामा प्रेम, बिछोड, आत्मीयता तथा जीवनका विविध अनुभूतिहरू भावनात्मक ढंगले प्रस्तुत हुने गरेका छन्।
उनले नेपाली संगीत क्षेत्रका चर्चित कलाकारहरू अन्जु पन्त, स्वरूपराज आचार्य, प्रमोद खरेल, प्राश्ना शाक्य, मेनुका पौडेल, अस्मिता अधिकारी, पुष्पन प्रधान, राजेश पायल राई, रेवती राई तथा किरण गजमेरसँग सहकार्य गरिसकेकी छन्।
रिमाले आफ्ना सिर्जनाहरू ‘रिमा श्रेष्ठ वर्ल्ड’ युट्युब च्यानलमार्फत सार्वजनिक गर्दै आएकी छन्। उनी विगत ६ वर्षदेखि Kansas City Nepalese Society मा सल्लाहकारको भूमिकामा रहेर नेपाली समुदायलाई एकताबद्ध गर्ने कार्यमा समेत सक्रिय छिन्। संस्थामार्फत नयाँ वर्ष, तीज, दशैं, होली तथा देउसी–भैलोजस्ता सांस्कृतिक कार्यक्रम आयोजना हुँदै आएका छन्।
यसैबीच रिमा श्रेष्ठको नयाँ सांगीतिक कोसेली ‘बलमा माइचा हाकुमा दाइचा’ सार्वजनिक भएपछि चर्चा बटुलिरहेको छ। गीतमा रिमा श्रेष्ठकै शब्द सिर्जना रहेको छ भने संगीत सञ्जीत श्रेष्ठले दिएका छन्। गीतमा प्राश्ना शाक्य र राज सायमीको स्वर रहेको छ।
गीतको एरेन्ज, मिक्सिङ तथा मास्टरिङ सञ्जाल भण्डारीले गरेका हुन् भने रेकर्डिङ Gain Studio मा गरिएको हो। भिडियोमा सुदित श्रेष्ठ र सृष्टि महर्जनको अभिनय रहेको छ। भिडियोको निर्देशन सोनाम पाख्रिनले गरेका हुन् भने छायांकन उत्सव दाहालले गरेका छन्। सम्पादन बिजेश पौडेल तथा कोरियोग्राफी रोशन विश्वकर्माको रहेको छ।
प्रवासमा रहेर पनि नेपालीपन, भाषा र संस्कृतिलाई गीत–संगीतमार्फत विश्वभर फैलाइरहेकी रिमा श्रेष्ठ नेपाली सांगीतिक क्षेत्रमा प्रेरणादायी स्रष्टाका रूपमा स्थापित हुँदै गएकी छन्।
