फोरमको सोमबार बसेको बैठकले काठमाडौं उपत्यकामा कोरोनाभाइरस (कोभिड–१९)को संक्रमणको अवस्था कम नभएकाले अत्यावश्यकबाहेक सबै सेवा बन्द गर्ने यसअघिको निर्णयलाई १५ भदौसम्म निरन्तरता दिने निर्णय गरेको हो । यसअघि २६ साउनमा बैठकले ९ भदौसम्म उपत्यकामा निषेधाज्ञा जारी गर्ने निर्णय गरेको थियो ।
बैठकका निर्णयहरू सुनाउँदै मध्यपुर थिमि नगरपालिकाका प्रमुख मदनसुन्दर श्रेष्ठले उपत्यकाभित्र संक्रमणको दर अझैपनि कम नभएकाले अत्यावश्यकबाहेकका सबै सेवा १५ भदौसम्म बन्द गर्ने निर्णय भएको बताए । बैठकले निषेधाज्ञाको स्थितिलाई १५ भदौसम्म कायम गर्न उपत्यकाका तीनवटै जिल्ला प्रशासन कार्यालयलाई सुझाव दिने निर्णयसमेत गरेको छ ।
यसबाहेक कोभिड–१९ संक्रमित व्यक्तिको कन्टयाक्ट ट्रेसिङमा परेका सबै मानिसको पीसीआर परिक्षण स्वास्थ्य मन्त्रालयअन्तर्गत ‘केस इन्भेष्टिगेसन एण्ड कन्टयाक्ट ट्रेसिङ’ (सिआइसीटी)सँग सहकार्यमा सम्पन्न गर्ने निर्णय गरेको छ ।
काठमाडौं महानगरपालिकाका मेयर विद्यासुन्दर शाक्यले उपत्यकाभित्र संक्रमित व्यक्तिको सम्पर्कमा आएका सबै मानिसको पीसीआर परीक्षण गर्न आवश्यक रहेको बताए ।
हाल संक्रमित व्यक्तिको सम्पर्कमा आएका व्यक्तिहरूको पीसीआर परीक्षण नभएकाले स्वास्थ्य मन्त्रालयको टिमसँग समन्वय गरी क्लोज कन्ट्याक्टमा रहेका सबै व्यक्तिको परीक्षण गर्ने निर्णय गरिएको बताए । निषेधाज्ञाको अवस्थामा उपत्यका बाहिरबाट कोहीपनि नआएकाले संक्रमितको सम्पर्कमा रहेका सबैको परीक्षण गर्दा संक्रमणको अवस्थालाई नियन्त्रणमा लिन सकिने शाक्यको भनाइ छ ।
पछिल्लो केही साता यता काठमाडौं उपत्यकामा संक्रमणको दर बढ्दै गएको छ । त्यसैले उपत्यकाका तीनवटै जिल्ला प्रशासन कार्यालयले ४ भदौदेखि लागू हुनेगरी एक साताका लागि निषेधाज्ञा जारी गरेका छन् । तैपनि संक्रमणको दर घट्न सकेको छैन ।
त्यसैले फोरमले निषेधाज्ञालाई केही समय थप गर्न सुझाव दिँदै पीसीआर परीक्षणलाई बढाएर स्थितिलाई नियन्त्रणमा लिने योजना बनाएको जनाएको छ ।
नियन्त्रण गुम्ने खतरा
नेपालमा कोरोना भयावह बन्दै गएको छ । दिनै संक्रमित थपिँदै गएका छन् । बढ्दो संक्रमणसँगै नेपालमा कोरोना नियन्त्रणबाहिर जाने त्रास बढेको छ । नेपालमा कोरानाबाट मृत्युदर समेत बढ्दै गएको छ । सोमबारमात्रै कोरोना संक्रमणबाट ८ जना मृतकको संख्या थपिएको छ ।
स्वास्थ्य तथा जनसंख्या मन्त्रालयका अनुसार पछिल्लो २४ घण्टामा कोरोनाबाट थप ८ जनाको मृत्यु भएको हो । यससँगै नेपालामा मृतकको संख्या १५७ पुगेको स्वास्थ्य मन्त्रालयले जनाएको छ ।
पछिल्लो २४ घण्टामा मृत्यु हुनेमा काठमाडौंका १ महिला, रूपन्देहीमा १ महिला र ३ पुरुषसहित ४ जना, मोरङका १ पुरुष, सुनसरीका १ पुरुष र पर्सामा १ महिला रहेको स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले जानकारी दिए ।
यसैगरी पछिल्लो २४ घण्टामा ७४३ जनामा कोरोना भाइरस संक्रमण पुष्टि भएको छ । योसहित नेपालमा संक्रमितको सोमबारसम्म कुल संख्या ३२ हजार ६ सय ७८ पुगेको स्वास्थ्य मन्त्रालयका प्रवक्ता डा. गौतमले जानकारी दिए ।
